Sotava tiko ni Kaukauwa ni Matabete

O ira na marama ka veivuke ni liutaka na Lotu a tarogi ena sala e vakayacoka kina na kaukauwa ni matabete ki na nodra bula. Oqo eso na vakasama era a wasea.

Droini mai vei Matisse Hales

“E duidui ka tautauvata na bibi ni tavi eso e tiko vei ira na turaga kei na marama ena itikotiko kei na Lotu. Na kaukauwa ni matabete e rawa ni vukea na tamata yadua me vakayacora na veitavi oqori me yaga vei keda kece.

“Baleta ni sa tiko ena vuravura nikua na kaukauwa ni matabete ni Kalou, sa ka levu na veivakalougatataki e tiko kivei ira na lewe ni Lotu bula kilikili taucoko, se ra qase se gone, tagane se yalewa, tuduadua se vakawati.”

—Peresitedi Joy D. Jones, Peresitedi Raraba ni Lalai

“Na veiqaravi e vakalevutaka na yaloda, vakarabailevutaka na noda rai ka vakatarai keda ni rawata vakalevu cake na kaukauwa ni Kalou. Na Turaga sa kila tu oqo, sa vaka talega kina o Setani. Ena nona sasaga vakaukauwa sara me vakayawaki keda mai na kaukauwa ni Kalou, ena luvuca na lomada na vunica se vakavuna meda vakila ni ka sa dodonu meda solia e sega ni yaga. …

“… Kakua ni vakawalena na cakacaka ni yalovinaka.

“Mai na vakayacori nakiti tu ni veiqaravi vei ira na tani me tiki ni noda bula, eda na raica na veika vuni ni Kalou. Eda na raica na vakacegu, doudou tu, ka ciqoma na vakalevutaki ni kaukauwa ni da qarava na noda iVakabula, o Jisu Karisito.”

—Peresitedi Bonnie H. Cordon, Peresitedi Raraba ni Goneyalewa

“Dau vakavuqa, nodra vakatauvatani ira na marama ki na so tale. Ia e sega ni dua vei keda e loma vinaka ena veivakatauvatani oya. Na marama yadua e tiko na nona isole vakasakiti ni rawa-ka kei na taledi, ka sa isolisoli va-Kalou taucoko. Baleta ga ni daru sega ni tautauvata tu—se sega ni tautauvata e dua ga na iwiliwili ni marama—e sega ni vakavuna me da lailai sobu se levu cake. Sa gadrevi me da vakaraica na noda isolisoli ka vakatorocaketaka, ni nanumi tu o cei a solia mai vei keda, ka qai vakayagataki ira ena vuku ni Nona inaki eso. Ni da wasea na noda isolisoli me vakalougatataki ira na tani, eda sa sotava tiko na kaukauwa ni matabete ena noda bula.”

—Sister Jean B. Bingham, Peresitedi Raraba ni iSoqosoqo ni Veivukei

“Vakaraica wasoma na madigi eso me vakalevutaka na nomu kila matata na ‘ivunau ni matabete.’ Sa gadrevi meda na dui qara na kila matata oqo me baleti keda.

“Na vulici ni ivolanikalou kei na nodra vosa na parofita ni gauna oqo ena vakarautaka e dua na yavu vutuniyau me tubu kina na kilaka oqo. Sa vakakina na talairawarawa ki na ivakaro ni Kalou ka tudei tu ena bulataki ni veiyalayalati eda sa vakayacora ena cakacaka vakalotu ni matabete. Sa soli vei keda na kila matata e ‘na vosa ena vosa, na vunau ena vunau’ [2 Nifai 28:30]. Mai na noda ivakatakila, e sa ‘vakasavasavataka’ na yaloda ‘me vaka na tegu sa lutu mai lomalagi’ [Vunau kei na Veiyalayalati 121:45].”

—Sister Lisa L. Harkness, Matai ni Daunivakasala ena Mataveiliutaki Raraba ni Lalai

“Eda sa lako vakayadua tu. … Eda lako curuma na bolebole ni veimaliwai, bolebole vakailavo, kei na bolebole ni bula vakayago kei na vakasama. Eda lako curuma na ilesilesi veivakadrukai eso kei na ituvatuva ni ka meda cakava e veisiga. Eso vei keda e rairai lako curuma tiko na rarawa, se na galili se lomaocaoca. E duidui tu na noda bolebole, ia sa tiko vei keda kece.

