ʻOku finangalo ʻa ʻetau Tamai Hēvaní ke Tau Fiefia.

ʻI heʻetau manatu ki he palani ʻo e fiefia ʻa e ʻOtuá, te tau lava ai ʻo maʻu ʻa e fiefiá naʻa mo e faingataʻa ʻa e moʻuí.

Kimuʻa pea fāʻeleʻi kitautolu ʻi he māmaní, naʻa tau nofo kotoa mo e Tamai Hēvaní ko ʻEne fānau fakalaumālie. Naʻá ne fakahā mai ha palani ke tokoni ki Heʻene fānaú ke ako mo tupulaki. Fakafou ʻi Heʻene palaní, te tau lava ʻo hangē ange ko Iá mo moʻui taau ke fiefia ʻi he moʻui taʻengatá. ʻOku malava ʻa e palani ko ʻení koeʻuhí naʻe hāʻele mai e ʻAlo ʻo e ʻOtuá, Sīsū Kalaisi, ki he māmaní ke fua ʻetau ngaahi angahalá, ko ha feilaulau naʻe ui ko e Fakaleleí.

ʻOku ui e palani ʻa e Tamai Hēvaní ko e palani ʻo e

fiefiá (vakai, ʻAlamā 42:8),
fakamoʻuí (vakai, Mōsese 6:62),
huhuʻí (vakai, Sēkope 6:8), pe
ʻaloʻofá (vakai, ʻAlamā 42:15).

ʻOku fakahaaʻi ʻi he ngaahi folofola kotoa ko ʻení mo ha ngaahi folofola kehe ʻa e finangalo ʻo e Tamai Hēvaní ke tau hoko ʻo hangē ko Iá, foki hake kiate Ia, pea mo fiefia moʻoni (vakai, Mōsese 1:39).

ʻOku Tau Omi ki he Māmaní ke Ako mo Tupulaki

Naʻe ʻomi kitautolu ʻe he ʻOtuá ki māmani, ke tau lava ʻo maʻu ha sino fakamatelie (vakai, Sēnesi 1:26–27). Naʻa tau fie maʻu ha sino ke tokoni ke tau aʻusia ʻa e moʻui ʻi he māmaní.

Naʻe ʻafioʻi ʻe he ʻOtuá he ʻikai ke tau fiefia he taimi kotoa pē. ʻOku tau aʻusia ʻa e taʻefiemālié, mamahí naʻa mo e maté. Ka ʻi he ngaahi faingataʻa ʻo e moʻuí, ʻoku tokoniʻi kitautolu ʻe he Tamai Hēvaní ke tau ako mo tupulaki.

Naʻe ʻomi foki ʻe he ʻOtuá ʻa e tauʻatāina ke filí, ʻa ia ko e malava ke fili ʻi he leleí mo e koví. ʻOkú Ne tuku ke tau fili maʻatautolu e meʻa ʻoku tau fakakaukau ki ai mo faí. Kuó Ne ʻomi mo ha folofola mo ha kau palōfita moʻui ke tokoni ke tau ako mo fili ʻa e totonú (vakai, ʻĒpalahame 3:25).

Feinga ke Hangē ko Sīsū Kalaisí

Ne ʻikai tuku mai kitautolu ʻe he ʻOtuá ki māmani, taʻe ʻi ai ha sīpinga ke tau muimui ai (vakai, Sione 13:15). Naʻá Ne tuku mai Hono ʻAló, Sīsū Kalaisi, ke fakahaaʻi mai ʻa e halá. Ke ako e founga ke muimui ai ʻiate Iá, te tau lava ʻo lau e folofolá ke ako ko hai Ia mo e meʻa naʻá Ne fakahoko lolotonga ʻEne moʻui ʻi he māmaní. Te tau lava foki ʻo fakahoko hotau lelei tahá ke hangē ko Kalaisí ʻaki ʻetau talangofua ki he ʻOtuá mo ʻofa ki he niʻihi kehé.

