O La Matou Tapuaiga i Dubai
E alala le tusitala i Iuta, ISA.
E lei i ai se taimi na ou lagona ai le le toafimalie i le avea ai ma se tagata O Le Ekalesia a Iesu Keriso o le Au Paia o Aso e Gata Ai i se atunuu Musolemi.
Atapue i tua mai le Getty Images
Sa matou taunuu ma lou aiga i Dubai, United Arab Emirates, i le tautoulu o le 2013, ma sa matou fiafia e auai i le lotu. O o matou aafiaga a o matou auai atu i le lotu i nofoaga eseese sa muai iloaina lelei lava. Matou te fiafia i le mafai ona savavali atu i le tele o faitotoa mo le taimi muamua ae ua malamalama i mea o le a tutupu ma avea ma se vaega o tagata matou te lei feiloai muamua i ai.
Sa ausia o matou faamoemoega a o avea i matou o se vaega o lenei vaega agalelei o tagata o le Au Paia o Aso e Gata Ai mai le tele o atunuu, ma sa tuputupu ae lo matou faatuatua ma le tuuto i le taimi o matou aumau ai i Dubai. O le a le galo lava ia te au lou taimi i Dubai ma tagata lelei sa ou feiloai i ai o se taunuuga o le mafai ona auai atu i le lotu ma tapuai ai i le ala sa faamanuiaina ai au e fai. Ou te faamoemoe o loo malamalama taitai o le UAE i se meaalofa ua latou tuuina mai ia i matou e faatagaina ai i matou e tapuai.
O le tatou falelotu autu a le siteki i Abu Dhabi.
Atapue o le aiga o Chomjak mai faaaloaloga a le tusitala
O le mea na sa lei faamoemoeina o le tele o le tuputupu ae o lou faatuatua ona o se taunuuga o le ola ai ma fegalegaleai ma tagata e le auai i lau lotu. Ou te lei nofo lava i se mea lea e matua lautele ai le taua tele o le Atua i olaga o tagata.
Fesootai atu o le Faalagolago i le Atua
Sa ou iloaina o se mea fiafia ma le lelei le mafai ona ou tautala e uiga i le uunaiga a le Atua ma le lotu i lou olaga e aunoa ma le popole i mea e fai e isi e aveesea ai le taua o le mea ou te fai atu ai pe ita foi. Sa faapea ou lagona ona o le toatele lava o tagata na ou feiloai atu ai i Dubai sa tautatala e pei o au, ua mafai ai ona fatuina se sootaga vave a o matou talanoa.
O le nofo ai i talaane o le vai-taele e sosoo ma se isi tina ma faatalitali le ma fanau e faamaea la faataitaiga aau, sa ou faasoa atu ai lou tauivi ma ni tofotofoga ma le lagonaina o le lotovaivai. O lenei tina Musolemi na faaauau ona tuuina mai ni upu agalelei o le faamalosiauga ma lana faamautinoaga o loo leoleoina i tatou e le Atua ma o le a fesoasoani mai ia i tatou i o tatou tauiviga. E le o lona Atua. E le o lo’u Atua. O lo tatou Atua.
Sa ma savavali ma lau tama teine i le faleautu mo nofoaafi i se tasi aso ma sa ofo mai ai ma le agalelei se ma lifi e se tamaitai Emirati, o le na faasoa mai ia i ma’ua ni aafiaga e uiga i lana tama na i ai ni faigata faafomai lea na manaomia ai lo laua malaga atu i le Iunaite Setete mo ni togafitiga. I le taimi o lana tala, o lona faatuatua ma lona faalagolago i le finagalo ma le tausiga mataala o le Atua sa lalagaina faatasi. Sa ou fai atu ia te ia o le a ou tatalo mo ia ma lona aiga, lea na ia taliaina ma le agaga malamalama ma le alofa.
Malamalama ma Taliaina
O le feiloai ai ma aiga e aoaoina i le fale a latou fanau sa avea i taimi uma o se siosiomaga saogalemu ma faalenuu. O le tele o lotu sa toeitiiti tofu ma se sui i lena vaega. Ina ua matou talanoa e uiga i le Atua, tatalo, ma le tapuai, sa lagona e tagata taitoatasi le malamalama ma le taliaina e tagata uma. E oo lava i uso Kerisiano, e tele lotu eseese. Pe a ou feiloai ma isi Kerisiano o loo aoaoina i le fale, sa matagofie le taliaina atoatoa, tusa lava po o le a lau tapuaiga patino ma le talitonuga. Sa i ai a matou amioga mama masani ma faiga masani ona o lo matou tuuto atu i le Atua.
Ina ua ou talanoa i se tina Initu o lana fanau lea na aoaoina e la’u tama teine, sa ou faalogo i le taua o lona faatuatuaga ma lona talitonuga ia te ia ina ua ia faamatala mai e uiga i le auala na te faaaluina ai lona aso i le mafaufau loloto ma le tapuai.
Faatasi ai ma lou toalua, o Arona, ma le ma fanau, sa matou asiasi atu ai i le Matafaga o Jumeirah, i le talafatai o le Vanu o Peresia.
Tulaga Faatauaina Masani
Ma le mea mulimuli, e tatau ona ou tau atu le tele o lou faatauaina o le nofo ai i se mea e lagolagoina tulaga faatauaina ma te aoaoina ai ma lou toalua le ma fanau. Ma te aoaoina le ma fanau ina ia tausi lelei o latou soifua maloloina e ala i le le inuina o le ava malosi po o le faaaogaina o fualaau faasaina. Ma te aoao le ma fanau ina ia ola mama ma tauagafau i o latou lavalava ma foliga vaaia. O se tasi o mea matou te fiafia i ai na matou fetaiai i nai aso muamua o le taunuu mai i Dubai, o le faailoga lea i le faitotoa o le faleoloa tele e tau mai ai tulaga faamoemoeina i lavalava ma amio. Sa vave ona matou taua ma lou aiga e foliga mai e pei lava o se faamatalaga mai le tamaitusi o tulaga faatonuina o le Mo le Malosi o le Autalavou . Na matou fiafia i ai!
Ou te leʻi lagonaina lava se le toʻalelei i le avea ai ma se fafine e talitonu ia Keriso, ma mataʻu i le Atua i Dubai. I le isi itu, sa ou lagonaina le faalototeleina ma le faamalosia mo ou talitonuga e i latou na matou fesootai. Ou te leʻi iloaina lenei mea i se tulaga lautele i soo se isi lava nofoaga na ou nofo ai.
Ina ua faalogo lou aiga i le fofogaina o le Malumalu o Dubai United Arab Emirates i le konafesi aoao ia Aperila 2020, na matou tetei, ma matou faataupupula atu i le tasi ma le isi i le moafa tele. Sa matou matuai fiafia lava o le a oo mai se malumalu i Sasae Tutotonu! Ua fiafia lou loto i le toatele o tagata o le Ekalesia o loo nonofo i lena itulagi. Ou te matua faafetai lava i taitai o le UAE mo le faatagaina o lenei maota paia e tu i totonu o o latou maota paia—o o latou faletapuai matagofie o loo laupae ai le laueleele. E moni lava o se taimi taua ma le le mafaagaloina lenei.