“Na maroroi ni noda veiyalayalati e sega ni kena ibalebale ni na vagalalataki na veibolebole oqo, ia e kena ibalebale ni sa yalataka tu na Turaga me tiko vata kei keda.”

—Sister Michelle D. Craig, Matai ni Daunivakasala ena Mataveiliutaki Raraba ni Goneyalewa

“Au raitayaloyalotaka na kaukauwa ni matabete vaka e dua na wa duadua, matailalai, yagoyagovinaka vulavula e lako mai vua na Kalou ka wavivi eloma ki tuba, ecake ka wavolita, ka vaka ga e tiko na kena idusidusi vakaikoya ki na noda bula. Ia ni toso tiko na gauna e sa vakatakilai e dua na ivakarau ni tikina lalai levu. Na irairai oya e robota na icabocabo ni soro ni Kalou, na vanua tabu duadua eda vauca e vuravura ka vauca mai lomalagi. …

“Na gauna ga au raica kina e dua na isulu ni icabocabo ni isoro ena valetabu, au vakila ni sa dua na ivakatakilakila kaukauwa sara ena sala e dolea kina na Turaga na Nona kaukauwa vei ira na Luvena yalodina me rawa ni ra vakasokomuni ka vauci vata ena dua na irairai ni tikina lalai levu, ka vakalou.”

—Sister Sharon Eubank, Matai ni Daunivakasala ena Mataveiliutaki Raraba ni iSoqosoqo ni Veivukei

“Mai na veika au sotava ena noqu bula, au kila na muri ni vakaro ni Turaga, na vakabauta, kei na vakararavi vakaoti Vua sa sala eso eda rawata kina na Nona kaukauwa ni matabete. …

”… Ni da yalodina tikoga, sa rawa ni da ciqoma na kaukauwa ni matabete kei na veivakalougatataki oya ena ituvaki taucoko ni noda bula. E rawa ni vakarautaka vei keda na veitaqomaki, lomavinaka, kaukauwa, vakacegu, kei na yalayala era yacova tu na veigauna tawamudu. Mai na kaukauwa ni matabete oya, sa vukei au talega na Yalo Tabu meu nanuma lesu na veika e sotavi ena noqu bula e tomana tu me tara cake na noqu vakadinadinataka ka vakabauta na Kalou. ”

—Sister Cristina B. Franco, Karua ni Daunivakasala ena Mataveiliutaki Raraba ni Lalai

“Sa sivi na yabaki eso mai na gauna au a ciqoma kina na noqu veivakalougatataki vakapeteriaki, ia au nanuma vinaka tu na ka e sotavi. …

“Na ka e sotavi oya e sa taracake e vuqa na vakatulewa au sa cakava ena noqu bula taucoko. Au sa kila me rawa ni vakilai na veivakalougatataki era gadrevi tu oya, sa dodonu meu na vakayacora na noqu itavi.

“Au raica tu oqo ni se levu sara na ka e vinakata na Tamada meu ciqoma, e levu mada ga mai na ka e tukuni tu ena noqu veivakalougatataki vakapeteriaki.”

—Sister Becky Craven, Karua ni Daunivakasala ena Mataveiliutaki Raraba ni Goneyalewa

“Au a lewena Na Lotu i Jisu Karisito ni Yalododonu Edaidai ena yabaki 26. E dina ga ni tiko e lomaqu na lomavinaka niu vakamuria na gagadre ni vakalougatataki tu mai vua na Kalou ena vakayacori ni dua na veiyalayalati kei Koya, au kila ni noqu kila vakamatata na veiyalayalati oya e sa vaka ga e dua na sorenikau lailai ena gauna oya.

“Ni tasiri na veiyabaki kau sa cakava tiko e dua na sasaga meu maroroya na veiyalayalati ni papitaiso oya kei na veiyalayalati tale eso au sa cakava kei na Tamada Vakalomalagi, au vakila ni sa vakalougatataki au o Koya ena kila matata titobu sara me baleti Koya, baleta na noqu iVakabula, kei na noqu itavi vaka luvena yalewa ni veiyalayalati ni iTubutubu Vakalomalagi.”

—Sister Reyna I. Aburto, Karua ni Daunivakasala ena Mataveiliutaki Raraba ni iSoqosoqo ni Veivukei