Guti tu na Taucoko i Karisito
Mai vei Elder Jeffrey R. Holland
Ena Kuoramu ni iApositolo Le Tinikarua
Mai na dua na vosa ena lotu raraba ni itabagone qase cake, “Na iVakarau ni Tuvaki ni Taucoko i Karisito,” ka soli e Stanford, California, Amerika, e nai ka 9 ni Feperueri, 2020.
E na Siganimate oqo, gole yani kivei Jisu Karisito ka vaqara na Domona veivakadeitaki ni vakacegu.
Be Not Afraid, by Michael Malm
Meu bau solia mada e vica na vakasama me baleta na lalawa yadudua o ni na vakayacora mo ni na vakasaqara kina “sinai sara” ni ituvaki kei Karisito (raica na Efeso 4:13). Au nuitaka ni ra na bau yaga vei kemuni ena gauna oqo ni nomuni tubu ena nomuni bula kei na vei ituvaki ni bula ko ni tu kina.
Eso vei kemuni o ni sa tiko ena vanua o ni vinakata, se mo ni kila na vanua o ni vinakata mo ni lakova ena nomuni bula. Eso vei kemuni e vaka me levu sara na veivakalougatataki kei na digidigi vakasakiti e tu e matamuni. Eso vei kemuni e vakila, ena dua na gauna ena vuku ni so na inaki, ni kalouca ka vica wale ga na sala vinaka e davo koto e matamuni.
Ia se vanua cava ga o lako tiko kina ka o walia vakacava na nomu bolebole mo yaco rawa kina, au sa kerei iko mo lako vua na iVakabula, o Jisu Karisito, me baleta na imatai ni kalawa ki na nomu icavacava, na nomu kunea na nomu marau kei na kaukauwa yadua, ka rawata na nomu icavacava cecere kei na gumatua (raica na 1 Nifai 10:18; 2 Nifai 26:33; Omanai 1:26; Vunau kei na Veiyalayalati 18:11).
Na veika kece oqori e rawa ni nomu ke isau ni taro na “Ko sa lako kivei?” (Mosese 4:15) sa ikoya “Na vanua cava ga oNi tu kina, Turaga.”
E rawa ni veibolei na bula. Sa tu vei keda na mosi kei na veivutuni kei na leqa dina me da cakacaka taka. Eda sotava na nuinuicala kei na rarawa, na veimataqali tubu kei na siro kecega. Ia na Turaga kei ira na parofita era sa tukuna oti e vuqa sara na vosa ni veivakayaloqaqataki ka na rawa ni vakasinaita e dua na ivolaniveisiga me baleta na ivakarau me sotavi kina na vei leqa oqori.
“Na Vakacegu Au sa Laiva Vei Kemudou”
Na isogomasu ni iVakabula vei ira na Nona tisaipeli ni sa torova tiko yani na mosi kei na yaluma kei Kecisemani kei Kalivari sa mosimosi duadua vei ira na veivosa oqori. Ena bogi oya, na bogi ni rarawa levu duadua ka sa mai yaco ena vuravura oqo se ena yaco tikoga, ea kaya na iVakabula: “Au sa laiva vei kemudou na vakacegu, au sa solia vei kemudou na noqu vakacegu. … Me kakua ni rarawa na yalomudou se rere.” (Joni 14:27).
Sa dua na rai veivakurabuitaki dina ni bula ena gauna ni yalumabibi titobu duadua! Ena rawa vakacava Vua me kaya oya, ni sotava tiko na veika e kila oKoya ni sa sotava tiko? Sa rawa ni kaya oKoya oya baleta ni Nona na Lotu kei na kosipeli ni itinitini mamarau! Vei keda, sa rawati oti na qaqa. Sa taura tu oKoya na rai balavu; sa wasea tiko oKoya na iyaloyalo levu.
