“Stap Luk Fes blong God long Fes blong Enemi blong Yumi,” Liahona, Maj/Epril 2022
Stap Luk Fes blong God long Fes blong Enemi blong Yumi
Ol lesen aot abaot fasin blong winim ol raorao we oli stap long Buk blong Jenesis oli save givim wan paten blong laef blong yumiwan.
Pikja i kam long David Green
Olsem wan medelman blong ol raorao, mi bin kasem plante waes long fasin blong tanem raorao, mo invaetem fasin blong mekem pis taem yumi lukluk long eksampol mo ol tijing blong Jisas Kraes long OlTesteman. Be, Niu Testeman i no wan buk ia nomo blong ol skripja we i bin lidim mi ova long rod blong mi long ples blong wok. OlTesteman i gat sam gudfala wei blong lukluk we oli save helpem yumi taem yumi fas long raorao we i spolem man.
?Wanem nao hem i raorao we i spolem man? Hem i taem we yumi nomo gat paoa blong joen wan ples blong stretem ol problem wetem ol narawan, mo hemia i lidim yumi blong mekem nogud long ol narawan, mo mekem nogud long yumiwan bakegen.
Wetem ol raorao we oli spolem man, bae wan fraet we i soa bae i kam, hemia long saed blong wanem man i ting se bae i hapen, mo tu, olsem wan risal blong raorao ia; hemia i wan fraet se man bae i nomo lavem yumi, o man bae i nomo luk yumi long wei ia we yumi wantem, mo wan fraet blong nomo save faenem ansa long ol problem long fored blong yumi. Taem yumi letem fraet ia i holemtaet yumi, yumi nomo filim se yumi gat ol tul blong stretem ol problem we yumi fesem, mo plante taem, yumi gat ol filing blong lusum hop, stap sem, mo yumi filim se yumi blong nating.
Kaen raorao ia, long plante pipol, i mekem olgeta oli filim se oli stap long denja, mo from hemia nao, long en, yumi stap yusum ol stael we oli no help, olsem fasin blong stap longwe long man, go wetem, o kompit olsem wan wei blong traem mekem raorao ia i gowe. Sore tumas, long ol raorao we oli spolem man, i no gat wan long ol ansa ia we bae i rili wok.
Yes, yumi mas traem blong no stap raorao (luk long 3 Nifae 11:29). Be yumi neva mas stap longwe, givap, o atakem olgeta we yumi gat raorao wetem olgeta. Be, yumi mas lanem olsem wanem blong lavem ol pipol we yumi stap raorao wetem olgeta. Hem i nidim blong yumi mas praktisim jareti, stret lav ia blong Kraes, i go long ol enemi blong yumi (luk long Moronae 7:47).
Jisas i bin tijim se, blong lavem olgeta we oli lavem yu, hem i isi. Be tu, Hem i talem: “Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala” (Matiu 5:44). Sevya hem i askem long yumi blong lavem man olsem we Hem i stap lavem man, mo blong kam stret evriwan olsem we Hem i stret evriwan (luk long Jon 13:34; 3 Nifae 12:48). Hemia i save minim se, yumi mas wantem blong lavem ol narawan iven taem we i gat wan denja blong gat kaen lav ia. Yumi save stop stop, from se i wan nomol fasin blong stap longwe long denja. Be blong disaed blong lavem olgeta we oli save mekem nogud long yumi bae i letem yumi pusum yumi i go bitim fraet ia mo bae yumi fulap wetem jareti.
Kaen lav ia, i askem blong yumi nomo gat fraet long fored blong raorao. Hem i askem blong yumi openem hat mo tingting blong yumi long ol pipol we yumi gat raorao wetem long wan wei blong “[save wet longtaem tru long hadtaem, gat kaen fasin, … no lukaotem samting blong yumiwan nomo, yumi no save kros kwik, mo no save gat rabis tingting;] … be bae yumi no save letem wan samting i daonem tingting blong [yumi], oltaem [yumi] stap bilif strong long God [long saed blong evri samting], mo [yumi] stap putum tingting blong [yumi] i strong long evri samting. … Bigfala lav ia i neva sot” (1 Korin 13:4–5, 7–8). Jareti i stap soem kaen lav ia, be i no gat wan samting we i promesem yu stret se ol pipol long nara saed blong raorao ia, bae oli mekem semmak.
Lav ia i letem yumi luk ol brata mo sista blong yumi we yumi gat raorao wetem long wan wei we i klia gud, mekem se ol nid mo wanem we oli wantem, i impoten long yumi semmak olsem ol nid mo wanem we yumi wantem, nomata long wanem wei we olgeta oli luk yumi. Bambae yumi mekem wanem i nid blong mekem blong faenem ol ansa we i lukluk long ol nid blong olgeta, mo tu, ol nid blong yumi.
