Na o Tusiga Faatekinolosi: O Leo o le Au Paia o Aso e Gata Ai
O lo Tatou Tafatolu Atoatoa o le Faamoemoe ma le Faamalologa
Na itiiti le faamoemoe na tuuina mai ia i ma’ua o le a tuputupu a’e le ma tama teine i le tulaga masani, ae o le faatuatua, anapogi ma tatalo, ma faamanuiaga faaleperisitua na faamaonia ai le sese o fomaʻi.
Ata na pu’eina e Leslie Nilsson
Sa matou fiafia uma lava i le fanau mai o Agatha i le 2015. O le a avea o ia ma fanau o fanau muamua a o’u matua. Sa sologa lelei mea uma se’ia o’o i le aso na fanau mai ai o ia. O ia o se pepe lapo’a, sa ou mafatia i ni faafitauli, ma sa tuai ona o’o mai le foma’i i le falema’i. Ina ua taunu’u o ia, sa tatau loa ona ia faaaogaina meafaigaluega [forceps] e ave’ese ai o ia. E oʻo mai i le taimi lena, ua maua o ia i le le lava o le okesene i lona tino.
Ina ua latou tu’uina Agatha i luga o lo’u fatafata mo sina taimi, sa ou manatu ina ia mafai ona ou faatofa atu. Ona o mai lea o tausimai ma aveese faanatinati atu o ia mo le iunite mo pepe faatoa fananau tigaina. Sa ou iloa mulimuli ane e faapea o lana sikoa i le Apgar, sa faaaoga e iloilo ai le tulaga aoao o se pepe faatoa fanau, sa na o le 2. O se sikoa o le 7 i le 10 ua mafaufauina o se mea masani.
Sa faaali mai e faata se vaega pa’epa’e tele i le fai’ai o Agatha, na faaalia ai le faaleagaina tele mai le leai o se okesene. Sa ta’u mai e foma’i afai e ola o ia, o le a mafatia o ia i le mafaufau loloto ma le le atoatoa faaletino ma e ono ma’imaliu.
Ina ua iloa e lo’u aiga le ogaoga o le gasegase a Agatha, sa tuuina mai le faatagaga i o’u matua ma matua faaletulafono e ulu atu ai i le iunite mo pepe e tigaina i taimi ese’ese e vaai ia Agatha ma faatofa atu ia te ia. O lo’u Tama ma lo’u tama faaletulafono, e aunoa ma le iloa e le isi, na tuuina atu e i laua taitoatasi ia te ia se faamanuiaga. Sa tuuina atu foi e lo’u toalua ia te ia se faamanuiaga. O lena Aso Sa sa matou faatulagaina ai se anapogi a le aiga mo ia.
Sa faaalu e Agatha ni aso se 11 i le falemai a o lei mafai ona ma aveina atu o ia i le fale. Mo ni nai masina, sa faia ai suesuega ma togafitiga o ia. Sa le mafai ona ia foloina ni meaai, sa le mafai ona minoi o ia, ma sa ia mafatia i ma’i tete. Sa latou ta’u mai ia te au o le a le minoi lava lona ulu, le savali lava, ma le tautala lava.
I le aluga o le tausaga na sosoo ai, sa faaauau pea ona ma tatalo ma anapogi mo Agatha, ma sa ma aveina atu o ia i se fomai e fesoasoani ia te ia e aoao e gaoioi. O le itu agavale o lona tino na matua aafia lava i lona mai o le le lava o le okesene. Sa mafai ona minoi lona lima taumatau ae le o lona lima agavale. Sa ta’u mai e fomai ia i maua o le alualu i luma o le a tuai. Ae i le mavae ai o ni nai faamalositino, na mafai ona ia faaminoiina itu uma e lua o lona tino. Na fai mai le fomai o se vavega lava. Ona sa vave lona aoaoina, o lea sa ia mafaufau ai pe aisea na matou aumaia ai o ia i le nofoaga i le taimi muamua.
O alualu i luma laiti uma na aumaia ai ia i matou le fiafia. E lei umi ae amata ona minoi le ulu o Agatha. Ona amata lea ona ia nofo i luga. Ina ua amata ona ataata o ia, sa matou iloa na tali mai lo matou faatuatua ma tatalo. Ma ina ua ia fai mai “Mama” mo le uluai taimi, sa ou lagonaina le olioli sili.
Sa maua le ma vavega e sili ona tele i lana siaki faaletausaga. O se ata o se faamaneta loloto (faata MRI) sa faaalia ai le leai o se vaega paepae i lona faiai. Sa le talitonu i ai lana fomai.
“O lenei faata e foliga mai e pei na sau mai se isi tamaitiiti,” sa ia fai mai ai, ma faatusatusa le ata fou i le ata muamua na faia ina ua fanau mai o ia. Sa ia talosagaina se kopi lona lua, ma fesili atu, “O le a le mea o loo tupu iinei?”
O le aso, o Agatha ua leai ni faaletonu o le mafaufau po o le faaletino, ma e na te le o toe inuina ni vailaau mo le ma’imaliu. O lana aoga latou te iloa o ia o se tamaitiiti e maualuga le atamai.
Ma te faafetaia le faamalologa o Agatha i le mea ua taua e lou tama “o se tafatolu atoatoa”: faatuatua, anapogi ma le tatalo, ma faamanuiaga o le perisitua mai i alii amiotonu. Ua matou iloa e alofa le Alii ia i matou, ua matou iloa ua ia te Ia le mana, ma ua matou iloa ua Ia tuuina mai ia i matou Lona mana e faatino ai iinei i le lalolagi. Matou te faafetai ona sa Ia faamaloloina Agatha.