Haʻu, ʻo Muimui ʻIate Au
Ko e Ngāue Fakaetauhi ki Hotau Kaungā-Fonongá
Tokāteline mo e Ngaahi Fuakava 81–83
19–25 Siulai
Ngaahi tā fakatātā ʻa J. Beth Jepson
“Tokoniʻi ʻa e vaivaí, hiki hake ʻa e ngaahi nima ʻoku tautau ki laló, pea fakamālohi ʻa e ngaahi tui ʻoku vaivaí” (Tokāteline moe Ngaahi Fuakava 81:5).
Palesiteni Tōmasi S. Monisoni: Ko ha Sīpinga ʻo e Ngāue Fakaetauhí
Taʻu motuʻa hono uiuiʻi ko ha pīsopé: 22
Tokolahi ʻo e kau mēmipa he uōtí: tokolahi ange he toko 1,000
Tokolahi ʻo e kau uitou ʻi hono uōtí: 85
Naʻe vahevahe ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá e founga naʻe tokangaʻi ai ʻe Pīsope Monisoni e kau uitoú: “Mahalo ʻoku ʻilo ʻe ha tokolahi hono fakaʻaongaʻi ʻe he Pīsope kei talavou ko Monisoní ha uike ʻe taha ʻo ʻene taimi mālōlō fakafoʻituituí ʻi he faʻahitaʻu Kilisimasi kotoa pē ke ʻaʻahi ki he kotoa ʻo e kau uitou ʻe toko valungofulu mā nima ʻi hono uōtí. Mahalo ʻoku ʻikai ʻilo ʻe ha tokolahi, ʻi he ngaahi taʻu kamatá ko e meʻaʻofa naʻá ne ʻave maʻanautolú ko ha taha ʻo e … ngaahi motuʻa moa naʻá ne tauhi mo tokangaʻi ʻi heʻene tauhiʻanga moá.”1
Naʻe manatu ʻa Pīsope Monisoni ki he founga naʻá ne tokoniʻi ai ha ongomātuʻa toulekeleka naʻá na fie maʻu ke vali hona ʻapí: “ʻI ha kiʻi taimi siʻi ne ueʻi fakalaumālie ai au ne u fetuʻutaki, ʻo ʻikai ki he kaumātuʻa ʻo e kōlomú pe kau ngāue tokoní ke omi ʻo fai e valí, ka ʻi heʻeku muimui he tohi tuʻutuʻuni fakauelofeá, ki he kau mēmipa hoku fāmilí ne nofo ʻi ha ngaahi feituʻu kehe. Ne toʻo polosi vali haku ngaahi foha ʻe toko fā ʻi he-fonó mo haku ngaahi ʻofeifne ʻe toko fā ʻo kau he ngāué.”2 Naʻe tokoni e ueʻi fakalaumālie ko ʻení ki he fāmilí ke nau toe vāofi ange mo fetokoniʻaki.
“He ʻikai ke tau lava ʻo ʻofa moʻoni ʻi he ʻOtuá kapau ʻoku ʻikai ke tau ʻofa ʻi hotau kaungā fononga he moʻui fakamatelié.”3 —Palesiteni Tōmasi S. Monisoni