2021
O le Aiga Atua ma le Alolofa i Isi
Iuni 2021

Mo Matua

O le Aiga Atua ma le Alolofa i Isi

Ata
illustration of Godhead

Matua Pele,

O le lomiga o le masina lenei e aofia ai autu e pei o le aiga Atua, le matafaioi a matua, faamagaloga, ma le auauna atu i fanau uma a le Atua—e tusa lava po o fea latou te o mai ai pe o fea foi latou te o i ai. O tusiga o loo i lalo e mafai ona fesoasoani ia te oe a o e aoaoina nei mataupu faavae i lou aiga.

Talanoaga o le Talalelei

O Le Aiga Atua

Faaaoga le “Faavae o le Talalelei” i le itulau e 6 e aoao ai lau fanau e uiga i le aiga Atua. O a matafaioi a le Tama Faalelagi, Iesu Keriso, ma le Agaga Paia? E faapefea ona Latou galulue faatasi e faataunuu o Latou faamoemoega? E mafai faapefea e lou aiga ona galulue ma le lotogatasi sili atu e ausia ai mea tetele?

Fonotaga Faaleaiga

Ua aoaoina i tatou e faapea o fonotaga faaleaiga e manaomia i taimi uma ma e faavavau (tagai i le M. Russell Ballard, “Fonotaga Faaleaiga,” Liahona, Me 2016, 63). O loo tuuina mai i le tusiga o loo i le itulau e 12 ni isi o taiala mo fonotaga anoa faaleaiga. E ono mafai faapefea e lou aiga ona faataitai i latou?

Tulaga faamatua

I le itulau e 8, ua faasoa mai ai e Elder Jeffrey R. Holland o le Korama a Aposetolo e Toasefululua le auala na ia aoaoina ai se lesona taua e uiga i le faalatalata atu i lona atalii. Mafaufau e faitau faatasi ma lou toalua lenei tusiga, ma talanoaina pe mafai faapefea ona e tausia lelei lau fanau ia latalata atu i o oulua loto.

Aapa Atu i Tagata Sulufaʻi

Ua talosagaina i tatou ia auauna atu ma le agaga tatalo i tagata o e ua faaaunuua, e aofia ai le au sulufai, o loo nonofo i o tatou nuu. Faitau mau o loo i le itulau 18. Talanoa po o a mea e manaomia e tagata i la outou eria, ma fai ni fuafuaga e auauna atu ai ma faauo atu ia i latou.

Lagolago mo le Sau, Mulimuli Mai ia te A’u

Tagai i itulau 34 – 37 mo mea e lagolago ai suesuega o le Mataupu Faavae ma Feagaiga a lou aiga i le masina lenei.

Fiafiaga i Suesuega Faaleaiga

Vili mo sina Minute

Mataupu Faavae ma Feagaiga 64:33

  1. E nonofo uma tagata i se lio. Talanoaina ni faatinoga laiti o le agalelei e mafai ona fai e le tasi mo le isi.

  2. Tuu se penitala i le ogatotonu o le lio.

  3. Ia auauai i le viliina o le penitala.

  4. Po o ai lava e faasino i ai le penitala, e tatau ona faatinoina le tele o mea agalelei e mafai ona faatino i le minute e tasi.

  5. Ia faaauau seia oo ina tofu tagata taitoatasi ma se avanoa se tasi.

Talanoaga: O a ni faatinoga o le agalelei e mafai ona tatou faia mo o tatou tuaoi, tagata o le uarota, i tatou lava? E mafai faapefea e ni faatinoga laiti, faatauvaa ona oo atu ai i mea tetele?

Mulimuli i le Perofeta

Mataupu Faavae ma Feagaiga 69

Na tofia Oliva Kaotui e aveina atu tusitusiga o le Tusi o Poloaiga i Initipene, Misuri. Na fetalai le Alii ia Ioane Uitimera la te o faatasi (tagai Mataupu Faavae ma Feagaiga69:2).

  1. Faafoliga na poloaiina oe e le Alii e tuuina atu tusitusiga o le Tusi o Poloaiga (lea na avea mulimuli ane ma le Mataupu Faavae ma Feagaiga).

  2. O le a le mea e tatau ona e faia e tausia ai lenei tusi taua?

  3. Mafaufau i se taimi na faatuatuaina ai oe e se tasi e faataunuu se galuega taua.

  4. O a ni laasaga na e uia e faataunuu ai le galuega?

Talanoaga: Aisea e taua ai le mulimuli i le taitaiga a taitai o le Ekalesia? E mafai faapefea e le mulimuli i lo tatou perofeta ma isi taitai o le Ekalesia ona puipuia i tatou?

Sailiga Oa o Tuaa

Mataupu Faavae ma Feagaiga 69:8

Na fetalai le Alii ia Ioane Uitimera e ao mai ma faamaumau se talafaasolopito o le Ekalesia, “tusitusi, ma kopiina, filifili, ma maua mai mea uma o le a avea mo le lelei o le ekalesia, ma tupulaga faiae” (Mataupu Faavae ma feagaiga 69:8). Matau le taua o le tausia o faamaumauga i le Ekalesia.

  1. Saili se tuaa i le FamilySearch.org po o nisi faamaumauga o talafaasolopito o aiga.

  2. Faitau ana api o talaaga po o ni manatuaga o le aiga e uiga i lenei tagata.

  3. Tau mai ni upu lelei e uiga i lou tuaa.

  4. O faapefea ona e fiafia i ou tuaa?

  5. E faapefea ona pei nei faamaumauga o se oa ia te oe?

Talanoaga: Talanoa e uiga i mea ua faataunuuina e ou tuaa. Ia talanoaina pe na faapefea ona faamanuiaina lou olaga i o latou olaga. Faasoa atu auala e faapei ai lou olaga ia i latou. Talanoa e uiga i auala e ese ai lou olaga mai ia i latou.

Lolomi