“Irooj Ekar Pād Ippān Josep,” Liaona, M̧aaj./Eprōļ. 2022.
Itok Ļoor Eō
Irooj Ekar Pād ippān Josep
Ilo ad mour ilo juon em̧m̧an im nana, jemaron̄ ekkatak eļap jān waanjon̄ak eo an rikanaan Josep eo etto.
Josep ej Kōmeļeļeik Ettōņak eo an Pero, jān Jean Adrien Guignet, Musée des Beaux-Arts, Rouen, France / Bridgeman Pija ko
Jejjo iiō ko rem̧ootļo̧k, baam̧le eo am rekar lukkuun m̧ōņōņō ke kōm kar jeļā bwe kōrā eo pāleeō, Terri, ekar bar bōroro̧ kōn ajri eo kein kemān nejim. Ijoke, jejjo allōn̄ ilo an kar bōroro̧, jekar jeļā ke Terri ekar wōr juon an nan̄inmej ekauwōtata. Kālet eo em̧m̧an tata kar n̄an e bwe en deļon̄ ilo aujpitōļ, ijo emaron̄ bōk jipan̄ im kōjparok ie. Kar kadeļon̄e ilo aujpitōļ ilo juon kijejeto n̄an kōjparok an bōroro̧ ak lojeen jon̄an wōt eo remaron̄e.
Menin ekar erom̧ juon marok im iien epen n̄an baam̧le eo am, eļaptata n̄an Terri. Ekar en̄jake an ajimakeke. Im ikar jelm̧ae idajon̄jon̄ in n̄an lale jilu ajri jiddik ilo aō jerbal im barāinwōt jerbal āinwōt juon bisop. Mour in etarpok im pen.
Ilo an ajimakeke, Terry ekar lo aeņōm̧m̧an ilo naan ko an juon al aibojooj.
Ij aikuj am̧ pād ilo aolep awa.
Bwe jouj eo am̧ emaron̄ bōbrae kajoor an rikapo eo?
Wōn, āinwōt kwe make, imaron̄ bōk tōl im dim wōt?
Buļōn Kōdo̧ im Det, Irooj, Pād wōt Ippa! 1
Irooj ej Pād Ippād
Āliktata, ekar aikuj bwe en m̧wijm̧wij n̄an kadiwōjtok ļaddik eo nejim etan Jace. Ak jim̧or jinen ajri in im ļaddik eo nejim rekar pād ilo kōjparok kōnke Terri ekar kadede pād ilo aujpitōļ. Kōm kar en̄jake kōjparok eo an Irooj ilo mour ko am.
Jace ekar ļotak emān wiik m̧okta jān lukkuun iien eo an im kar likūt ilo jikin rinan̄inmej edo̧lo̧l eo an nin̄nin̄. Kōm kar ro̧o̧l tok n̄an m̧weo ak nin̄nin̄ ekar pād wōt. Ilo allōn̄ eo tok juon, kōm kar kōm̧m̧an tūrāāp eo am n̄an aujpitōļ. Mour in ekar pād ilo juon tōre enana.
Bar juon alen, ijoke, kōm kar kam̧oole pein Irooj. Jace ekar eddōkļo̧k im tōpar jon̄an eo me jemaron̄ kiiō bōk n̄an m̧weo, juon wāween eo em̧m̧an ilo ad koba ippān doon āinwōt juon baam̧le.
Innem kōm kar jeļā bwe Jace ekar wōr ippān nan̄inmej jorrāān ilo di in bōran, juon jekjek ijo di ko ilo bōrān rekar jab lukkuun em̧m̧an aer koba ippān doon. Alikkar eo ej bwe bōran nin̄nin̄ eo emaron̄ jab kilepļo̧k. Unokan wōt ej bwe ej aikuj m̧wijm̧wij im joļo̧k juon iaan m̧ōttan eo ekilep ilo ilo ļat in bōrān Jace n̄e etōpar jilu an allōn̄. Kōm kar kijenmej kōn idajon̄jon̄ in am ilo am kar jar im bōk kōjeraam̧m̧an ko an priesthood. Bar juon alen kōm kar loe pein Irooj ilo mour ko am. Jar ko rekar uwaak. Kōjeraam̧m̧an ko rekar kūrm̧ool. An kar m̧wijm̧wij eaar lukkuun em̧m̧an! Mour eo ekar tōpar juon jikin ilōn̄tata bar juon alen.
Āinwōt ad iuwe ilo juon roller coaster! Ak Irooj ekar katakin kōj elōn̄ katak ko kōn iaļ in. Kōm kar jeļā bwe E ekar pād ippām ilo iaļ in.
