“Inaaj ke ilo̧k?,” Liaona, M̧aaj./Eprōļ. 2022.
Ainikien Armej ro Rekwojarjar ilo Raan Ko Āliktata: Kōrā in Tōmak
Inaaj ke Ilo̧k?
Ālkin aō kar ļaktip ilo juon iien m̧akūtkūt an Doulul eo an Kōrā ro, ikar kālet bwe in kōm̧m̧ane.
Kwaļo̧k kōn waanjon̄ak
Ejjab to ālkin aō kar kobatok ilo Kabun̄ in, juon ritōl an Doulul eo an Kōrā ro rekar kōm̧m̧an kōjak kōn jekjek ko. Ejjab to ekar jino an kōm̧m̧an kōjak kōn n̄an im̧aan mejān aolep. Ikar en̄jake an jab koņ aō pād im kōtļo̧k bwe in ļaktip.
Ļōmņak eo aō jinointata kar bwe in jab bar jepļaak n̄an ward eo. Ikar kōpeļļo̧k bok ko aō rekwojarjar, kajjieon̄ kappukot aeņōm̧m̧an. Ilo aō kar riit, ikar jelm̧ae juon eoon ijo Jisōs ekar kajjitōk ippān ro ekar ļaktip ippāer kōn katak ko An, “Kom̧ barāinwōt kōņaan ilo̧k ke?” (Jon 6:67).
Ikar kajju uwaake ilo kōļmenļo̧kjeņ, “Jaab, ijamin bar ilo̧k!”
Ikar kūr būreejtōn eo an Doulul eo an Kōrā ro, eo me ekar letok ļōmņak in bwe in kūr sister eo me ekar kōm̧m̧an kōjak kōn n̄a. Ikar kūr eō im kwaļo̧k en̄jake ko aō. Kōm kar bōktok jem̧ļo̧k eo bwe juon kōm̧m̧an kōjak em̧m̧an ak jejjab aikuj kōm̧m̧an kōj kōn bar juon armej jejjab jeļā kajjien im̧aan mejān juon kurup in armej. Jekar barāinwōt kōnono kōn an pidodo an membōr ro rekāāl ilo ward eo ļaktip.
Ikar wōnm̧anļo̧k wōt im pād ilo ward eo ke ikar jokwe ilo jikin eo. Ekar bwijin aō en̄jake rem̧m̧an ālkin oktak tok eo aō n̄an gospel in.
Ilo iaļ eo aō make n̄an eļļā jān ļaktip, ikar lo naan ko relukkun jipan̄ jān ritōl ro ad ilo Kabun̄ in:
“Eļan̄n̄e juon armej ej ba ak ej kōm̧m̧ane juon men eo jej kile bwe ej kainepataik kōj, eddo eo ad jinointata ej n̄an m̧akoko in bōk ļaktip eo innām kōnono ippān makeļo̧k iaan, m̧ool, im kaju ippān armej eo.” 1
“Ij kallim̧uri kom̧ ilo ami kālet bwe kom̧ en ļaktip … , kwonaaj en̄jake [iakwe eo an] Rilo̧mo̧o̧r im an kōmālim.” 2
Ij kam̧m̧olool bwe ikar kālet bwe in jab etal jān Kabun̄ in kōn juon naan ejjab menin inepata. Im ij kam̧m̧olool bwe ij juon membōr in Kabun̄ in me em̧ōj an jepļaaktok, ijo ij bōk kajoor n̄an erom̧ ritōmak im wōnm̧aanļo̧k wōt ilo iaļan rikaļoor. Ij kam̧m̧olool kōn naan in kapilōk ko an rikanaan im rijilōk ro, ro rej katakin kōj wāween ad jerbal ippān bratōr im sister ro ad ilo gospel in.
Imaron̄ wōnm̧aanļo̧k wōt ilo aō tōmak im kālet bwe in jab ļaktip. Imaron̄ mije wōt kijejeto ko aō make bwe in erom̧ āinwōt Kraist im en̄jake iakwe eo an Rilo̧mo̧o̧r im an kōmālim.
Inaaj ke ilo̧k? Jaab. Ewōr juon aō naan in kam̧ool bwe Kabun̄ eo an Jisōs Kraist me em̧ōj an jepļaaktok n̄an laļ in rainin im bwe ekar wōr “naan ko an mour indeeo” (Jon 6:68).