Au vakabauta ni so vei keda, meu kaya mada, e sa tu ga vei keda na vakasama makawa ka ivovo ni vakanananu vaka Puritan ka kaya ni cala me da vakacegui se vukei, ni sa dodonu me da rarawataka tiko e dua na ka e veigauna kece. Au vakaraitaka ni “mo dou vakacegu” (Joni 16:33) ena vakasaqarai ni “ivakarau sa sinai sara kei Karisito” (Efeso 4:13) e rairai ivakaro, vei ira mada ga na Yalododonu Edaidai yalodina, e dau beci raraba; ia e sa bau dua na ka rarawataki ki na Yalona dauloloma na Turaga.
E dina niu na kauwai kevaka ena dua na gauna ena nodra bula, e dua vei iratou na luvequ eratou na lomaleqa vakalevu se sega ni marau se talaidredre, ia ena levu cake sara na noqu vakataqayataki kevaka au kila ni ena dua na gauna vakaoqori e sega ni rawa vua na gone me nuitaki au meu vukea se me vakasamataka ni nona kauwai e kawale vei au se e sega ni taqomaki ena noqu veimaroroi.
Ena yalo vata oqori, au sa vakadeitaka kina ni sega ni dua vei keda e rawa ni kilavinaka na titobu ni vakamavoataki ni yalona loloma na Kalou na Tamada se na Luvena, na iVakabula kei vuravura, ni Rau kunea ni ko ira na tamata era sega ni yalodei ena Nodrau veimaroroi se taqomaki ena Ligadrau se vakararavi ki na Nodrau ivakaro. Kemuni na noqu itokani, me baleta na kena ibalebale duadua ga oya, sa noda itavi kina me da mamarau!
Sa “Rauti keda na Nona Loloma.”
E dua tale na tiki ni ivakasala me baleta na vakasaqarai ni Karisito kei na ivakarau ni nona taucoko e a yaco ni sa vakayacora oti o Jisu na cakamana ni vakani na 5,000 mai na lima na ibuli madrai ka rua na ika (raica na Mathew 14:13–21). (Ia, mo kakua ni leqataka ni sa na oti mai na cakamana ni Karisito me vukei iko. Sa “rauti keda na Nona loloma” [2 Korinica 12:9]. Oya e dua na lesoni vakayalo ka tawamudu ni cakamana oqo. E levu tu na Nona veivakalougatataki me rauti keda kece ka vo tale tu e vica vata na basikete sinai! Mo vakabauta ka marautaka na Nona isolisoli ni “madrai ni bula”! [Joni 6:35].)
Ni sa vakani ira oti na lewevuqa o Jisu, a qai talai ira yani oKoya ka vakavodoki iratou na nona tisaipeli ki na dua na waqa ni qoli me ra takoso ki tai ni Wasawasa o Kalili. E a qai “sa cabe taudua ko Koya ki na ulunivanua me masu” (Maciu 14:23).
Ni ratou sa biubiu na tisaipeli ena nodratou waqa, sa yakavi na vanua, ka sa voravora na bogi. E a rairai voravora na cagi mai na itekivu. Ena vuku ni cagi, eratou a sega beka ni vakarewa laca rawa ko iratou na tamata oqo ia eratou a guta ga na voce—ka dua na igu levu sara ena vakayagataki kina.
Eda kila oqo baleta ena gauna ni “ikava ni iwase ni bogi” (Maciu 14:25)—ena dua na gauna ena loma ni 3:00 ki na 6:00 ena mataka—eratou a sa qai toso ga me vica na maile (raica na Joni 6:19). Ena gauna oya sa coko na waqa ena dua na cava vakarerevaki dina.
Ia, me vaka ena veigauna, sa wanonovi iratou tiko na Karisito. Ni raici tiko na dredre e yaco tiko vei ratou, a taura na iVakabula na ilakolako vakadodonu duadua ki na nodratou waqa, e a yabe yani ena dela ni ua me lai vukei iratou.
Finisher of Faith, by J. Alan Barrett
“Dou Kakua ni Rere”
Ena loma ni nodratou taqaya titobu, eratou a rai yani na tisaipeli ena loma ni butobuto ka raica ena kurabui e dua na icurucuru cerecerebu ni lako voli yani ki vei ratou ena dela ni vuso ni waitui. Eratou a qolou ena domobula ena ka e ratou a raica, ka ratou nanuma ni sa dua na yalobula ena dela ni biau. Ia, mai na loma ni cava kei na buto—ni sa vaka me vakaitamera na wasawasa ka vaka me somidi na nodratou waqa—sa rogo mai na domo veivakadeitaki ni vakacegu mai vei nodratou iVakavuvuli: “Koi au ga; dou kakua ni rere”(Maciu 14:27).
