Dua na Sasaga Dredre ki na Soqoni ni Sakaramede
Au nanuma ni keitou sa calata na sakaramede—yaco tale.
iTaba mai na Getty Images
Ni keitou toki mai Amerika ki Vietnam, keirau a navuca vakaveiwatini me kakua ni calati na lotu. Ni oti e dua na yabaki, keitou a sega ni calata e dua na soqoni ni Sigatabu, ia keitou dau bera vakavuqa ka calata vakawasoma na sakaramede. Na neimami soqoni ni sakaramede e tekivu ena 8:30 ena mataka. Ni tolu tiko na gone lalai, na vakavakarau vakatotolo ni gole ki valenilotu e dau vaka me dredre tu.
Keitou a navuca vakamatavuvale ni sa gadrevi me keitou dau yaco donu tu ki valenilotu ena kena gauna ka vakaivotavota ena sakaramede. E a dua na sasaga dredre, ia keitou a yaco totolo ki valenilotu ena va na Sigatabu veitaravi. Au siqema rawa na duidui a yaco mai na neitou sasaga. Sa levu sara na veika vakayalo keitou a sotava ena loma ni macawa.
Ia, ena Sigatabu ka tarava, keitou a yadra bera. Sa oti tu na 7:30 ena mataka. Au tukuna vei watiqu ni sa sega ni yaga, ia au a qai vakasamataka na sala eda na rawa ni vakalougatataki kina kevaka eda caka vinaka sara ni vakavakarau mada ga. Keitou mani vakusakusa!
Ni keitou yaco ki valenilotu, keitou sa bera tu ena 20 na miniti. Au vakila ni keitou sa druka. Keitou rogoca na lagasere ni keitou lako yani, ia niu dolava na katuba, sa gole cake tiko e dua ki na itutu ni vosa me masu.
“Oya beka na serenilotu idoladola?” Au a kayalo kivua na daukaulotu ka duri tu e katuba.
“Io,” a kaya. “Keimami a tekivu bera nikua.”
Au a kurabui sara ga. Au nanuma ga ni keitou sa baci vakacalai tale, ia keitou a yaco donu tu ki valenilotu! E tuturu na wai ni mataqu niu vakila na loloma ni Tamada Vakalomalagi ki na noqu matavuvale lailai kei au.
Keitou a qai kila e muri ni gauna rau a yaco kina ki valenilotu na daukaulotu ena Sigatabu oya, rau a vakila ni sega ni dua e kauta mai na madrai ni sakaramede. E sega na sitoa e voleka tu, ka rawa ni dredre me kune na madrai e Vietnam. Ni oti e dua na gauna ni tavariri, rau a qai nanuma na daukaulotu ni tiko na madrai ena nodrau itikotiko.
Ena vica na siga ki liu, rau a mai vakayakavi ena neitou itikotiko na daukaulotu. Na yakavi oya, au a vakarautaka tu na madrai buli e vale me baleti rau. A tekivu bera na lotu ena mataka ni Sigatabu baleta ni rau a cici ki na nodrau itikotiko na daukaulotu me laki kau mai na madrai kau a bulia vei rau!
Na Kalou e raica tu na noda sasaga ni da segata me da muria na Nona ivunau. E dina ga ni da vakacalai ena so na gauna, sa lomani keda o Koya ka na vakarautaka na sala eso meda rawaka kina—ena gauna madaga me da yaco donu kina ki valenilotu.