Itok, Ļoor Eō
Anjo̧ jān Jum̧ae
Juun 28–Juļae 4
Kōmeļeļe jān Dan Burr
Revelesōn eo ilo Katak im Bujen Ko 71 ej kwaļo̧k kōn Josep Smith im Sidney Rigdon aerro etal im kwaļo̧k kōn juon kijejeto n̄an kaenōm̧m̧an jet en̄jake ko me raar waļo̧k ņae Kabun̄ in itok wōt jen kōnono ko jān membōr ro me raar luji tōmak ko aer. Enan̄in 100 iiō ko tokālik, Elder Spencer W. Kimball jān Doulul eo an Jon̄oulruo Rijilōk ro ekar wōr an ejja en̄jake rōt in ilo kwaļo̧k n̄an jurake Kabun̄ in.
Loļo̧k eo an Elder Kimball n̄an Ecuador
Ilo juon iien loļo̧k n̄an Otavalo, Ecuador, ilo 1965, Elder Kimball eaar jiron̄ļo̧k mijinede ro n̄an kwaļo̧k kōn Bok in Mormon n̄an armej in Otavalan ro. Ijoke, mijinede ro raar abwilōn̄lōn̄ kōn ke Otavalan ro raar kajedeed riab ko kōn er ilo jikin ko repaak, im mijinede ro ekar pen aer anjo̧ jen riab ko.
Ruo iiō tokālik, Elder Kimball eaar kobaļo̧k ippān jejjo̧ membōr im mijinede ro ilo juon kweilo̧k epaake jikin kōbaj eo. Ke armej ro rej diwōj jen baj eo, mijinede ro rej karuwaineneik er n̄an ron̄jake juon Rikanaan emour an Jisōs Kraist. Tokālik, enan̄in 20 armej raar kobatok. Ke mijinede ro rekar jino kweilo̧k eo aer, jarlepju eo eaar lōn̄ļo̧k jān 100.
Innām Elder Bednar eaar kōnono. Eaar ba kōn Itok eo an Jisōs Kraist n̄an Amedka. Eaar jitōn̄ļo̧k lan̄ im kar kōnono kōn ainikien emera, juon ainikien edik jān llan̄ me eaar kwaļo̧k kōn waļo̧ktok eo an Nejin Anij, loe illo Bok in Mormon. Elder Kimball ekar keememej, “Aolep mej rekar reiļo̧k n̄an mejatoto āinwōt n̄e Rilo̧mo̧o̧r ej itok jen kōdo̧ ko.”1
Ālkin menin, mijinede ro rekar bar kajjieon̄e Otavalan ro. Sister mijinede ro rekar katakin juon em̧m̧aan etan in Rafael Tabango, eo ekar peptaij ilo Juļae 14, 1968—Ro Rekwojarjar jinointata ilo Otavalo. Kōrā eo pāleeū, Teresa, ekar bar kobatok ilo Kabun̄ in. 15 iiō ko tokālik, juon stake ekar jutak ilo Otavalo, kar kūr Būratōr Tabango āinwōt petriak eo jinointata.