Vakalivaliva Walega: Domodra ni Yalododonu Edaidai
Tuberi mai Vua na Turaga
Sa kilai keda na Turaga kei na ka sa dodonu vei keda ena gauna oqo.
iTaba mai vei Cody Bell
Giselle
Ni bera ni keirau vakamau, a cakacakataka tiko o André na nona PhD ka ciqoma e dua na itutu me cakacaka ena Univesiti e Michigan. Keirau a vakamau ka toki ki Michigan. Kena itinitini, sa tekivu sotava o André eso na leqa ena vanua ni cakacaka ka vinakata me veisau cakacaka.
Keirau se gone tu, keirau a se qai vakamau ga, ka keirau sega ni kila na ka me caka. Keirau mani nanuma me keirau masulaka.
André
Ena dua na siga, ena noqu gole yani ki na univesiti au a raica e dua na papa ka tabaki toka kina e so na cakacaka. Au a kerekere ki na tolu na vanua ni cakacaka. Ena dua na macawa, a soli tolutolu vei au na cakacaka.
Giselle
Keirau vakananuma na ka me keirau cakava. Keirau masu tale. E dua na itutu a tiko mai Igiladi, ia keirau vinakata me keirau tiko ga e Amerika. E dua e tiko mai Texas, kei koya kadua e tiko mai Maryland voleka ki Washington, D.C. Na cakacaka e Maryland e tiko ena NASA. Ko André e daunivakadidike, ka vaka me vanua vinaka o NASA me gole kina.
André
Ena neirau toki ki Maryland, au a draiva tiko ka moce ko Giselle. E sa mataka caca voli ena gauna au raica kina na valetabu e Washington D.C.
“Yadra cake! Yadra cake! O rawa ni raica?” Au a kaya vei Giselle. “E vaka e dua na valevakatui!”
Giselle
Au a tukuna vei André ni rawa ni keirau na lako ka sikova ena dua na siga. Keirau sega ni kila na cava oya. Ni oti e vica na siga na neirau yaco yani ki Maryland, au a gole ki na valenivola meu vakayagataka na initaneti meu vakasaqaqara cakacaka ka meu raica talega na noqu imeli.
E dua na marama ka cakacaka ekea a taroga na vanua au cavutu mai kina ni rogoca na irogorogo ni noqu vosa. Au tukuna vua ni o au mai Brazil ka tekivu sara me keirau veitalanoa. Na yacana o Edna. Au tukuna vua ni keirau a se qai toki ga mai Michigan ka tukuna na vanua keirau vakaitikotiko kina.
“Au tiko ena itabavale vata ga,” a kaya o Edna.
Niu lesu ki na valenivola ena siga ka tarava, a kaya o Edna, “Au marau dina ni o lesu mai. Au via sureti iko kei na watimu ki na vakayakavi ena noqu vale. ”
Au nanuma ni matalia oya baleta ni sega ni kilai au tu o koya. A qai kaya o koya, “Au a masulaki iko baleta niu a vakila e dua na ka talei dina ena noqu sotavi iko enanoa.”
Keirau a lako ki na nona vale ka kila kina ni se qai takali wale ga na watina. Ni oti na vakayakavi, a vakatagitaka o koya ena piano na, “Turaga, Meu na Muri Kemuni” (Serenilotu, naba 129). A kaya o koya ni sere taleitaki i watina ka a vakatagitaki ena nona veibulu. A qai tukuna vei keirau o koya baleta na yavu ni veivakabulai ka sureti keirau me keirau lako ki lotu vata kei koya.
Keitou a lako ki Lotu, ka ra veikidavaki mai na tamata ekea. Keirau mani navuca me gole ena Sigatabu ka tarava. Keirau a vakadonuya ni taura na lesoni ni daukaulotu. A dolele o Edna me tauri na lesoni ena nona vale. Ena lima na vula keitou a lako ki Lotu ena vei Sigatabu. Sa vakarautaki tu na lomai kei na yaloi keirau ki na papitaiso.
André
Ni sa kacivaki na neirau papitaiso, era kurabui kece na tamata. “Isa, drau sega tu ni lewenilotu?” era kaya. “Ia drau tiko eke ena veimacawa!” E sa vakasakiti na neirau papitaiso. Voleka ni ra tiko kina na tabanalevu taucoko.
Keirau a vauci ena valetabu e Washington D.C. ena dua na yabaki ki muri. Ni keirau lako ki na valetabu, keirau qai kila ni oqo na valevakatui keirau a raica ena sivia na dua na yabaki sa oti!
Giselle
Ni oti na neirau vauci ena valetabu, e levu sara na ka a sega ni toso vinaka.
Ni oti nai ka 11 ni Sepiteba, 2001, sa dredre sara me vakavoui na neirau visa. Au sa rarawa baleta niu a se qai rawa koroi walega mai na dua na koleji vakaitikotiko ka volakerekeretaka e dua na sikolasivi taucoko ena Univesiti e Maryland. A sega ni soli vei au na sikolasivi, kei na vale ni vakadidike ka cakacaka kina o André sa sogo tiko.
Keirau nanuma ni rairai sa yaco mai na gauna me keirau sa lesu tale ki Brazil.
André
A kaya vei keirau na neirau bisopi ni rawa ni keirau vukea e levu na lewenilotu e Brazil ka tubu ena sala eso e sega ni rawati tu e Amerika. A vakasalataki keirau o koya me keirau toka volekata ga na Lotu.
“Lako ki Brazil ka qarava na Turaga,” a kaya o koya.
Ni oti e dua na gauna e Brazil, a gole mai vale na neitou peresitedi ni iteki ka kacivi au meu veiqaravi vaka bisopi. Au a vakila tu niu na mai kacivi. Vica na bogi ni bera na noqu kacivi, au a sega ni moce rawa. Au a vakasama ka vuli tiko.
Giselle
Au vakananuma na cava sa yaco tiko. Au raica na veisau vua ni bera nona kacivi.
André
Niu sa tekivuna na noqu veikacivi, a tiko ena neitou tabanalevu e 80 na lewenilotu kaukauwa. Niu sa vakacegui, e vuqa tale sa mai lotu vakawasoma, ka ra gole yani ki na buturara e 12 na daukaulotu mai na neitou tabanalevu. Sa totoka vakaidina!
Mai na gauna au a vakacegui kina, a vakacegui talega o Peresitedi Dieter F. Uchtdorf mai na Mataveiliutaki Taumada. Au nanuma na nona kaya o Peresitedi Russell M. Nelson ni sa tiko vei Peresitedi Uchtdorf na ilesilesi vou ka bibi ena Kuoramu ni iApositolo Le Tinikarua.
Ni oti e tolu na vula, au a kacivi me imatai ni daunivakasala ena mataveiliutaki ni kaulotu. Au sega ni laki kaulotu, ia au taleitaka na noqu veikacivi. Au taleitaka na cakacaka vata kei ira na daukaulotu. Sa kilai au na Turaga. Sa kila tu o koya ni sa gadrevi meu vakacegui mai na bisopi me rawa niu veiqaravi ena gauna kei na vanua e sa dodonu tu vei au ena gauna oqo.