E Faafeiloai atu i Lenei Lomiga

O Le Auala e Faamalosia ai e le Talalelei o Tatou Aiga

I ni nai tausaga ua mavae, sa tonu ai i lo matou aiga e tapena a matou ato, tuua lo matou fale, ma o atu i se malaga i fafo atu o lo matou atunuu. A o matou saunia mo lenei malaga, sa matou fefautuaai soo faatasi e faamautinoa ai sa matou lotogatasi uma i la matou faaiuga talu ai o le a eseese tulaga e aafia ai i matou taitoatasi.

E faaopoopo atu i le tapenaina mo o matou manaoga faaletino, sa matou talanoaina le ala o le a matou “tapena” ai mo o matou manaoga faaleagaga e ala i le aumaia o a matou mausa o le tatalo, suesue i tusitusiga paia, ma le auai i le lotu. A o matou nonofo i eria eseese, sa matuai faamanuiaina lava i matou mai le auai i le lotu i nofoaga e matuai ese lava mai le mea sa matou masani ai ma le fesootai ma le Au Paia o e sa nonofo ai iina. I le itulau e 22, e mafai ona e faitau ai e uiga i se tasi o na nofoaga, o Dubai, ma mea sa lei faamoemoeina mai i amioga mama sa matou mauaina i o matou tuaoi Musolemi.

O lo tatou auai i le Ekalesia ua fatuina ai se upegafesootai o le alofa ma le lagolago, o se aiga o le talalelei lea e avea ai i tatou uma ma se vaega. O lo’u tuaoi o Jamie o se faataitaiga maoae o le auauna atu i la’u fanau. Mo se faataitaiga, ina ua faatalitali la’u tama teine e ulufale i le nofoaga autu e aoao ai faifeautalai ma sa ou faigaluega i le ao, sa ave o ia e Jamie i le malumalu mo ni nai taimi sa le’i mafai ona ou alu ai.

I le itulau e 16, e mafai ona e faitau ai e uiga i isi auala e lagolago ai matua e ala i le auauna atu.
I le itulau e 8, e mafai ona e faitau i le fautuaga a Elder Jeffrey R. Holland e uiga i le tausia o a tatou fanau ia latalata mai ia i tatou.
I le itulau e 12, e mafai ona e faitau ai e uiga i auala e faaleleia atili ai au fonotaga faaleaiga.

Fiafia i lenei lomiga a o e mafaufau pe mafai faapefea ona e faaaogaina mataupu faavae o le talalelei e fesoasoani ai i le aoaoina o lau lava fanau ma isi ua i ai i lou olaga.

Ma le faamaoni lava,

Carol Chomjak