“Hae God I Stap Wetem Josef,” Liahona, Maj/Epril 2022
Kam Folem Mi
Hae God I Stap Wetem Josef
Taem yumi stap gotru long ol gud taem mo ol nogud taem blong laef, yumi save lanem plante samting aot long eksampol blong profet Josef blong bifo.
Josef I Stap Eksplenem Ol Drim blong Fero, i kam long Jean Adrien Guignet, Musée des Beaux-Arts, Rouen, Franis/ Bridgeman Images
Sam yia i pas, famli blong mifala i glad tumas taem mifala i lanem se waef blong mi, Terri, i gat bel long nambafo pikinini blong mifala. Be, sam manis i stap go we hem i gat bel, mifala i lanem se Terri i gat wan helt problem we i wan denja long hem. Rod we i moa sef, i blong hem i go silip long hospital, mo long ples ia bae oli save lukaot long hem oltaem. Hem i mas spel nomo long bed blong bebi i save gohed blong gro, kasem taem we bae hem i save tekem.
Taem ia i kam wan taem we i tudak mo i had long famli blong mifala, speseli long Terri. Hem i filim se hem i stap hemwan nomo. Mo mi gat jalenj ia blong lukaot long ol tri yangfala pikinini blong mitufala mo semtaem go wok, mo tu, stap olsem wan bisop. I luk se laef i olbaot evriwan mo i had tumas.
Taem we hem i bin stap hemwan, Terri i faenem kamfot long ol toktok blong wan naesfala hym:
Mi nidim yu blong stap long evri aoa we i pas.
Gladhat blong Yu nomo i ronemaot paoa blong man blong temtesen,
?Huia bakegen? be Yu nomo, Yu save stap mo lidim mi
!Tru long klaod mo san i saen, Lod, stap wetem mi! 1
Lod I Bin Stap Wok Wetem Mifala
Long en, i bin nid blong gat wan operesen blong mekem boe blong mitufala, Jace, i bon i kam long wol ia. Be tufala, mama mo boe, tufala i gat man blong lukaotgud long tufala from se Terri i bin stap long hospital finis. Mifala i filim proteksen blong Lod long laef blong mifala.
Jace i bon i kam long wol ia fo wik eli, mo oli putum hem long bigfala kea yunit. Mifala i kam hom, be bebi i no gat. Long manis we i folem, mifala i go evri dei long hospital. Laef long tetaem ia, i ron slo we i slo, i wan nogud taem.
Bakegen, mifala i witnesem han blong Lod. Jace i bin progres i go kasem poen ia we mifala i save tekem hem i kambak hom, we i wan gud taem, from mifala i kam wan olsem wan famli.
Afta, mifala i lanem se Jace i gat problem long bun blong hed blong hem, mekem se ol bun blong hed oli fas wanples kwik tumas mo i strong eli nomo. Risal blong hemia i we hed blong bebi bae i no save gro. Wan tritmen nomo i stap, i blong operetem mo karemaot wan bigfala pat blong bun blong hed blong Jace, hemia taem hem i jes gat tri manis nomo. Mifala i gotru long jalenj ia tru long prea mo ol prishud blesing. Bakegen, mifala i luk han blong Lod insaed long laef blong mifala. I gat ansa long prea. Ol blesing oli bin kamtru. Operesen i go gud. Laef i kam wan gud taem bakegen.
!Hemia wan ronron we i go antap mo i kam daon! Be Lod i bin tijim mifala long plante lesen tru long ronron o wokbaot ia. Mifala i bin save se Hem i stap wetem mifala long rod ia.
Josef I Bin Gat Ol Gud mo Nogud Taem
Joseph we Oli Salem I Go long Ijip, i kam long William Brassey Hole, © Look And Learn / Bridgeman Images
Taem yumi stap stadi long laef blong Josef long OlTesteman, yumi faenem se laef blong hem tu, i bin wan wokbaot we i go gud, gogo i kam nogud, gogo i kam gud bakegen, truaot long laef. Mo yumi lanem se Lod i bin stap wetem hem oltaem, tru ol taem ia we oli bin gud, mo olgeta we oli no bin gud.