Tufala stori ia long OlTesteman, oli ol gudfala eksampol blong kaen lav ia.
Esao mo Jekob
Esao mo Jekob we Tufala I Holem Tufala, i kam long Robert T. Barrett
Long Jenesis 25, yumi faenem wan raorao blong famli bitwin tufala brata, Esao mo Jekob, ol boe blong Aesak. Esao i bin salem graon mo evri samting we papa blong hem i bin givim long hem i go long Jekob from wan bol supsup (luk long Jenesis 25:30–31). Afta long hemia, folem advaes blong mama blong hem, Jekob i jenisim hem i kam Esao blong save kasem ol las blesing blong Aesak (luk long Jenesis 27:6–29).
Esao i no laekem Jekob nating mo i promes se bae i kilim brata blong hem i ded. Jekob i ronwe blong go stap wetem anggel blong hem, Leban. (Luk long Jenesis 27:41–45.) Long en, Jekob i bin kasem trabol wetem anggel blong hem, mo hem i mas gobak hom nomo (luk long Jenesis 31). Jekob i save se, hemia i minim se bae hem i mas fesem Esao, we i gat wan bigfala ami. Hem i fraet from laef blong hem, mo laef blong famli blong hem (luk long Jenesis 32:7–8).
Long dei we tufala i mit, Jekob i sendem wan bigfala namba blong ol nanigot, ol kamel, ol buluk, ol sipsip, mo ol dongki, olsem wan saen blong mekem pis. Afta, hem i bodaon seven taem taem hem i stap kam kolosap long brata blong hem. Esao i mekem wan samting we Jekob i no ting long hem. Esao i krae, i kisim brata blong hem, mo i talem hem se i no gat nid blong ol samting ia blong mekem pis.
Lav blong Esao i tajem hat blong Jekob, mo Jekob i ansa:
“No, plis yu holem olgeta. Sapos yu glad long mi, mi wantem yu yu tekem presen ya blong mi. Taem mi luk fes blong yu naoia we yu yu glad olsem blong luk mi, i olsem we mi luk fes blong God.
“Plis yu holem presen ya we mi tekem i kam, se i blong yu. God i stap mekem i gud tumas long mi, mo mi mi no sot long wan samting. Nao hem i stap strong long brata blong hem gogo hem i tekem presen ya” (Jenesis 33:10–11).
Trifala Samting we I Nid blong Gat blong Save Laef wetem Pis
Jekob i givim eksampol blong wan paten blong lav long ples ia, we mi faenem se i wan gudfala wei blong invaetem fasin blong mekem pis wetem olgeta we yumi mekem rong long olgeta, o olgeta we oli mekem rong long yumi.
Ol Sam 85:10 i tokbaot ol kondisen blong save mekem pis bakegen: “[Sore mo trutok oli mit tugeta; stret mo gud fasin mo pis oli kisim tufala.” Aksen blong mekem pis blong Jekob mo Esao i mitim ol kondisen we yumi faenem long Ol Sam ia.
Hem i nidim blong Jekob mo Esao, tufala i gat strong paoa long tingting blong luksave trutok ia, se tufala i no enemi—tufala i ol brata. Hem i tekem sore blong yumi fofogivim yumi. Hem i tekem stret mo gud fasin—kaen jastis ia we i mekem raet wanem we, yumi o ol narawan, i mekem i rong—long Jekob, i blong givim long Esao wan pat blong wanem we papa blong hem i bin blesem hem wetem. Taem we olgeta tri samting ia oli bin stap, i bin letem olgeta blong stap laef wetem pis.
Yumi save folem semfala paten insaed long laef blong yumi.
Taem yumi fas insaed long raorao we i spolem man, fraet blong yumi long raorao ia, mo fraet blong yumi long ol narawan i save mekem yumi nomo save muv, o i mekem yumi mekem sam samting we i mekem samting i kam mowas, be i no gud moa. Plante taem, yumi mekem eskius se eni samting we bae yumi mekem blong stopem raorao ia we i spolem man, bae i no wok. Yumi nomo trastem se ol nara man oli save jenis.
