Veivuke ni Veisusu
Na ka e Vakavulica vei Au na Tataviraki me baleta na Bula Vakaitubutubu
Na dauvolaivola e vakaitikotiko e Utah, Amerika.
Na nodratou itavi na luvequ sa vukea na saumi ni noqu masu.
Droini mai vei David Green
Au a yadra ena dua na mataka ka vakila tu na luvuci ni lomaqu. Na noqu itavi vaka-itubutubu sa bibi sara, kau sa kidava dei tu na noqu malumalumu. E vaka e tiko e dua na laqa levu ena sala au nanuma tu me vaka e dua na itubutubu kei na kena au sa vaka dina kina.
Au a tekiduru ka masu ka tukuna vua na Tamada Vakalomalagi na levu ni noqu lomani Koya. Au tukuna Vua na levu ni noqu lomani ira na gone e sa vakalougatataka kina o Koya na neitou matavuvale. Kau sa tekivu tukuna Vua na sala au sa tovolea tiko kina meu dua na itubutubu vinaka, ka vakila tu niu sega ni vakayacora vinaka sara tiko. Niu masu tu, au vakasamataka na sala era na vinaka cake sara kina na luvequ kevaka a susugi ira ga vakai Koya na Kalou.
Qai votu mai e dua na ivakatakarakara. Au raica na luvequ ni ra taviraka tiko na fuloa ni valenikuro. Oqo e dua ga na cakacaka e vuqa era sa lesi ni cakava me vukea na neitou matavuvale. So na gauna na nodra raici ni cakava tiko e dau vakavuna meu sokunu baleta ni ra se vuli tiko ka calata e levu na tikina. Ia au vakalaiva me ra cakava, vaka kina na cakacaka tale eso e veisiga, baleta ni tiko vei au e dua na tatadra levu sara me baleti ira. Au kila mai na vakatovotovo tawataucoko kece oqo, era na vuli ka tubu kina. Kena itinitini, era na rawa ni cakava vakatotolo ka vakavinaka sara me vaka au rawata. Na tatadra oqori ni kena yaco tu me ra tamata nuitaki ka rawati ira vakai ira esa vu ni marau vakalevu sara mai na kena ke meu a cakava na ka kecega vakai au. Au sega ni susu gone tiko ki na rawaka vakalekaleka—Au saga tiko meu vukei ira me ra rawaka sara ena ilakolako balavu.
Kau vakananuma de rairai sa dina tu e dua na ka vakaoqo kivei rau talega na noda itubutubu vakalomalagi. Sa kila tu na Tamada Vakalomalagi ni da sega ni rawa ni cakava e dua na cakacaka vinaka sara vakaitubutubu. Eso na ka eda cakava e rawa ni vakavuna vei Koya me sokunu, ia e vakatara tu baleta ni kila o Koya ni da sa vuli ka tubu tiko. Sa tiko vua na ivakarau ni rai balavu duadua. E raitayaloyalotaki keda o Koya ni yaco tu me dua na itubutubu vakataki Koya ena dua na siga, rawa ni loloma tu vakataucoko, veivakavulici tu vakavinaka, ka ivakaraitaki vinaka sara. Ni da sakasaka tu, sa kila o Koya ni da sa taracake tiko na ivakarau eso vaka na vosota kei na loloma cecere. Ia oqo, ena Nona vuku, sa vakalaiva o Koya meda cakacaka ka druka ka tovolea tale.
Au sa diva dina meu dua tu na itubutubu vinaka sara! Me vaka a vola o Josefa Simici, au dau raica niu lutu tu “ki na vuqa na ka lialia” (Josefa Simici—Ai tukutuku 1:28). Ia au kune vakacegu niu kila ni sa kila vakamatata tu na Kalou na yaloqu, ka kena ibalebale ni sa kila o Koya niu sa tovolea tiko meu na dau vakavulici rawarawa. Au yalo reki ni ra taroga na luvequ, “E rawa cakava niu cakava oqo vakavinaka cake ?” ka vinakata tu me vakavinakataka. Sa rawa tu mada ga meu na vakakina kivua na Tamada Vakalomalagi.
Ni ra veisiriyaki tu ena noqu vakanananu na vakasama eso oqo, sa dua tale na gauna ni noqu yalolailai. “Ia vakacava ke vakayalolailaitaki ira na luvequ na noqu caka cala vakaitubutubu?” Au a taroga. “Au sega ni vinakata ni dreti ira lesu, kevaka mada ga au sa dua tu na ka totoka ena kena ka oya.”
Vakadua tale, sa basika mai na ivakatakarakara ni nodratou sasamaki na luvequ. Ni oti na nona tovolea vagumatua na luvequ yalewa me qua na fuloa ka qai vakusakusa yani ki qito se vakacavara e dua tale na itavi, au dau savata tu na vo ni tikina drakidrakita. Kau vakasamataka na loloma veivueti tawayalani kei na kaukauwa i Jisu Karisito, ka sa ubia tu na veituvaki drakidrakita na bula ni tamata kecega na Nona Veisorovaki. Na nona loloma soliwale sa sosomitaka na noqu malumalumu vaka-itubutubu, me vaka ga na kena sosomitaka na mosi era sotava na luvequ na Nona loloma soliwale ena vuku ni noqu malumalumu. Ena sala e sega ni dua vei keda e rawa ni kila rawa, na Nona Veisorovaki sa rawa ni vakabula taucoko sara.
Au yalovakacegu vakalevu ena noqu ivakatakila au a ciqoma ena siga oya. Au vakila ni vakavulici au na Yalotabu ni sa veirauti na noqu sasaga vinaka duadua, ni duavata tu kei na Turaga. Au kila ni na tomana na Tamada Vakalomalagi me cakacaka tiko ena nodra bula na luvequ, vakalalai ena veigauna, me cakava vinaka sara na ka au dau cakava vakaca. Ena Nona veivuke, sa rawa ni ra caudre ena dua na siga na luvequ ena nodra dui dodonu, ena kena ramase me vaka ga e a susugi ira kina na Tamada Vakalomalagi ena matai ni gauna. Ia sa yaco talega me veisautaki au na Nona ituvatuva ena ka oqo—ena noqu vakasavasavataki ka tuliraki meu vakataki Koya vakalevu cake. Sa ka levu vakaidina na vuku ni noda Kalou!