“?Yufala Tu I Wantem Gowe long Mi?,” Liahona, Maj/Epril 2022
Ol Voes blong Ol Lata–dei Sent: Ol Woman we Oli Gat Fet
?Yufala Tu I Wantem Gowe long Mi?
Afta we mi harem nogud long wan samting long wan aktiviti blong Rilif Sosaeti, mi mas mekem wan desisen.
Ol model nao oli stanap long ol foto ia
I no longtaem afta we mi joenem Jos, wan lida blong Rilif Sosaeti i stap mekem fani abaot sam fani situesen. Nao, hem i stat blong mekem fani abaot mi long fored blong evriwan. Mi no filim gud mo mi letem mi harem nogud from.
Fas tingting blong mi, i blong mi nomo gobak long wod ia. Mi openem ol skripja blong mi, mo mi traem blong faenem kamfot. Taem mi bin stap rid i go, mi kam krosem wan ves we Jisas i bin askem olgeta we ol tijing blong Hem i mekem olgeta oli harem nogud: “?Yufala tu i wantem gowe long mi?” (Jon 6:67).
Kwiktaem, insaed long maen blong mi, mi ansa: “!No! !Bae mi no gowe!”
Mi ringim presiden blong Rilif Sosaeti, we i talem se bae mi ringim sista ia we i bin mekem fani abaot mi. Mi ringim sista ia, mo talemaot ol filing blong mi. Mitufala i agri se, i gud blong save mekem fani, be yumi no sapos blong mekem fani o jikim wan we yumi no save long fored blong wan grup blong ol pipol. Mitufala i tokbaot tu abaot fasin blong stap lukaotgud long ol filing blong ol niu memba insaed long wod.
Mi gohed blong go long wod ia taem mi bin stap laef long siti ia. Mi bin gat plante gudfala eksperiens afta we mi bin jenisim laef blong mi i kam long gospel.
Long wokbaot blong mi blong winim ol samting we oli mekem mi harem nogud, mi bin faenem ol toktok ia blong ol lida blong Jos, we oli bin helpem mi.
“Sapos wan i talem o mekem wan samting we yu ting se i no stret i spolem man, fas wok i blong no akseptem blong harem nogud, mo afta, toktok long praevet, wetem ones fasin, mo tok stret wetem man o woman ia.” 1
“Mi promesem yu, se taem yu jusum blong yu no harem nogud … , bambae yu filim lav blong Sevya mo we Hem i agri wetem yu.” 2
Mi mi glad se mi jusum blong mi no aot long Jos from wan smol taem we wan i no bin lukaotgud. Mo mi mi glad blong stap wan memba blong Jos ia we i kambak, ples ia we mi kasem paoa blong stap fetful mo gohed blong stap long rod ia blong stap olsem wan disaepol. Mi laekem tumas ol advaes blong ol profet mo ol aposol, we oli stap tijim yumi olsem wanem blong fesem o mekem samting wetem ol brata mo sista blong yumi long gospel.
Mi save gohed blong stap fetful mo jusum blong no harem nogud from aksen o toktok blong wan. Mi save lukluk nomo long ol hadwok blong mi blong kam olsem Kraes, mo filim lav blong Sevya mo save se Hem i agri.
?Bae mi gowe? No. Mi gat wan testemoni se hemia i Jos blong Jisas Kraes we i kambak long wol tedei, mo Jos ia i gat “ol toktok blong laef we i no save finis” (Jon 6:68).