Sau, Mulimuli Mai ia te A’u
Pe Na Oo Mai Faaaliga mai le Atua?
Mataupu Faavae ma Feagaiga 67–70
21–27 Iuni
Novema 1831: Sa faalogo ma le totoa William E. McLellin a o saofai o ia i se konafesi a le Ekalesia faatasi ma Iosefa Samita ma nai isi toeaiina. Na o ni nai aso na muamua atu, na tuuina atu ai e Iosefa ia te ia se faaaliga lea na taliina ai ni fesili se lima ia sa na’o le Atua lava na faasoa atu i ai e William (tagai Mataupu Faavae ma Feagaiga 66). Sa tonu i tagata o le ekalesia i le konafesi, e lolomi faaaliga a le perofeta i se tuufaatasiga na taua o le Tusi o Poloaiga (lea na taua mulimuli ane o le Mataupu Faavae ma Feagaiga).
O le luitau: Sa lei talitonu nisi o toeaina e faapea o faaaliga na aumai mai le Atua. Sa latou manatu sa lei lava le faatamalii o le gagana. Ina ia tali i lena faaupuga, na tuuina mai ai e le Alii se lui: “Tofi atu ia te ia o le ua sili ona atamai i totonu o outou” e tusi se mea e “faapei o” faaaliga. Afai e mafai e se tasi ona fai lena mea, e le mafai e toeaiina ona fai mai o faaaliga e le moni. Afai e le mafai e se tasi, sa manaomia e toeaina ona “molimau” o faaaliga na mai le Atua (tagai Mataupu Faavae ma Feagaiga 67:5–8).
O le taunuuga: O William, o le sa avea ma se faiaoga, na ia talia le luʻi a le Alii ma taumafai ai e tusi se faaaliga. Na te lei mafaia.1 O le toilalo o William na faamalosia ai lana molimau ia Iosefa Samita o se perofeta. Faatasi ai ma isi toeaina i le konafesi, na sainia ai e William se faamatalaga na folafola atu ai na ia iloaina “e ala i le Agaga Paia” o faaaliga na “tuuina mai e ala i le musumusuga a le Atua” ma e “aoga mo tagata uma ma e mautinoa lava e moni.”2