Josep Ekar Jelm̧ae Em̧m̧an im Nana
Kar Wiakake Josep ilo Ijipt, jān William Brassey Hole, © Look And Learn / Bridgeman Pija ko
Ilo am kar ekkatak kōn mour eo an Josep ilo Kallim̧ur M̧okta, jej lo bwe mour eo an, barāinwōt ekar juon iaļ jān em̧m̧an n̄an nana im bar em̧m̧an ilo mour. Im kōm kar ekkatak bwe Irooj ej pād ippān aolep iien, men̄e em̧m̧an ak nana.
Kope eo me Jekob ekar leļo̧k n̄an Josep ekar juon kōkaļļe eo aibojooj kōn iakwe eo an Jekob im Josep. Ak ej barāinwōt jerbal āinwōt juon kein kakeememej n̄an bratōr ro an Josep kōn jem̧jerā eo ikōtaan Josep im jemān.
Ke bratōr ro rekar naajdik menin mour ko nejin jemāer, Jekob ekar kajjitōk bwe Josep en etal im lali. Josep ekar etal āinwōt kar ba n̄an e. Ijoke, ej waļo̧k ke ekar jebwābwe ilo iaļ eo ļo̧k. Kōn menin Irooj ekar jilkinļo̧k juon em̧m̧aan n̄an tōl e Josep bwe en maron̄ kappukot bratōr ro an (lale Jenesis 37:15–17).
Ke ļōm̧aro jein im jatin Josep rekar kattinoik aer tin m̧an e, āinwōt kar jide bwe juon ri wia eo ej ito itak en kar ioon er ilo iaļ eo aer ļo̧k n̄an Ijipt. Ijjeļo̧kin an m̧an Josep, ak etal jān e bwe en mej ilo juon ron̄, ļōm̧aro jein im jatin rekar wia kake n̄an riwia in ej ito itak. (Lale Jenesis 37:25-28.)
Tōl eo an Irooj ekar kam̧ool bar juon alen ke ri wia eo me ej ito itak kar wia kake Josep n̄an Potipar, juon kapen an ri waj eo an Pero. Āinwōt juon rijerbal, Josep ekar ukōt aolep en̄jake ko n̄an juon men em̧m̧an. Potipar ekar kōm̧m̧an bwe Josep en waje m̧weo m̧ōn. Ej likūt aolep men ko an ilo pein Josep. (Lale Jenesis 39:4.) Josep ekar etal ilo iaļ eo an ļo̧k jān juon mour enana n̄an juon mour em̧m̧an. Ekar kiiō m̧ōņōņō kōn iien ko rem̧m̧an ilo m̧weo im̧ōn Potipar.
Ijoke, mour in em̧m̧an ekar jab to kitien. Ke Josep ekar ko jān manit jekkar ko an kōrā eo pāleen Potipar, ekar ņa ruōn kōn kakkure kien erreo. Men̄e ekar jab m̧ool an ņa ruōn, emaron̄ kar pidodo aer kar kajju m̧an Josep. Ej juon kabwilōn̄lōn̄ bwe, ijjeļo̧kin,rekar kalbuuji. Pein Irooj eaar lukkuun kōjparok Josep bar juon alen.
Tōmak Ekabwilōn̄lōn̄
Eļan̄n̄e kwar juon eo me ejjeļo̧k ruōm̧ ak kar likūt eok ilo kalbuuj, ta eo kwonaaj kar kōm̧m̧ane? Eļan̄n̄e jabdewōt en kar wōr unin an inepata im illu, en kar Josep. An kar oktak mour eo an jān em̧m̧an n̄an nana emaron̄ kar pidodo an kōm̧m̧an bwe en ļōmņak, “Ta unin ad kajjieon̄ jerbal n̄an Anij? Aolep men ko Ej kōm̧m̧an ej kajeik n̄a.” Ak Josep ekar jab inepata ak ņa ruōn Irooj im ekar jab ebweer. Tōmak eo an ekabwilōn̄lōn̄ ekar jab m̧ōjņoļo̧k.
Im men̄e ilo raan ko remarok ilo jikin kalbuuj, Irooj ekar jab kōjo̧o̧ļ Josep. Moktata, Irooj ekar letok juon iien em̧m̧an n̄an Josep bwe en ukōt ettōņak eo an rikarejar eo im ri kōmat eo (lale Jenesis 40). Innem, jejjo iiō tokālik, ke menin ekar tōl n̄an iien eo em̧m̧an n̄an ukōt ettōņak eo an Pero, Josep ekar kile bwe maron̄ eo n̄an kōm̧m̧ane ekar itok jān Anij (lale Jenesis 41:16). Ejjab men eo wōt Pero ekar kōm̧m̧ane ilo an kar kadiwōje, ak barāinwōt “ekar kōm̧m̧an bwe en tōl ilo aolepān āneen Ijipt” (Jenesis 41:43). Ālkin an Josep kar en̄taan im apan̄ ium̧win elōn̄ iiō ko, Anij ekar kōmaron̄e Josep bwe en erom̧ juon armej eo enej ļap tokjen ilo āne eo, kein karuo tok jān Pero—bar juon mour em̧m̧an ilo mour eo an Josep.
