O Leo o le Au Paia o Aso e Gata Ai
O le Liahona na Faaali mai e le Atua ia te A’u
I le taimi muamua, sa foliga mai ia te au o le upuvale le fai mai ua toefuatai mai le Ekalesia a Iesu Keriso.
Atapue o le lima mai le Getty Images; ata o le pito i tua na pueina e Clebher Tex
I le avea ai ma se tagata aoga PhD i Ausetalia, sa masani ona ou malaga mai lou fale i faleaiga lata anei le itumalo tutotonu o pisinisi a Melepone. I se tasi o au fealuaiga, sa ou vaaia ai i luga o le eleele se kata o loo i ai se ata o Iesu Keriso. Sa viga mai se leo sa i totonu ia te au ou te tago e piki i luga.
Sa ou usitai ma matamata ma le faaeteete i le kata. Ona ou vaavaai lea mo se nofoaga lelei atu e tuua ai le tamai ata o le Faaola ae na leai se mea na ou maua. O lea la, sa ou ave ai le kata i le fale ma tuu i luga o lau fatatusi.
O le tolu o aso mulimuli ane, sa ou feiloai ai i ni faifeautalai se toalua ao ou agai atu i le malologa. Sa matou setiina se taimi faatulagaina mo i laua e aoao ai au, ma sa la tuuina mai ia te au se kata e talitutusa ma lea na ou mauaina. Ina ua ou toe foi atu i le fale, sa ou faatusatusaina ia kata e lua. Sa o mai uma nei kata i le lotu a faifeautalai.
Ina ua asiasi mai faifeautalai ia te au, sa la tuuina mai a laua molimau e uiga i Le Ekalesia a Iesu Keriso o le Au Paia o Aso e Gata Ai. I le amataga, sa ou le toalelei i a laua molimau. Ia te au, sa foliga mai o le upuvale le fai mai ua toefuatai mai le Ekalesia a Iesu Keriso ma sa na o le pau lea o le ekalesia moni i luga o le fogaeleele, peitai e lua ni mea sa tumau ai lava lou fiailoa.
Muamua, sa ou faitau mai tusitusiga paia e faapea “o le matau ia Ieova o le amataga lea o le poto” (Salamo 111:10). Sa ou manaomia le poto ma fia matau i le Alii ina ia ou maua le poto. Sa ou manatu o le a ou le matau i le Alii e aunoa ma le iloaina o Ia. O le mea lea, o mea na aoao mai e faifeautalai e taua ona sa ou manaomia le malamalama e uiga i le Alii.
Lua, na ou faaiu na taialaina au e le Alii ia ou maua le kata na ou pikiina i luga. I le aluga o tausaga sa ou nofo ai i Melepone, ou te lei toe vaai lava i se kata faapena i luga o le eleele. Sa ou faia se faaiuga sa le’i tia’ia faavalevalea ia kata.
A o fai au lesona a faifeautalai, sa oo ina sili atu ona ou fiafia ma lofituina i le malamalama na ou maua mai le aoaoga fou. Sa lei umi ae ou papatiso. Ua faamauina nei au i lou toalua ma lau fanau mo le olaga nei ma le faavavau, ma o le taimi nei, ua ou maua foi lea lava molimau e tasi na tuuina mai e faifeautalai ia te au: Ua toefuatai mai le Ekalesia a Iesu Keriso e ala mai i le Perofeta o Iosefa Samita. O Le Ekalesia a Iesu Keriso o le Au Paia o Aso e Gata Ai ua na o le pau lea o le Ekalesia moni i le lalolagi ma o loo taialaina e se perofeta soifua.