“Lo Mejān Anij ilo Mejān Rikōjrat ro Ad,” Liaona, M̧aaj./Eprōļ. 2022.
Lo Mejān Anij ilo Mejān Rikōjrat ro Ad
Katak kein n̄an anjo̧ ioon jab errā jān bok in Jenesis emaron̄ letok juon jon̄ak n̄an mour ko ad make.
Kōmeļeļe ko jān David Green
Āinwōt juon rijojomare jab errā ko, ikar atartar wōt ilo eļap mālōtlōt ikkijeen wāween n̄an ukōt jum̧we im kōjerbal kajim̧we ilo ad kalimjōk waanjon̄ak im katak ko an Jisōs Kraist ilo Kallim̧ur Ekāāl. Ijoke, Kallim̧ur Ekāāl ejjab wōt bok in jeje ko rekwojarjar me ekar tōl eō ilo aolep iiō in jerbal eo aō. Kallim̧ur M̧okta epād ie jet iaan katak ko rekōketak im rekailibōkbōk me emaron̄ jipan̄ kōj n̄e jej likūt kōj make ilo jab errā ko me rej kakkure kōj.
Ta in jab errā eo ej kakkure kōj? Ej n̄e jab maron̄ in ippān doon im ņamejļan jorrāān ko ippān ro jet ej tōlļo̧k kōj n̄an kōmetak ro jet ak kōj make.
Kōn jab errā in ej kakkure kōj ej itok juon mijak in metak jim̧or ilo juon m̧akūtkūt jej bōk koņaad ie im āinwōt juon tōprak in jab errā eo, juon mijak bwe rejjab iakwe kōj ak kalimjōk kōj ilo wāween eo jej kōņaan, im juon mijak in likjak n̄an kappukot wāween ko n̄an jorrāān ko me rej kaamjak kōj. N̄e jej kōtļo̧k bwe mijak en pād ippād, jejamin en̄jake ad bōk jipan̄ n̄an ņa mejļan jorrāān ko me jej jelm̧ae im ekkā an itok en̄jake in ejjeļo̧k kōjatdikdik, jook, ak ban jeor jāni.
Kain jab errā rot in ej letok en̄jake eo ekauwōtata kōn elōn̄ armej, eo kōn etke jej etal im kōjerbal jekjek in jab errā ko me rejjab lukkuun jipan̄ āinwōt kōjekdo̧o̧n, kakkar n̄an, ak jie āinwōt juon wāween n̄an kajjieon̄ kōm̧m̧an bwe en jako jab errā eo. Ekaburom̧ōjm̧ōj, ilo jab errā eo me ej kakkure kōj, ejjeļo̧k juon iaan uwaak kein remaron̄ jerbal n̄ani.
Aaet, jej aikuj kōjekdo̧o̧n akwāāl (lale 3 Nipai 11:29). Ak jej aikuj jab kōjekdo̧o̧n, ebweer jāne, ak kakkure armej ro jej jab errā ippāer. Ijjeļo̧kin, jej aikuj ekkatak wāween n̄an iakwe armej ro jej jab errā ippāer. Ej aikuji mour kōn iakwe ejāmin jako, iakwe eo erreo an Kraist, n̄an ro rikōjrat kōj (lale Moronai 7:47).
Jisōs ekar katakin bwe iakwe ro rej iakwe kom̧ epidodo. Ej barāinwōt ba, “A Ij ba n̄an kom̧, kwom̧in yokwe ro ri kōjdate kom̧, im jar kōn ro rej mātōrtōr e kom̧” (Matu 5:44). Rilo̧mo̧o̧r ekar kajjitōkin kōj n̄an iakwe āinwōt An iakwe im wānōk āinwōt E (lale Jon 13:34; 3 Nipai 12:48). Menin emaron̄ meļeļe n̄an lukkuun m̧ool in iakwe ro jet men̄e jet iien iakwe emaron̄ likūt kōj ilo kauwōtata. Jemaron̄ āliklik kōnke jej ilo piktokid make kōjekdo̧o̧n kauwōtata ko. Ak kāalet n̄an iakwe ro rej kōmetak kōj ej kōm̧m̧an bwe jen eļļā jān mijak im obrak kōn iakwe em̧ool ej jāmin jako.
