“Bae Yumi Go Visitim Tempol,” Liahona, Maj/Epril 2022
Ol Voes blong Ol Lata–dei Sent: Ol Woman we Oli Gat Fet
Bae Yumi Go Visitim Tempol
Taem mi bin prea blong save olsem wanem mi save helpem mama blong hasban blong mi, mi tingbaot tempol.
Foto blong Bogota Kolombia Tempol we i kam long Ivan Ortiz Ponce
Long taem blong KOVID-19 wol sik, Bogota Kolombia Tempol i bin klos. From se mi nomo save go, samtaem, long maen blong mi, bae mi traem tingting se mi stap wokbaot i go tru long tempol, mi stap tingbaot seves we mi bin stap givim longwe olsem wan wokman blong tempol.
Mama blong hasban blong mi i bin sik tumas afta long KOVID–19 kwarantin i stat long Kolombia. Taem mi bin prea blong save hao mi save helpem hem, mi tingbaot tempol.
Taem mi tingting abaot tempol, mi bin filim se Tabu Spirit i talem long mi blong askem mama blong hasban blong mi blong hem i visit wetem mi, long maen blong hem, “wan long ol ples we oli moa naes long wol ia.”
Wetem wan voes, we i no strong, hem i ansa: “Yes.”
Mitufala i tingting long maen blong mitufala se mitufala i stat long hom blong hem long Medelin, i travel i go long hom blong mi long Bogota, mo afta, kasem tempol. Mitufala i tingting long maen se mitufala i go insaed mo givim seves insaed long tempol. Mitufala i tingting long maen se mitufala i stap sidaon tugeta insaed long selestial rum, talem wan prea blong tangkyu i go long Lod.
Afta long hemia, mitufala i prea long Papa long Heven se bae mama blong hasban blong mi, folem tingting blong Hem, bae i save karembak helt blong hem, mo bae i save wokbaot blong gobak long tempol. Hem i bin wan spesel tabu eksperiens we i bin mekem hem i kam strong moa, mo i bin leftemap tingting blong hem.
Wan long ol stori abaot Sevya we i stap tajem mi plante, i hapen long siti ia Kapaneam. Stori ia i stap tijim yumi se Lod i save blesem mo hilim ol narawan tru long help blong ol memba blong famli, mo tru long help blong ol fren.
Taem we oli pipol long Kapaneam oli bin save se Jisas i stap long wan haos, oli tekem wan man we i gat sik blong faol i go long hem.
“Be oli no save kam kolosap long Jisas … Nao oli go antap long haos ya, oli tekemaot smol haf blong ruf stret antap long ples ya we Jisas i sap long hem. … Oli karem sikman ya wetem bed blong hem we i stap slip long hem, nao oli slakem i godaon insaed long haos.
“Taem Jisas i luk bilif blong olgeta, hem i talem long sikman ia: ‘Mi mi talem long yu, yu stanap, yu karem bed blong yu, yu wokbaot yu gohom” (Luk long Mak 2:1–11.)
Semmak olsem man ia we i gat sik blong bodi i seksek, mama blong hasban blong mi i bin kasem hiling tru long paoa blong Sevya, hemia tru long wan prishud blesing mo tru long strong bilif blong hem, mo strong bilif blong famli mo ol fren.
Long ol taem ia we ol samting oli no stret gud, mi save se yumi save kasem help blong save wanem blong mekem blong mekem olgeta we oli stap long nid oli kam strong moa mo oli leftemap hed. Sapos yumi tanem yumi long Papa long Heven, mo oltaem tingbaot Hem mo Pikinini blong Hem, bae yumi save kasem pis, hop mo hiling.