Kot ia we Jekob i bin givim long Josef i bin wan naesfala simbol blong lav we Jekob i gat long Josef. Be tu, hem i stap olsem wan samting we i nogud long ol brata blong Josef, from i stap rimaenem olgeta abaot rilesensip we Josef i bin gat wetem papa blong hem.
Taem we ol brata oli bin go blong fidim ol animol blong papa blong olgeta, Jekob i bin askem Josef blong go jekem olgeta. Josef i bin go olsem we papa blong hem i askem hem. Be, i luk se hem i go lus long rod ia nao. Mekem se Lod i sendem wan man blong givim daereksen long Josef blong mekem se hem i save faenem ol brata blong hem (luk long Jenesis 37:15–17).
Taem we ol brata blong Josef oli mekem plan blong kilimded hem, i luk se i moa bitim wan janis we wan grup blong ol pipol oli jes pas i kam, we oli stap go long Ijip. Nao, oli nomo kilimded Josef, o oli nomo lego hem insaed long wan hol blong hem i ded, be ol brata blong hem oli salem hem i go long grup blong ol man ia. (Luk long Jenesis 37:25-28.)
Han blong Lod i bin kamaot klia bakegen taem we grup blong ol man ia oli salem Josef bakegen i go long Potifa, wan kapten blong ol gadman blong Fero. Iven taem hem i bin stap olsem wan wokman, o wan slef, Josef i bin tanem evri eksperiens blong hem i kam wan gud samting. Potifa i mekem hem i kam blong lukaotem evri samting long haos blong hem. Hem i putum evri samting we hem i gat i go long han blong Josef. (Luk long Jenesis 39:4.) Josef i bin wokbaot, i stap long wan nogud taem i go kasem wan gud taem. Naoia, hem i gat gud laef mo janis mo plante spesel janis insaed long haos blong Potifa.
Be, gudfala taem ia i no stap longtaem tumas. Taem we Josef i ronwe long ol nogud tingting blong waef blong Potifa, waef blong Potifa i poenem fingga long hem se Josef i mekem nogud long hem. Iven we toktok blong woman ia i rong, bae i posibol nomo long tetaem ia blong oli kilimded Josef. Be, long sam wei, oli bin sakem hem i go long kalabus nomo. Han blong Lod i protektem Josef bakegen.
Bigfala Strong Bilif
Sapos yu nao we oli sakem yu i go long kalabus from samting we yu no mekem, ?bae yu mekem wanem? Sapos i gat wan man we i gat risen blong slakem tingting mo i gat konkon fasin, hem i Josef ia nao. Bigfala foldaon ia, long hae gud taem we hem i bin stap long hem i go daon long nogud taem ia, bae i save mekem hem i tingting se: “?Wanem nao yus blong traem givim seves long God? Hem i stap wokem panisim mi nomo.” Be Josef i no gat konkon fasin, o i no blemem Lod, mo hem i no givap. Bigfala strong bilif blong hem i neva jenis, o foldaon.
Mo iven long ol tudak dei we hem i bin stap long kalabus, Lod i no bin lego Josef. Faswan, Lod i givim wan janis long Josef blong hem i talem mining blong ol drim blong man blong katem mit, mo man blong bekem bred (luk long Jenesis 40) Afta, sam yia afta, hemia i lidim hem blong gat janis blong talem mining blong drim blong Fero, mo Josef i bin talemaot mo luksave se paoa ia blong mekem hemia, i kam long God (luk long Jenesis 41:16). Fero i no putumbak Josef nomo, be tu, i “mekem hem i kam man blong rul ova long evri graon blong Ijip” (Jenesis 41:43). Afta we Josef i safa mo i gat hadtaem blong plante yia, God i mekem Josef i kam wan hae man long graon, we i kam nambatu afta long Fero—we i wan nara hae gud taem long laef blong Josef.
