Ngaahi Kongokonga Lalahi mei he Konifelenisi Lahi Fakavaeuataʻu Hono 191

ʻOku liliu kitautolu ʻi he taimi ʻoku tau fakaʻaongaʻi ai e ngaahi moʻoni ʻo e ongoongolelei ʻoku tau akó. Naʻe vahevahe ʻe Palesiteni Lāsolo M. Nalesoni ʻa e pōpoaki mahinongofua kae ʻuhingamālie ke fakaava mo tāpuni ʻaki e konifelenisi lahí.

ʻI he lolotonga ʻene lea fakafeʻiloakí naʻá ne pehē ai, “ʻOku mālohi fau e tokāteline haohaoa ʻo Kalaisí. ʻOkú ne liliu e moʻui ʻa e taha kotoa ʻoku mahino ki aí mo feinga ke fakahoko ia ʻi heʻene moʻuí.” ʻI he ʻaho hono hokó, naʻá ne pehē ʻi heʻene lea tukú: “Kuo akonekina lelei kitautolu. … Ko e fehuʻi ʻi he taimi ní, kuo tau kehe fēfē nai koeʻuhí ko e ngaahi meʻa kuo tau fanongoa mo ongoʻí?”

Ko e ngaahi lēsoni kehekehe kae mahuʻinga ne akoʻi he lolotonga e konifelenisi lahí:

Naʻa tau ako kuo taimi ke fakahoko ha ngaahi founga makehe ke fakamālohia ai hotau fakavaʻe fakalaumālie fakatāutahá (vakai, Palesiteni Nalesoni ʻi he peesi 93).
Naʻa tau ako ki hono mahuʻinga ʻo e tuʻunga fakaākongá kae pehē ki hono faingofuá (vakai, Palesiteni M. Lāsolo Pālati he peesi 51, ʻEletā Tieta F. ʻUkitofa he peesi 77, mo ʻEletā Keuli E. Sitīvenisoni he peesi 47).
Naʻa tau ako ki he ʻuhinga ʻoku tau fie maʻu ai ʻa e Siasí pea te tau lava ʻo fai ha meʻa lahi ke faitāpuekina ai e niʻihi kehé ʻi he taimi ʻoku tau ngāue fakataha aí (vakai, Palesiteni Tāleni H. ʻOakesi ʻi he peesi 24, Pīsope L. Toti Patisei he peesi 100, Poni H. Kōtoni ʻi he peesi 10, mo Seiloni ʻĪupangikē he peesi 53).
Naʻa tau ako ʻe lava ke tokoniʻi kitautolu ʻe he ʻofa ki he ʻOtuá ke tau ikunaʻi ʻa e ngaahi ʻā vahevahe ʻokú ne taʻofi kitautolu mei heʻetau hoko ʻo uouangatahá (vakai, ʻEletā Sefilī R. Hōlani he peesi 8, ʻEletā D. Toti Kulisitofasoni he peesi 16, mo ʻEletā Teili G. Lenilani he peesi 83).
Naʻa tau ako te tau lava ʻo fakaafeʻi mai ʻa e fakahaá ki heʻetau moʻuí ʻi he tukulolo ki he finangalo ʻo e ʻEikí pea ʻoku lelei pē ke tau ʻeke ha ngaahi fehuʻi ʻoku ʻikai ke tau maʻu ha ngaahi tali ki ai (vakai, Palesiteni Henelī B. ʻAealingi ʻi he peesi 74, Kamila N. Sionisoni he peesi 80, mo Sūsana H. Pota ʻi he peesi 33).

Ko e hā e meʻa naʻá ke fanongo ki aí? Ko e hā e meʻa naʻá ke ongoʻí? Te ke fakaʻaongaʻi fēfē ʻi hoʻo moʻuí ʻa e moʻoni haohaoá, tokāteline haohaoá, mo e fakahā haohaoa te ke maʻu ʻi hoʻo hokohoko atu ke ako e ngaahi pōpoaki ʻo e konifelenisi lahí?