Yavu ni Kosipeli

Sa Vakabulai Keda o Jisu Karisito mai na iValavala Ca kei na Mate

Ena vuku ni Nona solibula, sa noda taucoko na madigi meda kune vakacegu kei na reki tawamudu.

Eda cavubaleti Jisu Karisito me noda iVakabula. Oqori baleta ni a sauma o Koya na isau ni noda ivalavala ca ka ra-wa na kaukauwa ni mate. Sa vakabulai keda o Koya! Na Nona solibula ena vukuda, vakatokai na Veisorovaki, sai koya na ka bibi duadua e sa bau yaco. Ena Vukuna, sa sega ni icavacava na mate. Ena Vukuna, sa rawa ni da vosoti ena noda ivalavala ca, savasava tale tu, ka tubu vinaka cake ena veisiga yadua.

O Jisu Karisito na Ulumatua

Ni bera na lako mai ki vuravura, eda a bula vata tu kei na noda itubutubu vakalomalagi. Ni sa Ulumatua, a veivuke o Jisu Karisito ni bulia na vuravura totoka oqo. A digitaki o Koya me noda iVakabula ka vakadonuya me mai sucu e vuravura me rawa ni dua tu na ivakaraitaki vinaka sara, vakatavulica na Nona kosipeli, ka vakacavara na Veisorovaki ena vukuda.

Sa Sauma o Jisu Karisito na Noda iValavala Ca

Ni sa kila o Jisu ni sa na vakarau mate, a lako o Koya ki na dua na were ka vakatokai ko Kecisemani me masu. Ena loma ni masu o ya, sa tekivu me sauma o Koya na isau ni noda ivalavala ca. A yalorawarawa o Koya me vakararawataki me da kakua kina ni sotava, kevaka eda veivutuni. Ni da gole tani mai na noda ivalavala ca ka muria tu na iVakabula, sa rawa ni da kunea na veivosoti kei na veivakabulai. Ena dua na sala eda sega ni kila vinaka sara, sa kila vakamatata sara tu ga o Jisu na ivakarau ni noda bula yadua. A vakila o Koya na noda rarawa, mate, kei na mosi kecega. Oqo na matai ni tiki ni Veisorovaki.

A Ra-wa na Mate o Jisu Karisito

Ni oti na Nona masu e Kecisemani, a soli yani o Jisu, vesu, ka totogitaki me mate ena kauveilatai. E dina ga ni sa kaukauwa-vakaoti o Koya, a vakatarai Koya o Jisu me mate ena kauveilatai. Era a vakotora na Yagona ena yalololoma na Nona imuri ena dua na qaravatu. Era sega ni kila ni dina ga ni sa mate na Yagona, a se bula tikoga na Yalona ena vuravura ni yalo. Ni oti e tolu na siga, sa bula tale mai o Jisu ka sikovi ira, ka vakadinadinataka tu ni sa rawa ni ra-wa o Koya na mate. Me vaka ni sa tucake tale o Jisu, eda na bula vakayadua tale ni oti na noda mate. Sa vakacavara tu oqo na Veisorovaki.

Na Bibi ni Siganisucu kei na Siganimate

Era marautaka e levu sara e vuravura e rua na olidei e vukei keda ni vakananuma na Veisorovaki i Jisu Karisito. Ena gauna ni Siganisucu, eda nanuma ena vakavinavinaka ni a yalorawarawa tu ko Jisu me ciqoma na ilesilesi ni lako mai ki vuravura, e dina ga ni oka kina na veivakararawataki kei na mate ena vukuda. Na Siganimate e marautaka na qaqa ni iVakabula mai na ivalavala ca kei na mate, ka sa solia vei keda na inuinui ki na dua na reki tawamudu ena veisiga ni mataka.

Na Cava e Tukuna na iVolanikalou me baleta na Veisorovaki ni iVakabula?

Me vaka ni kilai keda vakavinaka sara o Jisu, sa rawa ni “vukei,” keda o Koya (raica na Alama 7:11–12).

Era vakadinadinataka na parofita ni gauna makawa ni na kila vakamatata na iVakabula na noda rarawa kei na yaluma (raica na Aisea 53:2–5).

Sa talai Jisu mai na Kalou me vakabulai keda baleta ni sa lomani keda vakayadua na Kalou (raica na Joni 3:16–17).

A masulaki ira na Nona imuri o Jisu, oka kina o keda, meda taqomaki mai na ca ka duavata kei Koya kei na Tamada Vakalomalagi (raica na Joni 17).

Sa sureti keda na noda iVakabula meda muri Koya ka lesu ki na Nona iserau (raica na Vunau kei na Veiyalayalati 19:16–19, 23–24; 132:23).