Kōrā ro ilo Raan ko Jinoin tata ilo Jepļaaktok in

Lōke Irooj

Jān Brent M. Rogers

Ra eo an Bwebwenato an Kabun̄ in

Kōnke eaar jeļā kajjien Irooj jān jeje ko rekwojarjar, tōmak eo epen an Mary Ann Young ekar dāpij wōt en̄jake ko an n̄an “dipuk aolep lan̄ ko an mour in.”¹

Kōmeļeļe ko jān Toni Oka

Mary Ann Angell ekar jeraam̧m̧an ilo an kar rūttoļo̧k ilo juon jukjukinpād me eļap an kaorōk riiti jeje ko rekwojarjar. Liin ekar iakwe katak ko an Rilo̧mo̧o̧r.² Liin ekar jeļā m̧oktaļo̧k ilo mour eo an ke e emaron̄ ron̄ ainikien Irooj jen jeje ko rekwojarjar n̄an bōk aenōm̧m̧an ilo katak ko An.

Liin ekar ron̄ kōn gospel eo an Jisōs Kraist em̧ōj an kar jepļaaktok kar kwaļo̧ke ilo Rhode Island, USA, ilo 1831, im ālkin riiti Bok in Mormon, Mary Ann ekar oktaktok n̄an gospel in.

Liin eaar em̧akūtļo̧k n̄an Kirtland, Ohio, emaron̄ 1833, ijo ekar lo Brigham Young, eo im ekar m̧areiki ilo 1834. Ilo iiō ko 48 tokālik, jān elōn̄ jikin ko im apan̄ ko, Mary Ann Angell Young ekar etal wōt im ron̄jake Irooj jān jeje ko rekwojarjar im n̄an likūt leke eo an ilo E.

N̄an waanjon̄ak, ļeo ippān ekar etal n̄an juon mijen ilo Great Britain ilo 1839 10 raan m̧okta jān an liin keotak leddik eo nejier Alice. 20 allōn̄ tokālik, Mary Ann im ajri ro jiljino nejier ioon apan̄. Raar en̄taan kōn nan̄inmej im raar mour jidik kōn pilawe corn, milik, im jejjo̧ leen wōjke ko.³ Mary Ann eaar lolorjake n̄an kappok jidik jerbal n̄an jipan̄ baam̧le eo an im n̄an e make im eo nejin enan̄inmej. Aaet Irooj eaar jipan̄ er ilo apan̄ ko aer. “En̄in ej juon men em̧m̧an,” liin eaar jejeļo̧k n̄an ļeo ippān, n̄an “leke Irooj.”⁴

Pedped ioon jeļā eo an kōn jeje ko rekwojarjar, Mary Ann eaar jeļā kōn juon jeļā eo em̧wilaļ bwe Irooj eaar aolep iien pād ippān, iakwe e, im kar jeļā kajjien, eļaptata ilo apan̄ ko an rellōn̄. “Kōtļōk bwe Irooj en tōl kōj ilo aolep men otemjeļo̧k im kōnono ineem̧m̧an ilo iien ko reppen im ilo iien kajjieon̄” an jar.⁵

Kakeememej ko

1. Mary Ann Angell Young letter to Brigham Young, June 30, 1844, Brigham Young Office Files, 1832–1878, Church History Library, Salt Lake City (CHL).

2. Lale “Biography of Mrs. Mary Ann Young,” Woman’s Exponent, Sept. 1, 1887, 53–54; Emmeline B. Wells, “In Memoriam,” Woman’s Exponent, Juļae 15, 1882, 28–29.

3. Lae Matthew C. Godfrey, “‘You Had Better Let Mrs Young Have Any Thing She Wants’: What a Joseph Smith Pay Order Teaches about the Plight of Missionary Wives in the Early Church,” BYU Studies, vol. 58, no. 2 (2019), 63–64.

4. Mary Ann Angell Young letter to Brigham Young, Apr. 15, 1841, Brigham Young Office Files, 1832–1878, CHL.

5. Mary Ann Angell Young letter to Brigham Young, Mar. 21, 1840, George W. Thatcher Blair Collection, 1837–1988, CHL.