“Stap Givim Seves tru long Ol Koling blong Jos,” Liahona, Maj/Epril 2022
Ol Besik blong Gospel
Stap Givim Seves tru long Ol Koling blong Jos
Ol lida blong Jos oli askem ol memba blong oli givim seves long ol spesifik wok we oli givimaot, we yumi save olsem “ol koling.” Ol koling oli givim janis blong helpem ol narawan mo blong kam kolosap moa long God.
Foto i kam long David Bowen Newton
Taem yumi wok long ol koling blong yumi, yumi stap help blong mekem wok blong God i kamtru. Yumi stap tijim ol narawan tu abaot Papa long Heven mo Jisas Kraes, mo yumi helpem olgeta blong kam kolosap moa long Tufala. Yumi tu, yumi kasem ol blesing taem yumi stap givim seves long wan fetful fasin.
Stap Kasem Koling
Olgeta we oli stap givim seves insaed long Jos, God nao i singaotem olgeta. Ol lida blong Jos oli prea from insperesen blong save huia blong askem blong givim seves long wanwan koling. Afta, wan lida i askem wan memba blong givim seves mo i eksplenem ol diuti blong koling ia. Long saed blong plante koling, oli stap sastenem ol memba long wan miting blong Jos. Ol memba blong wod o blong branj oli givim wan vot blong sastenem man. Hemia i minim se oli glad blong sapotem man o woman ia we oli singaotem hem. Afta long hemia, bae wan prishud lida i givim wan blesing long memba ia. Hemia oli singaotem se, setem apat. Bae memba ia i kasem atoriti blong mekem wok long koling ia, mo bae i kasem ol blesing blong helpem hem blong givim seves ia.
Ol Bisop
Wan bisop i lida blong wan wod. (Insaed long wan branj, branj presiden i semmak olsem wan bisop.) Stek presiden i givim nem long wan man we i klin inaf, we i gat prishud, blong oli singaotem hem i kam bisop. Fas Presidensi i apruvum koling ia. Afta, oli sastenem bisop, mo oli setem hem apat blong hem i givim seves. Mo tu, hem i kasem ol ki blong prishud, we i minim se hem i gat atoriti ia blong lidim wod. Olsem wan bisop, hem i givim seves mo hem i lidim evri memba blong wod.
Ol Presidensi
Ol kworom blong Prishud mo ol oganaesesen blong Rilif Sosaeti, Ol Yang Woman, Praemeri, mo Sandei Skul, i gat ol presidensi we i lidim wanwan long olgeta ia; plante taem i gat wan presiden mo tufala kaonsela blong hem. Ol presidensi blong kworom blong ol elda, stek presidensi nao i singaotem mo i setem olgeta apat. Bisoprik i askem ol memba blong oli givim seves long ol nara presidensi long wod mo i setem olgeta apat. Evri lida oli givim seves long ol memba we oli stap insaed long ol kworom mo oganaesesen blong olgeta. Oli givhan long ol memba mo lukluk long ol nid blong olgeta, mo oli helpem ol memba ia blong filim lav ia blong God.
Ol Nara Koling
Ol nara koling i gat , blong stap tij, stap help wetem miusik, stap kipim ol rekod, stap mekem plan blong ol aktiviti blong ol yut o ol pikinini, mo blong stap givim seves long ol nara wei. Wanwan koling insaed long Jos i impoten mo i givim ol memba wan janis blong givim seves long ol narawan, mo blong oli givim seves long God. Taem we yumi evriwan i wok tugeta blong mekem ol koling blong yumi, yumi mekem ol narawan oli kam strong moa, mo yumi helpem Jos blong i gro.