Haʻu, ʻo Muimui ʻIate Au
Ko ʻEku Fuofua Fanongo he Ngaahi Nāunau ʻe Tolú
Tokāteline mo e Ngaahi Fuakava 76
5–11 Siulai
Tā fakatātaaʻi ʻe Annie Hanrie Nader
ʻOku fakamahinoʻi ʻe he vahe 76 ʻo e Tokāteline mo e Ngaahi Fuakavá ha ngaahi tafaʻaki mahuʻinga ʻo e palani ʻo e fakamoʻuí ʻa ia ne mole mei he māmaní ʻi he kuonga ʻo e hē fakaʻaufuli mei he moʻoní. Ko ha aʻusia fakangalongataʻa ia ki ha kakai tokolahi ʻenau fuofua ako fekauʻaki mo e ngaahi moʻoni ko ʻeni kau ki hono fakafoki mai ʻo e ongoongoleleí. Naʻe pehē ʻa Koni, ko ha papi ului mei Lisimoni, Veisinia, USA.
ʻOkú ne manatuʻi: “Ne u vakai maʻu pē ki he ʻofa ʻa e ʻOtuá ʻi heʻeku lau e Tohi Tapú, ka ne ʻikai ke u maʻu ha siasi naʻe akonekina ʻi he founga ne u mahinoʻi ai iá. ʻI he taimi ne u fanongo ai ki he lēsoni ʻa e ongo faifekaú ʻi he palani ʻo e fakamoʻuí, ne u ongoʻi ʻoku tonu ʻeku meʻa ne faí pea mo ha ongo nonga ne teʻeki ke u ongoʻi kimuʻa. Ne u fakakakaukauloto ʻo pehē, ‘Ko e Tamai Hēvani ia ʻOku Ou ʻIló.’ Naʻe hanga ʻe heʻeku ako fekauʻaki mo e ngaahi nāunau ʻe tolú ʻo fakalahi ʻeku fakakaukaú ʻo ʻikai ke u faʻa malava ʻo taʻotaʻofi ʻeku fiefia ke ako lahi angé.”
Naʻe maʻu ʻe Telifine, ko ha papi ului mei Pālesi, Falanisē, ha tūkunga fakafāmili faingataʻa, pea ʻi he taimi ne akoʻi ai ia ʻe he ongo faifekaú ʻe lava ke nofo fakataha e ngaahi fāmilí ʻi he puleʻanga fakasilesitialé, naʻe ʻikai ke ne fakapapauʻi naʻá ne fie maʻu ia. Ka neongo ia, ʻi he hokohoko atu hono akoʻi ʻe he ongo faifekaú ia fekauʻaki mo e ngaahi nāunau ʻe tolú, naʻe fakafiemālieʻi ia. Naʻá ne ako te ne toe fakataha mo kinautolu ʻoku ʻofa aí ʻa ia ʻoku nau fili ke muimui ʻi he ongoongoleleí. ʻI he mahino ange kiate ia e palani ʻo e fakamoʻuí, naʻá ne pehē “Kuó u ʻiloʻi ʻoku kiʻi totonu ange ia, pea kuó u fiemālie ai.”