Kain iakwe rot in ejjab aikuj mijak ilo jelm̧ae jab errā ko. Ej kūr n̄an kōj bwe jen leļo̧k kōj make n̄an ro pād ilo jab errā ilo juon wāween eo me “ej meanwōd, im e jouj; … e jab kappukot men ko an, rejjab kaillu e, e jab ļōmņak nana; … ej kijenmej ilo men otemjej, ej tōmak men otemjej, ej kōjatdikdik e kōn men otemjej. … Yokwe e jāmin jako” (1 Korint 13:4–5, 7–8). Iakwe eo em̧ool an Kraist ej kwaļo̧k kain iakwe in kōn ejjeļo̧k kajjitōk ke armej ro ilo turājet me rej jab errā renaaj kōm̧m̧ane ejja menin wōt.
Iakwe ej kōtļo̧k bwe jen kalimjōk ro jeid im jatid me jej jab errā ippāer kōn alikkar eo bwe aikuj ko aer im ikdeleel ko eļap tokjāer jān ko ad make, mekarta wāween aer kalimjōk kōj. Jenaaj kōm̧m̧ane jabdewōt men eo jemaron̄ kōm̧m̧ane n̄an kappukot wāween ko me remaron̄ kakke aikuj ko aer im barāinwōt ko ad make.
Ruo bwebwenato ko jān Kallim̧ur M̧okta rej waanjon̄ak ko rem̧m̧an kōn iakwe in.
Iso im Jekob
Iso im Jekob rej Bakwij Doon, jān Robert T. Barrett
Ilo Jenesis 25, jej jelm̧ae juon jab errā ilo baam̧le ikōtaan jem̧jāti ro ruo, Iso im Jekob, ļaddik ro nejin Aisak. Iso ekar wia kake jolet ko an n̄an Jekob kōn juon booļ in juup (lale Jenesis 25:30–31). Tokālik, ļoor kapilōk eo an jinen, Jekob ekar m̧one Iso bwe en bōk kōjeraam̧m̧an eo āliktata an Aisak (lale Jenesis 27:6–29).
Iso ekar dike Jekob im kar kallim̧ur bwe enej m̧ane. Jekob ekar ko bwe en tin kiki ippān rikooreņ etan Leban. (Lale Jenesis 27:41–45.) Āliktata Jekob ekar deļo̧n̄e ilo juon tūrabōļ ippān jemān im kar kipel e bwe en jepļaak n̄an kapijuknen eo an (lale Jenesis 31). Jekob ekar jeļā bwe ioon doon ippān Iso, eo ekar wōr juon an jarin tariņae ekilepļo̧k. Ekar mijak kōn mour eo an im mour eo an baam̧le eo an (lale Jenesis 32:7–8).
Ilo raan eo rekar tin ioon doon, Jekob ekar wiakiļo̧k eļap kout, camel, im kau, sip, im donkey āinwōt menin letok in aenōm̧m̧an. E ekar bun̄ badikdik jiljilimjuon kōttan ke ej epaakeļo̧k ļeo jein. Iso ekar ilbōk ilo juon wāween me Jekob ekar jab kōtmene. Iso ekar jan̄, jiburlep ļeo jatin, im ekar ba n̄an e bwe ekar ejjeļo̧k aikuj n̄an leļo̧k aeņōm̧m̧an.
Jekab ekar im̧we kōn iakwe eo an Iso im ekar uwaak:
“Jaab, ij akweļap n̄an eok, eļan̄n̄e iar lo jouj im̧aan mejam̧ kiiō, innām kwōn bōk aō men in lewōj jān peiū, bwe kiiō iar lo mejam̧ āinwōt in kar lo mejān Anij, im kwōj m̧ōņōņō kake eō.