God I Minim Hemia blong Gud blong Yumi
Long en, Josef i bin mitim ol brata blong hem bakegen, olgeta ia we oli bin mekem plan agensem hem mo oli bin salem hem olsem slef i go. Hem i bin save kam wan nogud man. Hem i bin save blemem olgeta from “fasin blong mekem i no stret long man we i mekem man i kros,” we oli bin mekem long hem. 2
Be Josef i bin luksave se ol gud taem mo ol nogud taem, Lod i bin stap lukaot long hem long ol taem ia. Toktok we hem i bin talem long ol brata blong hem oli givim wan niu tingting long wei we Josef i andastanem ol samting ia:
“Yufala i mekem plan blong mekem i nogud long mi, be God i kapsaetem plan ya blong yufala, i mekem we gudfala samting i kamaot long hem. Hem i yusum plan ya blong yufala blong mekem plante man oli stap laef.
“I no gat samting blong yufala i fraet long hem. Bambae mi mi stap lukaot long yufala, mo long ol pikinini blong yufala. Nao long fasin ya, hem i stap toktok gud long olgeta, i mekem olgeta oli harem gud bakegen” (Jenesis 50:20–21).
Taem yumi stap gotru long ol gud taem mo ol nogud taem blong laef, hem i wan gudfala saen blong rimaenem yumi se God i minim hemia blong gud blong yumi. Lod i bin eksplenem semfala prinsipol ia long wan Josef long ol las dei:
“Sapos mi singaotem yu blong go tru long hadtaem; …
“Sapos man i talem se yu rong long evri kaen giaman rong; sapos ol enemi blong yu oli kam agensem yu; sapos oli pulumaot yu aot long sosaeti blong papa mo mama mo ol brata mo sista blong yu … mo oli pulum yu i go long kalabus, …
“ … nao yu mas save, boe blong mi, se evri samting ia bae i givim eksperiens long yu, mo bae i blong gud blong yu” (Doktrin mo Ol Kavenan 122:5–7).
Oltaem I Bin Gat Ol Taem we Oli Had
Taem we Terri mo mi i bin go tru long ol jalenj blong mitufala, mitufala i faenem kamfot long toktok ia we i kam long profet blong God:
“Mi wantem yutufala i save se, oltaem, i bin gat ol samting we oli had long laef long wol ia, mo bambae oltaem i gat. Be taem yumi save wanem we yumi save, mo taem yumi stap laef olsem we yumi sapos blong laef, i tru, i no gat ples, i no gat eskius, blong gat tu tingting mo fasin blong lusum hop. …
“ … Mi hop se yufala i no biliv se evri hadtaem blong wol ia, oli sakem i kam long taem blong yu; o yufala i no biliv se ol samting oli jes kam mowas long yuwan, o bae oli neva kam gud moa bakegen. Mi save talem stret long yufala se ol samting oli bin mowas long hemia, mo bae oli kam gud moa bitim hemia. Oltaem, oli kam gud moa—speseli taem we yumi stap laef mo stap lavem gospel blong Jisas Kraes, mo yumi givim wan janis long gospel ia blong i open bigwan olsem flaoa insaed long laef blong yumi.” 3
Aot long stori blong Josef, mo aot long ol nogud samting we oli stap hapen long wol ia raon long yumi, hem i isi blong luk se ol nogud samting oli hapen long ol gudfala pipol. Blong gat wan laef we i stret mo gud i no minim se bae yumi stap longwe long ol jalenj mo ol samting we i mekem yumi no hapi insaed long laef blong yumi. Be, semmak olsem we Lod i bin stap wetem Josef long evri samting we oli kam agensem hem, bae Hem i stap tu wetem yumi. Ol tes bae oli kam, we yumi no save ronwe long olgeta. Be sapos yumi go tru long olgeta wetem wan strong tingting blong lisingud long Hem, bae Lod i soem rod long yumi, mo bae i givim insperesen long yumi, semmak olsem we Josef i bin mekem.