Haʻu, ʻo Muimui ʻIate Au
Ko Hono Ikunaʻi ʻo e Faingataʻá
Tokāteline mo e Ngaahi Fuakava 71–75
28 Sune–4 Siulai
Tā fakatātaaʻi ʻe Dan Burr
ʻOku fekau ʻe he fakahā ʻi he Tokāteline mo e Ngaahi Fuakava 71 ʻa Siosefa Sāmita mo Sitenei Likitoni ke na ʻalu mo malanga ʻo fakataumuʻa ke fakafiemālieʻi e ngaahi ongo taʻeʻofa ne fakahoko ki he Siasí koeʻuhí ko e ngaahi fakaanga mei he kau mēmipa ne mole ʻenau tuí. Hili ha taʻu ʻe 100 tupu mei ai, naʻe maʻu ʻe ʻEletā Sipenisā W. Kimipolo ʻo e Kōlomu ʻo e Kau ʻAposetolo ʻe Toko Hongofulu Mā Uá ha aʻusia meimei tatau ʻi heʻene malanga ʻo taukapoʻi ʻa e Siasí.
Ko e ʻAʻahi ʻa ʻEletā Kimipolo ki ʻEkuatoá
Lolotonga ha ʻaʻahi ʻa ʻEletā Kimipolo ki ʻOtavalo, ʻEkuatoa ʻi he 1965, naʻá ne talaange ki he kau faifekaú ke fakaʻaliʻali e Tohi ʻa Molomoná ki he kakai ʻo ʻOtavaló. Ka neongo ia, ne fehangahangai e kau faifekaú mo ha fakafepaki ʻi he taimi ne kamata ke fakamafola ai ʻe he kakai ʻo ʻOtavaló ha ngaahi loi fekauʻaki mo kinautolu ʻi he ngaahi tūkui kolo ofi mai peé, pea faingataʻaʻia e kau faifekaú he fefaʻuhi mo e ngaahi tukuakiʻi loí.
Hili ha taʻu ʻe ua, ne kau fakataha atu ʻa ʻEletā Kimipolo mo ha kau mēmipa toko siʻi mo ha kau faifekau ʻi ha fakataha ʻo ofi ki ha tauʻanga pasi fakalotofonuá. ʻI he hifo e kakai ʻo e koló mei he ngaahi pasí, ne fakaafeʻi kinautolu ʻe he kau faifekaú ke nau fanongo ki ha ʻAposetolo moʻui ʻa Sīsū Kalaisi. ʻIkai fuoloa, kuo fakatahataha mai ha kakai nai ʻe toko 20. ʻI hono kamataʻi ʻe he kau faifekaú ʻenau fakatahá, ne tupu e haʻofangá ʻo tokolahi ange he toko 100.
Pea lea leva ʻa ʻEletā Kimipolo. Naʻá ne talanoa fekauʻaki mo e hāʻele mai ʻa Sīsū Kalaisi ki he kakai ʻo ʻAmeliká. Naʻá ne tuhu ki he langí mo talanoa kau ki he kihiʻi leʻo siʻi mei he langí naʻá ne fanongonongo e hā mai ʻa e ʻAlo ʻo e ʻOtuá, ʻo hangē ko ʻene ʻasi ʻi he Tohi ʻa Molomoná. Naʻe manatuʻi ʻe ʻEletā Kimipolo, “Naʻe muimui e mata kotoa pē ʻi heʻeku tuhu kotoa pē ki he langí ʻo hangē ne ʻi ai tonu ʻa e Fakamoʻuí ʻo hāʻele hifo ʻi he ngaahi ʻao manifí.”1
Hili ʻení, ne hokohoko atu e feinga ʻa e kau faifekaú ke akoʻi e kakai ʻOtavaló. Naʻe akoʻi ʻe ha ongo faifekau sisitā ha tangata ko hono hingoá ko Lafaela Topango, ʻa ia naʻe papitaiso ʻi he ʻaho 14 ʻo Siulai, 1968—ko e fuofua tangata ʻOtavalo ke hoko ko ha Kāingalotu ʻo e Siasí. Naʻe kau foki mo hono uaifi ko Telesá ki he Siasí. Siʻi ange he taʻu ʻe 15 mei aí, naʻe fokotuʻu ha siteiki ʻi ʻOtavalo, ʻo ui ʻa Misa Topango ko hono fuofua pēteliaké.