“Kwōn bōk aō jeram̧m̧an eo ij lewōj n̄an eok, bwe Anij ear jouj n̄an eō, im I bwe kōn ko jet. Im ear akweļap n̄an e, im ear bōke” (Jenesis 33:10–11).
Jilu Wāween Ko Jej Aikuji n̄an Mour ilo Aenōm̧m̧an
Jekob ekar kakobaik juon jon̄ak in iakwe ijin me ikar lo bwe eļap an wājepdik n̄an kūr n̄an kōm̧anm̧an aolep men ippān ro jekar bōd ņae ak rekar bōd ņae kōj.
Sam Ko 85:10 ej kōmeļeļeiki jekjek in kōkm̧anm̧an aolep men: “Tūriam̧o im m̧ool raar wōnm̧ae doon, wānōk im aeņōm̧m̧an raar mejenmaik doon.” Kōm̧m̧an ko an Jekob im Iso n̄an kōm̧m̧an aeņōm̧m̧an rej ioon jekjek ko me pād ilo bok in Sam ko.
Ebōk peran n̄an Jekob im Iso n̄an kile m̧ool eo ke rekar jab jet rikōjrat—rekar jet brother. Ebōk rūriam̧o n̄an jeorļo̧k an doon bōd. Ebōk mour jim̧we—kain kajim̧we rot in me ej kajim̧weik ta eo me kōj ak ro jet rekar kōm̧m̧ane ebōd—n̄an Jekob n̄an leļo̧k Ijo juon m̧ōttan in ta eo me ekar jeraam̧m̧an kake. N̄e aolep m̧ōttan kein jilu rej pād, ej kōm̧m̧an bwe jen mour ilo aeņōm̧m̧an.
Jemaron̄ ļoor ejja jon̄ak in wōt ilo mour ko ad.
N̄e jej pād ilo jum̧ae ko rej kakkure kōj, mijak in jum̧ae ko ad im d mijak kōn ro jet emaron̄ kōm̧m̧an bwe jen kōm̧m̧an ekkar n̄an wāween ko me rej kōm̧m̧an men ko nana ļo̧k wōt, ejjab em̧m̧anļo̧k. Ad kajjieon̄ kōmeļeļeik jabdewōt men ko jemaron̄ kōm̧m̧ani n̄an karo̧o̧llikļo̧k iminene eo me ej kakkure kōj eban jerbal. Jemaron̄ jab lōke ke ro jet remaron̄ oktak.
Ijoke, waanjon̄ak eo an Jekob ej bar letok n̄an kōj juon wāween kōn kain jum̧ae rot in. Jekob ekar jelm̧ae an mijak brother ro an im mijak in jum̧ae eo an ippān. Ekar ļapļo̧k wōt an ļōmņak kōj “kōjparok eo am” jān an “kōjparok e make” ilo iien eo, bwe en maron̄ oktak n̄an brother eo an, leļo̧k n̄an e m̧ool im jim̧we kōn jabdewōt bōd ko ekar kōm̧m̧ani. Būruōn Iso, kar juon ekar kōņaan m̧an Jekob, ekar med būruōn; ekar bar en̄jake tūriam̧o im aenōm̧m̧an. Jekob ekar lo juon wāween n̄an iakwe rikōjrat ro ad im, ilo ad kōm̧m̧ane menin, jekar loe “mejān Anij” ej reiliktak im kalimjōke e.
Jekdo̧o̧n mijak ko jej en̄jakei ilo ad kajjieon̄ jelm̧ae jum̧we ilo wāween in, eļapļo̧k an wājepdik ilo ad ukōt jum̧ae rot jān jabdewōt men. Iakwe āinwōt Kraist ej ejaake jikin n̄an kōj bwe jen lukkuun loe im kalimjōk armej ro me jej apan̄ kake ilo juon wāween eo me enej ukōt kōj im er jim̧or.
Josep im Bratōr ro An
Josep jān Ijipt, jān Michael T. Malm
Juon epepen ālkin Jekob, jej loe bar juon waanjon̄ak ekajoor kōn iake jān diktata eo jatin Jekob etan in Josep.
