Welkam long Namba Ia

Stap Tanem Raorao I Kam Lav

Josef blong Ijip, i kam long Michael T. Malm

Samtaem, i gat samting we yumi no agri long hem insaed long ol rilesensip blong yumi. Blong save olsem wanem blong tanem raorao we i save spolem laef i kam raorao we i save bildimap man, i wan impoten samting blong save stap gud long laef. Be yet, yumi gat hadtaem blong mekem hemia.

Raorao we i spolem man, samtaem i mekem yumi filim se i hevi. Raorao i save go we i go we i nomo gat kontrol long hem. Yumi luk se i nomo gat tumas ansa. Yumi filim we yumi no strong mo yumi wari. Ol rilesensip we oli brokbrok mo ol komuniti we oli seraot, oli stap olgetawan long medel blong ol makas blong raorao.

Be, yumi save wok strong tu long ol raorao we oli bildimap man, we yumi save faenem fridom long hem; we yumi kam fri long nogud tingting ia blong stap raorao. Yumi save developem fasin blong gat jastis mo sore, yumi save mekem ol rilesensip blong yumi oli kam strong moa, mo yumi save stretem ol problem we rus blong hem i go dip tumas. I posibol blong gat pis—long ol rilesensip blong yumi mo long ol komuniti blong yumi.

Olsem wan raorao medelman, hasban, mo papa, mi faenem se gospel blong Jisas Kraes i save givim yumi laet mo paoa we yumi nidim blong tanem raorao i kam lav.

Long namba blong magasin ia, bae yu ridim olsem wanem Jekob, Esao, mo Josef oli bin save stretem ol raorao insaed long famli blong olgeta, mo olsem wanem, yumi tu, yumi save mekem semmak insaed long ol hom mo komuniti blong yumi (luk long pej 20). Mo tu, bambae yu save ridim atikol blong Elda D. Todd Christofferson, we i wan gudfala atikol long saed blong wei we wanem i kam agensem yumi i save mekem yumi kam gud moa sapos yumi tanem yumi long Lod blong kasem help (luk long pej 6).

Plante long yumi oli stap karem fulap harem nogud abaot ol rilesensip we oli brokbrok long hom, mo long wol. Mi hop se namba blong magasin ia bae i givim hop long olgeta we oli filim se i no gat hop long fasin blong mekem pis; fasin blong mekem pis i givim fet ia we yumi no stap yumiwan, mo moa impoten, se yumi filim lav blong Jisas Kraes long wan wei we i jenisim hat blong yumi, be tu, hat blong olgeta we oli gat hadtaem wetem hemia tu.

Wetem bigfala lav,

Chad Ford

Profesa long Fasin blong Mekem Pis bitwin Ol Pipol blong Defren Kalja, Brigham Yang Yunivesiti–Hawae