ʻI he taimi ʻoku tau fakahoko ai ha fehalākí, ʻoku tau kolea ha fakamolemole mo fakaʻaongaʻi ʻa e mālohi ʻo e Fakalelei ʻa Sīsū Kalaisí ke tokoniʻi kitautolu ke tau liliu. Te tau lava ʻo fiefia ʻi heʻetau feinga he ʻaho takitaha ke hoko ʻo hangē ange ko Iá.

ʻOku ʻIkai ko e Ngataʻangá ʻa e Maté

ʻI heʻetau maté, ʻoku ʻalu hotau laumālié ki he talitaliʻanga ʻo e ngaahi laumālié. ʻOku hokohoko atu ai ʻetau akó ʻi heʻetau teuteu ki he Toetuʻú.

ʻI he Toetuʻú, ʻe toe fakataha hotau sinó mo e laumālié. ʻE haohaoa hotau sinó, pea he ʻikai ke tau toe foua ʻa e maté pe mahamahakí. (Vakai, ʻAlamā 11:44–45.) Hangē ko e pekia ʻa Kalaisi pea toe moʻui peé, te tau toe moʻui kotoa pē.

ʻI hono fakamaauʻi kitautolu ʻe he ʻOtuá, te Ne fakakaukauʻi ʻetau ngaahi ngāué mo e ngaahi holi hotau lotó. Kapau kuo tau faifeinga ke tauhi e ngaahi fekaú pea mo e ngaahi palōmesi ne tau fakahoko ki he Tamai Hēvaní, te tau lava leva ke toe nofo mo Ia.

Ko e Moʻui mo e ʻOtuá mo Hotau Ngaahi Fāmilí ʻi Hēvaní

ʻI he puleʻanga fakasilesitialé, te tau nofo mo e ʻOtuá mo Sīsū Kalaisi. Te tau lava foki ʻo nofo ai mo hotau ngaahi fāmilí ʻo taʻengata kapau ne silaʻi kitautolu kiate kinautolu. Te tau maʻu ʻa e melinó, fiefiá mo e fiemālié (vakai, Mōsaia 2:41).

ʻE malava ke faingataʻa ʻetau moʻui ʻi he māmaní ʻi ha ngaahi taimi ʻe niʻihi, ka ʻo kapau te tau muimui ʻia Sīsū Kalaisi, te tau lava ʻo maʻu ʻa e fiefiá ʻi he moʻui ko ʻení mo e fiefia taʻengatá ʻi he moʻui ka hokó.

Ko e Hā e Lau ʻa e Ngahi Folofolá fekauʻaki mo e Palani ʻo e Fiefiá?

ʻOku mahuʻinga e founga ʻoku tau moʻui aí. ʻE fakamaauʻi mo fakapaleʻi kitautolu ʻe he ʻOtuá ʻo fakatatau mo ʻetau ngaahi fakakaukaú mo e ngāué (vakai, ʻAlamā 41:3).

Ko Sētane ʻa e fili ki heʻetau fiefiá. ʻOkú ne ʻahiʻahiʻi kitautolu ke tau fakaʻaongaʻi hala ʻetau moʻui ʻi he māmaní pea ke tau faiangahala. ʻOkú ne loto ke tau mamahi ʻo hangē ko iá (vakai, 2 Nīfai 2:27).

ʻI he taimi ʻoku tau maʻu ai ʻa e tui ki he palani ʻa e ʻOtuá maʻatautolú, te tau lava ʻo maʻu ʻa e melinó neongo pe ko e hā e ngaahi faingataʻa ʻoku tau fehangahangai mo iá. Te tau lava ʻo ʻamanaki lelei atu ki he nofo fakataha mo e ʻOtuá ʻo taʻengatá. (Vakai, Tokāteline mo e Ngaahi Fuakava 59:23.)

Kotoa e ngaahi tā fakatātaá, tukukehe e fakatātā he taupotu taha ki toʻomataʻú, meia J. Kirk Richards