Bratōr ro an Josep me rekar ebanban rekar wia kake Josep bwe en pād ilo kamakoko ke ej dik. Āinwōt Iso, brother ro an Josep ekar en̄jake bwe jemāer ekar wōr an rutiej im bwe Josep im bwe ekar ļap an utiej. Josep ekar en̄taan eļap kōn nana ko an brother ro an n̄an e. Ekar jepeļļo̧k jān baam̧le eo an ium̧win elōn̄ iiō ko, jujen erom̧ juon rijerbal, im kar kalbuuj ium̧win juon tōre. Eļaptata, Irooj ekar jipan̄ e eļļā jān apan̄, im ekar erom̧ juon ritōl ekajoor ilo Ijipt. (Lale Jenesis 37–45.)
Ļōmaro jein im jatin rekar en̄taan im, ilo juon iien n̄ūta, rekar itok n̄an Ijipt, kwo̧le im aikuj jipan̄. Ke rekar jeļmaeiki Josep, rekar jab kile e im rekar akweļap n̄an bōk jipan̄.
Josep ekar wōr an maron̄ n̄an joļo̧k brother ro an ilo kalbuuj bwe en maron̄ joļo̧k kalikjōkļo̧k im kōm̧m̧an jim̧we n̄an er. Ekar ta eo ekar kōņaan im ejejjet n̄an e. Ekar kālet ijeļo̧kin n̄an kōjerbal jouj—n̄an jeorļo̧k bōd, n̄an iakwe er.
“Kom̧in ruwaaktok n̄an eō,” ekar akweļap n̄an er. “Im raar ruwaakļo̧k. Im ear ba, N̄a Josep, jatōmi, me kom̧ ar wiakake n̄an Ijipt.
“Innām kiiō kom̧win jab būrom̧ōj, im jab āliklik, kōn ami kar wiakake eō n̄an ijin; bwe Anij ear jilkintok eō im̧aami bwe in kōjparok mour.” (Jenesis 45:4–5).
Josep ekar jab jeorļo̧k wōt an brother ro an ak kekar lo un ko n̄an kaļōk ak em̧m̧an ļo̧k eo ilo jum̧ae ko aer. Ekar kile bwe pein Anij ekar pād ilo aolep men im bwe jekdo̧o̧n en̄jake ko jej jelm̧aeiki, “Anij ear jilkintok eō im̧aami bwe in kōjparok ineōmi i laļ, im bwe in lo̧mo̧o̧remi kōn lo̧mo̧o̧r eļap” (Jenesis 45:7).
Bar juon alen, juon jon̄ak eo me eiten āinwōt emaron̄ pād wōt ilo mour ko ad n̄e jej kile metak in jum̧ae emaron̄ tōl kōj n̄an juon tōprak eo me enaaj kōkajoorļo̧k baam̧le ko ad im jukjuk in pād ko eļan̄n̄e jenaaj ippān doon im ņa mejļan.
Aolep kōj jenaaj en̄jake jum̧ae. Enaaj kōmetak. Jet iien elukkuun em̧m̧an. Aolep iien ij bwilōn̄ kōn metak ko an ro jet me rej en̄jaki n̄e jej pād ilo jum̧ae, eļaptata ņae ro rejitōnbōro ippād. Ijoke, metak im mijak rejjab aikuj pād ilo jem̧ļo̧kin bwebwenato eo.
Jemaron̄ kālet n̄an kalimjōk jum̧ae im armej ro rokkotaktak me jej jum̧aeiki er, eļapļo̧k āinwōt kar Josep. Jemaron̄ kālet n̄an kōjekdo̧o̧n illu, inepata, im ņa ruōn ro jet ak jen iakwe rikōjrat ro ad.
Jemaron̄ kālet iakwe ijjeļo̧kin mijak im loe—āinwōt kar Jekob, Iso, Josep, im brother ro an—bwe rikōjrat ro ad rej brother im sister ro ad. Ilo ad kajjieon̄ kōm̧m̧an jokņe ippāer, jej barāinwōt maron̄ lo mejān Anij.