Na itukutuku vakaivolanikalou oqo e vakananuma vei keda ni noda lako mai vei Karisito, ka vakasaqara tiko na Nona taucoko, se ena Nona lako mai vei keda me kauta mai na taucoko oya, na imatai ni kalawa ena vakasinaiti keda ena dua na ka e vaka sara ga na kidroa laveate. E sega ni dodonu, ia e yaco ena so na gauna. E dua vei ira na veibasai levu ena kosipeli sa ikoya sara ga ni ivurevure ni veivuke kei na veitaqomaki ka soli tiko vei keda sa ikoya talega na ka eda drovaka tiko, ena noda railekaleka ni bula oqo.
Se cava ga na vuna, au sa raica ni ra drovaka na papitaiso na dauvakatataro. Au sa raici ira na italatala qase ni ra drotaka na veikacivi ni kaulotu. Au sa raici ira na veidomoni ni ra drotaka na vakamau. Au sa raica na nodra dro na lewenilotu mai na veikacivi veibolei. Kau sa raici ira na tamata era drotaka na nodra lewe ni Lotu.
E vakavuqa eda dau drotaka sara ga na veika ena vakabulai keda ka vakacegui keda. E vakawasoma eda raica na yalayala ni kosipeli me dua na ka me da rerevaka ka biuta laivi.
O Elder James E. Talmage (1862–1933) e a kaya: “Ena yaco mai ki na bula ni tamata uabula yadua na veikasotavi me vaka na veivala ni dausoko tuleraki ena cava ka sotavi cagi veivorati kei na wasa rerevaki; e vakavuqa na bogi ni dredre kei na veika rerevaki e dau levu sara ni bera ni yaco mai na veivuke; ia ni oti, sa dau vakawasoma na veivuke veivakabulai e dau nanumi me dua na ka veivakarerei levu cake. [Ia,] sa yaco vei ira na [tisaipeli oqo] ena maliwa ni wai voravora, e sa lako mai vei ira kecega era sa cakacaka ena vakabauta, na domo i koya na Dauveisereki—‘Sa Au ga; dou kakua ni rere.’”1
Lako mai Vua
Na ka e totoka kina na veisureti oqo me da ciqoma na iVakabula, me da lako mai Vua ka guta na taucoko ni Kena ituvaki, sa ikoya ni rawa ni cakava e dua ga. E sega ni kena ibalebale oya ni o ira kece o kila era vinakata me ra muria na ivakaro, se o ira kece o sotava era muria tiko na ivakaro. Ia na ka e kena ibalebale sa ikoya ni sa rawa ni da muria na ivakaro ka sega ni tukuni me dua na kena isolisoli talei se ivotavota va kawa.
Au kerea vakagumatua na vakabauta e “taliva ka rarama ka savasava ka maucokona,” ka ko Karisito me “da kauta mai ki na noda itovonivanua,”2 ka na yaco na ivakarau kei Karisito me na vakasinaita sara na noda bula (raica na Efeso 4:13).
Ena bolei iko na bula. Ena yaco mai na veikadredre. Ena yaco na mosiniyalo. Era na mate na daulomani. Ia, na vanua cava ga o lako tiko kina, mo gole e taumada vei Jisu Karisito. Nanuma tiko ni Nona vakararawataki kei na Tucaketale e rawa kina na noda qaqa mai na dredre kei na mate. Cakava na nomu veiyalayalati kei Koya ka maroroya tiko ena nomu ilakolako.
Ena noqu malumalumu taucoko, kau vakadinadinataka, au tagica me da rawata “na ivakarau ni tamata sa sinai sara kei Karisito.” Au vinakata meu lako ki Vua. Au vinakati Koya, kevaka e rawa, me lako mai vei au. Kau vinakata dina na veivakalougatataki oqori vei kemuni kece sara.