“Kūr Eō M̧okta,” Liaona, M̧aaj./Eprōļ. 2022.
Ainikien Armej ro Rekwojarjar ilo Raan Ko Āliktata: Kōrā in Tōmak
Kūr Eō M̧okta
Im̧ōņōņō bwe ikar jab luuji iien eo aō em̧m̧an n̄an jipan̄ juon sister eo ekar aikuji eō im ro me ikar aikuji er.
Ke ikar juon m̧am̧a em̧m̧an dettan ippān nin̄nin̄ eo jinoin nejū, ļeo pāleeō ekar pād wōt ilo kaļaj. Kōm kar jim̧or jerbal part time n̄an kōm̧m̧an jeen bwe kōm en jab m̧uri.
Erreim̧aanļo̧k n̄an iien raan in kakkije eo, ikar karōke bwe in alooje juon pijaan alooj in jem̧aan ilo tipi eo. Kar m̧okta kar DVD ko ak streaming service ko.
Pijaan alooj in ekar jino ilo juon iien ejejet—10:00 a.m.—ke ļaddik eo nejim ej kiki. Ekar em̧m̧an tata ippān Cary Grant, juon iaan star ro an Amedka ilo pija.
Bon̄on eo m̧okta jān kar kōtmene raan in kakkije eo, Būreejtōn eo an Doulul eo an Kōrā ro kar kūr e. Juon sister ilo ward eo am ekar en̄taan kōn an mej rājetin im ekar aikuj lale ilo raan eo tok juon m̧ae ļaddik eo nejin enaaj jepļaak jān jerbal.
“Inaaj kōm̧m̧an menin ippa make, ak ewōr make aō rikarawaan,” būreejtōn eo an Doulul eo an Kōrā ekar ba. Ekar kōmeļeļeiki bwe ekar ejjeļo̧k bar juon n̄an kajjitōk im jipan̄ lale ļaddik eo nejim ilo aō bar lale sister eo aō. Ikar m̧akoko ilo aō kar errā.
Jibbon̄on eo tok juon, ikar likitļo̧k ļaddik eo nejim im etal im loļo̧k sister eo aō. Etan in Louise, im ikar en̄jake an kajju wōr aer iakwe n̄an e. Ekar bwe an rūtto n̄an erom̧ juon jibū, eo ej kab baj jakoļo̧k.
Ikar jipan̄ Louise kanukuki im kōpooje m̧abun̄ eo an. Ekar kōmeraikļo̧k n̄an juon jea im kar ukōt tok tipi eo. Ejjab to ekar 10:00 awa jibbon̄. Ke ej ukōt jāņōļ ko kōn remote eo, ekar kajjitōk, “Ejjeļo̧k tokjen tipi in ejjab maron̄ letok jabdewōt.”
Ikar āliklik im ikar ba, “Ewōr juon pijaan Cary Grant ilo jaņōļ 11.”
“M̧ool ke?” ekar kajjitōk. “Em̧m̧an ippa Cary Grant!”
Kōm kar alooje pija eo im m̧ōņōņō kake. Ālkin wōt, ekar kwaļo̧k jet men kōn mour eo an ke ekar detta wōt. Ekar ba n̄an eō kōn ļaddik eo nejin, im ikar ba kōn ro nejū. Ekar kōnono kōn Kabun̄ in im wāween an o̧o̧n̄ kake.
Ke ļaddik eo nejū ekar jepļaak, ikar kallim̧uri bwe inaaj bar jepļaak. Ikar ba ļo̧k n̄an būreejtōn eo an Doulul eo an Kōrā ro n̄an kūr eō m̧okta eļan̄n̄e Louise ekar aikuj jabdewōt armej n̄an jipan̄.
Jet iien ilo wiik ko tok ruo, Louise ekar en̄taan kōn bar juon mej rājet im ekar jako m̧okta jān an kar wōr aō iien in bar loļo̧k e juon alen. Kōm kar joļo̧k iien ippān doon ium̧win ruatimjuon awa im juon pijaan alooj, im ekar erom̧ juon m̧ōtta eo ejitōnbōro. Emakijkij aō ļōmņak kōn e.
Ij kam̧m̧olool bwe ikar jab luuji iien eo aō em̧m̧an n̄an jipan̄ juon sister eo ekar aikuji eō im ro me ikar aikuji er, men̄e ikar jab kile.