Fakaʻilekitulōnika Pē: Kakai Lalahi Kei Talavoú
Fēfē Kapau ʻOku ʻIkai Ke u Lava ʻo Pehē “ʻOku ou ʻIlo”?
Neongo pe ko e hā e mālohi hoʻo fakamoʻoní, ʻoku ʻi ai ha feituʻu moʻou ʻi he Siasí.
ʻOku konga ua ʻeku fakamoʻoní: ko e ngaahi meʻa ʻoku ou ʻilo ʻoku moʻoní pea mo e ngaahi meʻa ʻoku ou tui ʻoku moʻoní.
ʻIlo mo e tuí: ʻOku ou fakaʻaongaʻi fakatouʻosi e ongo foʻi leá ni ʻi he taimi ʻoku ou vahevahe ai ʻeku fakamoʻoní.
ʻOku mahuʻinga ʻa e ongo leá ni kiate au—ʻo ʻikai koeʻuhí pē he ʻoku fakahaaʻi totonu ʻe he lea ko ʻení ʻeku tuí, ka koeʻuhí ʻoku fakamanatu mai ai ʻoku ʻikai ke u fie maʻu ha ʻilo kakato ki he tokāteline kotoa pē pe ko ha tali haohaoa ki he fehuʻi kotoa pē ʻi he hisitōlia ʻo e Siasí kae lava ke fakahā ʻeku tui ki he ongoongolelei ʻo Sīsū Kalaisi kuo fakafoki maí.
ʻOku ʻi ai ha feituʻu ʻi he Siasí maʻá e kakai kotoa pē, ʻo tatau ai pē pe ko e hā e mālohi ʻo ʻenau fakamoʻoní. Ka ʻoku ʻi ai ha niʻihi ʻo kitautolu ʻi he Siasí ʻoku tau faʻa hehema ke fakafehoanaki ʻetau fakamoʻoní mo e fakamoʻoni ʻa e niʻihi kehé—tautautefito kapau ʻoku tau fefaʻuhi mo ha ngaahi fehuʻi pe veiveiua ʻi he ngaahi tafaʻaki ʻoku hangē ʻoku fakamoʻoni pau ki ai ʻa e niʻihi kehé. Ko e taimi ʻe niʻihi ʻi heʻeku fanongo ki he fakahā ʻe he kāingalotu ʻo e Siasí mei he tuʻunga malangá ʻa e meʻa ʻoku nau ʻilo ʻoku moʻoní, ʻokú ne ʻai ke u fakakaukauloto ki heʻeku fakamoʻoní—mo e ngaahi fakamoʻoní fakalūkufua.
“Fēfē kapau ʻoku ʻikai ke u lava ʻo pehē ʻʻoku ou ʻiloʼ?”
“Fēfē kapau ʻoku ʻi ai haʻaku ngaahi fehuʻi—pea aʻu pē ʻo veiveiua—fekauʻaki mo ha ngaahi tafaʻaki ʻo e ongoongoleleí?”
“ʻOku ʻi ai nai ha feituʻu maʻaku ʻi he Siasí?”
ʻOku fakapapauʻi lahi mai kiate au ʻe ha talanoa ʻe taha ʻi he Fuakava Foʻoú ko e ngaahi tāpuaki ko ia ʻo e ongoongoleleí ʻoku lava ke maʻu ia ʻe kinautolu kotoa pē ʻoku tui kia Sīsū Kalaisí. Naʻe ʻomi ʻe ha tangata ʻene tama naʻe faingataʻaʻiá kia Sīsū, ʻo ne kole ange, “Kapau te ke faʻa fai ha meʻa, ke ke ʻaloʻofa kiate kimautolu, ʻo tokoni ʻa kimautolu.”
Naʻe tali ange ʻe Sīsū, “Kapau ʻokú ke faʻa tui, ʻoku faʻa fai ʻa e ngaahi meʻa kotoa pē kiate ia ʻoku tuí.”
Naʻe fai leva ʻe he tangatá ha tali ngali fie ʻilo, ʻa ia naʻe fakahaaʻi ai naʻá ne tui pea ʻi ai mo ha tuʻunga taʻetui: “Pea tangi loʻimata leva ʻa e tamai ʻa e tamasiʻí, ʻo ne pehē, ʻEiki, ʻoku ou tui; ke ke tokoniʻi au telia ʻeku taʻetui.”
Naʻe fakamoʻui leva ʻe Sīsū ʻa e tamasiʻí. (Vakai, Maʻake 9:14–27.)
Naʻe ʻikai fie maʻu ʻe Sīsū ke maʻu ʻe he tangatá ha ʻilo haohaoa kimuʻa peá Ne toki fakahoko ha mana. Pe naʻá Ne fiemaʻu ha tui taʻeueʻia. Ne fakahaaʻi ʻa e tuí ʻi hono kole ʻe he tangatá ki he Fakamoʻuí ke fakamoʻui hono fohá, pea siʻi angé ko ha loto-holi ke tui.
Pea ne ʻosi feʻunga pē ia kia Sīsū.
ʻOku fakaʻaongaʻi e lēsoni ko ʻení kiate kinautolu ʻoku tau fekumi ki he mālohi faifakamoʻui ʻo Kalaisí ʻi heʻetau moʻuí he ʻaho ní. Hangē ko ia kuo fakamanatu mai ʻe he kau palōfita mo e kau ʻaposetolo ʻo onopōní, ʻoku feʻunga pē ʻa e loto-holi ke tuí ke kamata ai.1 Ko e moʻoni ʻoku tau loto ke fakamālohia ʻetau ngaahi fakamoʻoní; ʻoku tau taumuʻa ki ha tui mālohi ʻa ia ʻoku tupulaki ki ha ʻilo ʻoku haohaoá (vakai, ʻAlamā 32:21–22, 26–34). Kae ʻoua ke toki hokosia ia, ʻoku feʻunga pē ha ʻamanaki lelei ʻoku moʻoni e ngaahi talaʻofa ʻo e ongoongolelei ʻo Sīsū Kalaisí pea mo ha loto-holi ke tui kuo fakafoki mai ʻa e ongoongoleleí ki he māmaní ʻo fakafou ʻi he kau palōfita ʻi onopōní.
Ko ia ko e hā leva te ke lava ʻo fai kapau ʻoku ʻikai ke ke ongoʻi te ke lava ʻo pehē “ʻOku ou ʻilo”? Te ke lava ʻo maʻu ha loto-fakapapau ʻoku ʻi ai ha feituʻu moʻou ʻi he Siasi ʻo Sīsū Kalaisí. Te ke lava ʻo fakahaaʻi hoʻo fakamoʻoní ʻi he loto-falala ʻo kau ki he meʻa ʻokú ke tui ʻoku moʻoní—pea naʻa mo e meʻa ʻokú ke ʻamanaki ʻoku moʻoní—lolotonga iá ʻokú ke maʻu e ngaahi tāpuaki ʻo e ongoongoleleí. Pea te tau lava ʻo toutou ui ki he ʻOtuá ʻi he lotu ʻo pehē, “Ke ke tokoniʻi ʻeku taʻetuí,” mo vakai ki Heʻene ʻofá ʻi heʻetau moʻuí mo ʻEne ngaahi maná.