Aoaoga Autu o le Talalelei

O Le A le Aiga Atua?

O le Tama Faalelagi, Iesu Keriso, ma le Agaga Paia o ni tagata mavaevae e toatolu ae tasi le faamoemoega.

the Father and the Son appearing to Joseph Smith

Sa i ai se taimi na fesili atu ai le faatonu o se nusipepa i le Perofeta o Iosefa Samita po o le a le mea e talitonu i ai tagata o Le Ekalesia a Iesu Keriso o le Au Paia o Aso e Gata Ai. I le tali atu i ai, sa tusia ai e le Perofeta ni faamatalaga se 13 o talitonuga tatou te faaigoaina o Mataupu Faavae o le Faatuatua. E faapea mai le faamatalaga muamua, “Matou te talitonu i le Atua, le Tama Faavavau, ma Lona Alo, o Iesu Keriso, ma le Agaga Paia” (Mataupu Faavae o le Faatuatua 1:1). E fausia e i latou nei e toatolu le mea ua tatou taua o le Aiga Atua.

Le Atua, le Tama Faavavau

Ua i ai i le Atua se tino toetu o aano ma ivi. O Ia o le Tama o o tatou agaga. E alofa atoatoa o Ia i Ana fanau taʻitasi. E atoatoa o Ia, e i ai le mana uma, ma e silafia mea uma. E tonu o Ia, alofa mutimutivale, ma agaalofa. Sa tatou ola o ni agaga faatasi ma le Atua ae tatou te lei fananau mai. Na Ia auina mai i tatou i le lalolagi ina ia aoao ma tuputupu ae. O le finagalo sili o le Atua e mo Ana fanau taitoatasi ia toe foi atu e toe nonofo faatasi ma Ia pe a tatou maliliu. Ua aoao mai le Atua ia i tatou e tatau ona tatou mulimuli ia Iesu Keriso ina ia toe foi atu ai i le afioaga o le Atua.

Iesu Keriso

Ua i ai foi ia Iesu Keriso se tino toetu o aano ma ivi. O Ia o le Atalii ulumatua o le Atua. Ae tatou te lei fananau mai, na filifilia e le Atua o Ia e avea ma o tatou Faaola. O le uiga o lenei mea na afio mai Iesu i le lalolagi ia avea o se faataitaiga mo i tatou, aoao mai Lana talalelei, togiola mo a tatou agasala, ma laveai i tatou mai le oti. Ona o Iesu Keriso, e mafai ona faamagaloina a tatou agasala pe afai tatou te salamo. Na puapuagatia foi Iesu Keriso i le tele o mea ina ia mafai ona Ia malamalama ma fesoasoani ia i tatou. Na maliu Iesu Keriso ma toe soifua mai, ua mafai ai e tagata uma ona toe ola.

O le Agaga Paia

O le Agaga Paia o le sui e toatasi o le aiga Atua e le i ai se tino faaletino. O ia o se agaga. O le Agaga Paia e mafai ona fesootai sao atu i o tatou agaga. Ua ia molimau mai ia i tatou e moni le Atua ma o Iesu Keriso o lo tatou Faaola. E galue le Agaga Paia o se avefeau a le Atua e tuuina mai ia i tatou ni lagona o le alofa, taitaiina, po o le faamafanafanaga. Pe a papatisoina ma faamauina i tatou, tatou maua le meaalofa o le Agaga Paia. A uma ona tatou papatiso, e mafai ona tumau pea le Agaga Paia ma i tatou a o tatou tausia poloaiga a le Atua.

O Le Uluai Faaaliga a Iosefa Samita

I le aluga o taimi ua le mautonu tagata i le aiga Atua. Ua feeseeseai tagata e uiga i le tulaga e i ai le Atua, Iesu Keriso, ma le Agaga Paia. O le tasi lea o mafuaaga na matua taua ai le Uluai Faaaliga na mauaina e Iosefa Samita. Sa ia vaai i le Tama Faalelagi ma Iesu Keriso e i ai ni tino ma o ni tagata mavaevae se toalua.

Mavaevae ae Lotogatasi

Ua aoao mai i tatou e tusitusiga paia ma perofeta o aso nei e faapea o le Atua, o Iesu Keriso, ma le Agaga Paia o ni tagata mavaevae e tasi le faamoemoega: o lo tatou tino ola pea ma le ola e faavavau (tagai Mose 1:39). E pei o tagata o le au e tasi, Latou te galulue faatasi e fesoasoani ia i tatou i aso uma. E mafai ona tatou lagonaina le latalata atu ia i Latou pe a tatou salamo i a tatou agasala ma filifili le mea sao.

Mau e uiga i le aiga Atua

E tasi le faamoemoega o le Tama Faalelagi ma Iesu Keriso (tagai Ioane 10:30).
Na fetalai atu le Tama Faalelagi i Lona Alo (tagai Mataio 3:16–17).
Sa fetalai atu Iesu Keriso i Lona Tama (tagai Ioane 11:41).
Na tatalo Iesu Keriso mo i tatou ina ia “tasi” i se aso (tagai Ioane 17:11).
Sa vaai Iosefa Samita i le Tama Faalelagi ma Iesu Keriso (tagai Iosefa Samita—Talafaasolopito 1:17).
Ua molimau mai le Agaga Paia o Iesu Keriso o lo tatou Faaola (tagai i le Ioane 15:26).