Itulau i le lotoifale
Faamanatuina o le Aso Fanau 100 Tausaga e Tagata Matutua o le Taua WWII ma Taitai Muamua o le Ekalesia
O le 100 tausaga o Len Hurley e faamanatu ma faamamalu ai se soifua tamaoaiga.
Ia Aokuso 2020, i le ogatotonu o le sasao o le fa’ama’i, na faamanatu ai le 100 tausaga o le soifuaga o Len Hurley ma se soifua o auaunaga—i lona aiga, atunu’u, ma tagata o Le Ekalesia a Iesu Keriso o le Au Paia o Aso e Gata Ai.
I le faamalosia o le tapunia o Victoria ona o le KOVITI-19 o lona uiga ua leai fo’i ni asiasiga mai aiga ma uo, ae peita’i o le aufaigaluega a le au tausima’i i Len’s Bentleigh East na latou faamautinoa o se aso faapitoa lenei mo Len, na teuteuina le fale i paluni ma o latou faia se keke e faaautu i togala’au e faasoa atu ma isi o lo’o nonofo ai i lea nofoaga.
Na faatasi ai le aiga o Len i le faamanatuina o le aso fanau e ala i le Zoom. O tusi mai le Tupu Tama’ita’i ma le Palemia na tuuina atu fo’i i le tamā selau tausaga.
Sa matou fesili i ai i se mea lilo o le umi o lona soifua, ae faapea mai Len o le ki, o le ola lea i tulaga faatulagaina o le soifua maloloina a Le Ekalesia a Iesu Keriso o le Au Paia o Aso e Gata Ai ma ola malosi.
Fai mai Len “Ola lelei, aua le taumafa ava, aua le taumafa tapa’a ma a’oa’o e fiafia e galue.”
Na soifua mai Leonard Hurley i Murtoa, Victoria. Na soifua a’e o ia i le faatoaga a lona aiga, lea sa galue malosi ai ma sa tele fo’i lo la ulavavale ma lona uso masaga, o Ken, ma lona uso laitiiti o Russell.
Ina ua amata le taua lona lua o le lalolagi, na naunau lava Ken ma Len e auauna atu ma avea o tagata o le vaega’au i se taimi vave. Na auauna atu Len i le vaega e 9th Division Cavalry (tanetau) mai le 1938 i le 1948, tau i Aikupito, El Alamein, Syria, ma Borneo.
O ia o se tagata o le Ekalesia Egelagi i le taimi lea, o se tasi o a’afiaga o Len e le mafai ona faagaloina i Sasa’e Tutotonu o sana malologa lea mo le lua aso i Ierusalema.
O lona a’afiaga i le taua na vave lava ona a’oa’oina ai o ia i le ma’ale’ale ma mea taua o le olaga. I se tasi osofa’iga, na faatonuina ai e le ta’ita’i o Len o ia e fana le tanetau faapafana a Italia. Na sese le mea na o’omi e Len, ma tu faafuase’i ai le tanetau. Na ave’esea i latou uma na i ai i luga o le tanetau, ae sui atu i ai le isi vaega. E le’i umi mulimuli ane, na lavea ai le tanetau ina ua fana e le tanetau a Italia ma maliliu uma ai tagata sa i totonu.
Na manatua e Len, “O se a’afiaga le matagofie,” “Se manū faapenei ou te lē o i iinei i le asō pe ana ou le o’omia le faamau lea.”
Ou te faafetai ua faasaoina a’u mai le taua i Sasa’e Tutotonu, na toe fo’i mai Len i lona aiga ma faaipoipo atu ia May, o le alofa o lona olaga, i le tausaga 1944.
Fai mai Len, “Sa masani ona faigaluega May i se faleoloa i Murtoa, e latalata i le mea na matou nonofo ai. E masani lava ona ou fai ia te a’u lava, o le a ou faaipoipo i le teine lea. O le olaga faaipoipo o se olaga matagofie.”
E to’atasi lo la afafine o Rhonda i le 1951, na maliu faafuase’i o ia a’o avea o ia o se tagata talavou matua, ae tu’u ai si ana tama teine o Chantelle. O lo’o nofo nei Chantelle ia Len ma May i lo la fale ma lona to’alua e le’i faaipoipo ma le lā fanau e to’alua o, Ky ma Remi. Sa ia fai mai, o le olaga o lona tamā matua o se olaga o le auaunaga.
Fai mai Chantelle, “O le tele o le taimi e alu ai e fai auaunaga mo isi tagata. Ou te masalo ua toeitiiti lava uma fale o tagata na ia valia i isi taimi, e fiafia tele o ia e galue malosi.”
E le’i leva ona maliu Rhonda, ae maua loa e Len ma May le faamoemoe i se savali na aumai i lo la faitoto’a e ni faifeautala’i o Le Ekalesia a Iesu o le Au Paia o Aso e Gata Ai.
Na fai mai Len, “E tele se ese’esega na o’o mai i o ma olaga. Ua ou misia le alu i le Aoga Sa i lenei tausaga, ae ou te faalogologo i sauniga ua uma ona pu’e i le Zoom i vaiaso uma.”
O se tasi o a’afiaga e sili ona pele ia te ia i totonu o le Ekalesia, o le auauna atu lea o le a avea ma se epikopo o le uarota a Moorabbin mo le tolu ma le afa tausaga.
Na saunoa Len, “O se a’afiaga sili ona matagofie o le agavaa lea e avea ma epikopo.”
E ui lava sa ia faasoa fo’i ni a’afiaga o le maliu, e aofia ai le maliu o isi ana uo matutua o le taua, uso, to’alua ma lona afafine, na faaauau lava e Len ona maua le olioli i lona feso’ota’i lea i le afafine a lona afafine, fanau a fanau a lona afafine e to’alua, uo ma tagata o lona aiga faale-ekalesia.
Sa tumau pea fo’i lona malosi e gaoioi ma fiafia e fai mea e fiafia i ai, e aofia ai le kuka, faitogalaau, ma e lē misi ma le taaloga lakapi faa-Ausetalia, tusitusi i lana tusi tala’aga i aso uma ma faitau tusi.
Na toe tomanatu Len ma faapea mai, “Ou te lagona le faamanuiaina i le i ai o le ola ma le olaga na ou maua. Sa matuā ou olioli ma fiafia i le olaga, uo lelei, ma taumafai e aua le taumamao ese mai ma mea e fai i le mea e mafai ona ou faia. O le olaga e faataua le ola ai.”