Fakahoko ʻe he Siasí ha Tokoni mo ha Fakafiemālie

ʻI he ngaahi taimi ʻo e faingataʻá pea mo ha feituʻu pē he māmaní ʻoku fie maʻu ai ha tokoni, ʻoku kei hokohoko atu pē hono fakahoko ʻe he Siasí ʻa e meʻa kotoa te ne lavá ke fai ha tokoni mo ha fakafiemālie, ʻo faʻa fengāueʻaki fakataha mo ha ngaahi kautaha tokoni ʻofa pea mo ha ngaahi kautaha ʻoku ʻikai ko ha kautaha fakapuleʻanga. Lolotonga e māhina ʻe ono kuohilí, kuo fakahoko ai ʻe he Kautaha Tokoni ʻOfa ʻa e Siasí, ʻa e nima tokoni ʻofa fakaetangata ʻo e Siasí, ha tokoni kae lava ke:

Fakaʻatā ha kautaha ʻoku ʻikai fakatupu paʻanga ke ne fokotuʻu ha maʻuʻanga vai ʻi he tukui ʻapi ʻi he ngaahi feituʻu mamaʻo ʻo e Puleʻanga Navahó ʻi Niu Mekisikou, ʻAlesona, mo ʻIutā, USA.
Tufaki ha huhu maluʻi COVID-19 ʻe 2 piliona nai ki he kakai tuʻu laveangofuá ʻi ha ngaahi fonua mo ha vahefonua ʻe 121.
Foaki ha ʻū naunau tokoni ki he kau kumi hūfanga ʻItiopea ʻoku nofo ʻi Sutaní pea mo e ngaahi kolo ne tāfea lahi ʻi Sutaní. Naʻe tokoni foki ʻa e naunaú ke fakaakeake ʻa e kau fāmá hili ʻa e tāfeá pea mo foaki ha meʻakai maʻanautolu pea mo e niʻihi kehé pea tokoniʻi e ngaahi fāmilí ke nau moʻui fakafalala pē kiate kinautolu ʻaki haʻanau fakatupulaki ʻenau pisinisi pē ʻanautolu.
Tokoniʻi ha kau kumi hūfanga mo e kau hikifonua mai ʻe toko 9,000 ʻo fakafou ʻi ha ngaahi kautaha tokoni ʻofa ʻe meimei 190 ʻi he ʻIunaiteti Siteití, ʻo foaki ha ngaahi paʻanga tokoni ʻoku feʻunga hono fakakātoá mo e $5 miliona ʻAmelika.
Hokohoko atu e ako ngāué pea mo foaki ha ʻū komipiuta maʻá e kakai ʻi Tahiti ʻoku kui mo faingataʻaʻia ʻenau sió.
Fakafekauʻaki mo e ngaahi kautaha fakalotu kehé mo e tukui koló ke tokoniʻi e ngaahi fāmili hikifonua maí ʻi ha senitā fehikitaki ʻi Hiusitoni, Tekisisi, USA.
Tokoniʻi ha ngaahi polōseki tokoni ʻe 20 ʻi Palakuai.
ʻOmi ha tokoni ki Haiti hili ha mofuike fakalilifu, pea fakaʻaongaʻi e ʻū fale ʻa e Siasí ko ha ngaahi maluʻanga pea ne foaki ʻe he Siasí ha meʻakai, vai, mo ha ʻū naunau kehe.
Tokoni ki he ngaahi fiemaʻu vivili ʻa e kau kumi hūfanga ʻAfikani ʻoku nofo ʻi Katā, ʻIulope, mo e ʻIunaiteti Siteití.

Naʻe fai foki ʻe he Siasí ha tokoni ʻi he ʻOtu Motu Kalipiane ʻo Seni Vinisení pea mo e ʻotu Kelenatiní lolotonga e puna ha moʻunga afi ʻi he feituʻu ko iá; fokotuʻutuʻu ha kau ngāue tokoni ke nau tokoni ʻi he nusi afaá mo e fakaakeaké ʻi he taimi ne tō ai ha afā ʻi he Matāfanga ʻo e Kūlifa ʻo Luisiana, USA; pea mo ʻoatu ha tokoni ʻi he taimi naʻe hoko ai ha tāfea ʻo ne maumauʻi ha ngaahi konga ʻo Siamane, Pelisiume, ʻotu Netalení, Lakisemipeki, mo Suisalaní.