Anij Ej Kōm̧m̧ane Men Kein n̄an Em̧m̧anļo̧k eo Ad
Josep ekar āliktata bar ioone bratōr ro an, ro me rekar pepe nana n̄an e im wia kake bwe en pād ilo kamakoko. Emaron̄ kar lukkuun inepata. Emaron̄ kar ņa ruōer kōn aer “illu kōn kalijōkļo̧k” rekar kōmetak e. 2
Ak Josep ekar kile bwe em̧m̧an im nana ko ilo mour eo an, Irooj wōt ej reitok im loe im ej jipan̄ e. Ennaan eo an n̄an bratōr eo an ej bōktok en̄jake n̄an jeļā in:
“A kōn kom̧, kom̧ ar ļōmņak nana ņae eō, a Anij ear pepe bwe en em̧m̧an, bwe en waļo̧k, āinwōt rainin, n̄an kōjparok elōn̄ armej ilo mour.
“Innām kiiō kom̧win jab mijak: inaaj naajdik kom̧ im ro nejimi. im ej kaaeņōm̧m̧an er, im em̧m̧an an kōnono n̄an er” (Jenesis 50:20–21).
Ilo ad mour ilo mour in me em̧m̧an im nana, ej juon kakeememej em̧man, bwe Anij ej kōmmani men kein n̄an em̧m̧anļo̧k eo ad. Irooj ekar kōmeļeļeiki ejja pedped in katak in wōt n̄an Josep eo me ilo raan ko āliktata:
“Eļan̄n̄e kar kūr n̄an debļo̧ke en̄taan; …
“Eļan̄n̄e kwe kar ņa ruōm̧ kōn wāween riab otemjeļo̧k; eļan̄n̄e rikōjdat ro am renaaj wōtļo̧k ioom; eļan̄n̄e rej kekōļļo̧k eok jān jukjuk in pād eo an jemam̧ im jinōm̧ … im iberļo̧k eok n̄an kalbuuj, …
“… Kwōn jeļā, nejū m̧aan, bwe aolep men kein otemjeļo̧k renaaj lewōj n̄an eok imminene, im naaj n̄an em̧m̧anļo̧k eo am” (Katak im Bujen Ko 122:5–7).
Aolep Iien Ej Wōr Men ko Reppen
Ke Terri im n̄an kōmro kar ioon idajon̄jon̄ kein, kōm kar en̄jake kaeņōm̧m̧an ilo naan in jān juon rikanaan an Anij:
“Ikōņaan bwe kom̧ en jeļā ke enej bar wōr wōt iien ko reppen aolep iien ilo mour in, im enaaj bar wōr wōt. Ak ilo ad jeļā ta eo jejeļā, im mour āinwōt ad aikuj mour ie, ejjeļo̧k bar juon jikin, ejjeļo̧k jekpen ņae, kōn inepata im burom̧ōj. …
“… Ij kōjatdikdik bwe koban tōmak ke aolep men ko reppen ilo mour in rej waļo̧k ilo epepen kein ami, ak bwe men ko me rejjan̄in kar lukkuun nana jān ko n̄an kwe make, ak bwe rejamin em̧m̧anļo̧k. Ij bar kalikkar n̄an eok bwe men ko renanaļo̧k im renaaj bar em̧m̧anļo̧k aolep iien. Rej aolep iien—eļaptata n̄e jej mour im iakwe gospel eo an Jisōs Kraist im leļo̧k juon iien em̧m̧an n̄an kōkm̧anm̧anļo̧k ilo mour ko ad.” 3
Jān bwebwenato eo an Josep im jān m̧akūtkūt eo ekaburom̧ōjm̧ōj ilo laļ in me ej jepoole kōj, epidodo n̄an ad loe men ko renana me rej waļo̧k n̄an armej ro rem̧m̧an. Mour jim̧we ejjab meļeļe jenaaj kōjekdo̧o̧n idajon̄jon̄ im burom̧ōj ko ilo mour ko ad. Ijoke, āinwōt an Irooj kar pād ippān Josep ilo apan̄ ko an, Enaaj pād ippād. Mellijon̄ ko renaaj alikkar ilo aer waļo̧k. Ak eļan̄n̄e jej dibuki kōn juon kālet n̄an ron̄jake E, Irooj enaaj tōl im im̧we kōj, āinwōt an kar Josep kōm̧m̧ane.