Be, eksampol blong Jekob i save givim yumi wan wei tru long kaen raorao ia. Jekob i fesem fraet ia we hem i gat long brata blong hem, mo fraet blong hem from raorao we hem i gat wetem brata blong hem. Hem i bin wari moa blong “holemtaet tufala’, be i no blong “holemtaet hemwan” long tetaem ia, mekem se hem i tanem hem i go long brata blong hem, i givim hem wanem we i trutok mo jastis from eni rong samting we hem i bin mekem. Hat blong Esao, we wan taem i bin wantem kilim Jekob i ded, i kam sofsof; sore mo pis i kam fulap afta. Jekob i faenem wan wei blong lavem enemi blong hem, mo, taem hem i bin mekem olsem, i bin luk “fes blong God” i stap lukluk hem bakegen.
Nomata long bigfala wari we yumi save filim taem yumi kam fesem raorao long wei ia, hem i wan rod we i wok gud moa blong tanem kaen raorao olsem, bitim eni narafala wei. Lav olsem hemia blong Kraes i putum wan spes blong yumi save rili luk ol pipol we yumi gat hadtaem wetem olgeta long wan wei we i rili jenisim yumi mo i jenisim olgeta.
Josef mo Ol Brata blong Hem
Josef blong Ijip, i kam long Michael T. Malm
Wan jeneresen afta long Jekob, i luk wan nara strong eksampol blong lav ia we i kam long yangfala boe blong Jekob, we i Josef.
Josef, ol brata blong hem we oli jalus long hem oli salem hem olsem slef, taem Josef i bin yangfala. Olsem Esao, ol brata blong Josef oli filim se papa blong olgeta i laekem hem bitim olgeta, mo Josef i gat moa samting. Josef i safa bigwan from nogud tingting we ol brata blong hem oli gat abaot hem. Blong plante yia, hem i seperet long famli blong hem, i kam wan wokman, mo hem i go kalabus blong wan smol taem. Long en, Lod i bin helpem hem blong hem i winim wanem i bin kam agensem hem, mo hem i kam blong strong man blong rul long Ijip. (Luk long Jenesis 37–45).
Ol brata blong hem tu oli bin safa, mo long wan taem we i had blong kasem kaekae, oli bin go long Ijip, we oli hanggri mo oli lus. Taem we oli fesem Josef, oli no bin luksave hem mo oli plis blong kasem help.
Josef i bin gat evri raet blong sakem ol brata blong hem long kalabus blong save mekem jastis long olgeta. Hemia nao oli nidim blong kasem. Be hem i bin jusum blong praktisim fasin blong gat gladhat—blong fogivim olgeta, blong lavem olgeta.
“Plis, yufala i kam kolosap,” hem i talem long olgeta. “Oli kam kolosap long hem. Nao hem i talem se, ‘Mi mi Josef ya. Mi mi brata blong yufala, we yufala i bin salemaot mi bifo, blong mi kam slef blong ol man blong ples ya.
“Be i nogud yufala i stap harem nogud, mo i nogud yufala i stap jajem yufala from we yufala i salemaot mi olsem. Hemia i no wok blong yufala, i wok blong God ya, we hem i sanem mi mi kam fastaem long yufala long ples ya, blong mi save sevem laef blong ol man” (Jenesis 45:4–5).
Josef i no fogivim ol brata blong hem nomo, be tu, i luk se i gat wan gudfala stamba tingting biaen long raorao blong olgeta. Hem i bin luksave se han blong God i stap long evri samting, mo nomata safaring ia we evriwan i bin go tru long hem, hem i talem se “God ya, we hem i sanem mi mi kam fastaem long yufala long ples ia, blong mi save sevem laef blong ol man” (Jenesis 45:7).
Bakegen, wan semmak paten i save strong i stap insaed long laef blong yumi taem yumi luksave se harem nogud blong raorao i save lidim yumi long ol risal we bae oli mekem famli mo ol komuniti blong yumi oli kam strong moa, sapos yumi wok tugeta blong faenem ol ansa.
Yumi evriwan i gat ol raorao. Bae i mekem man i harem i soa. Samtaem, i soa bigbigwan. Mi sapraes tumas long hamas soa ol narawan oli save filim taem yumi fasfas insaed long wan raorao, speseli wetem olgeta we yumi lavem olgeta. Be, soa ia mo fraet ia, i no mas stap olsem en blong stori.
Yumi save jusum blong luk raorao mo ol pipol we yumi gat raorao wetem long defren wei, semmak olsem we Josef i bin mekem. Yumi save jusum blong lego kros, nogud filing, mo fasin blong blemem man i go, mo akseptem ol enemi blong yumi.
Yumi save jusum blong gat lav ova long fraet, mo faenemaot—olsem Jekob, Esao mo Josef mo ol brata blong hem—se ol enemi blong yumi oli ol brata mo sista blong yumi. Taem yumi traehad blong stretem yumi wetem olgeta, yumi tu, bae yumi luk fes blong God.