“Ij Kālet bwe in Ron̄jake E,” Liaona, M̧aaj./Eprōļ. 2022.
Ainikien Armej ro Rekwojarjar ilo Raan Ko Āliktata: Kōrā in Tōmak
Ij Kālet bwe in Ron̄jake E
Ke juon sister ekar ba etan cake ilo an kwaļo̧k naan in kam̧ool eo an, ikar reilo̧k im jino aō leļo̧k aō.
Ikar ļotak tok ilo Kabun̄ in, kōn menin ikar pād ilo m̧akūtkūt ko an Būraimere im jodikdik. Ekar itok limou kōn Būraimere kōn al ko im katak ko.
Āinwōt juon jodikdik, mekarta, ikar jino janiknik ļo̧k ālkin aō kar em̧akūt n̄an juon ward ekāāl. Ikar pād ilo m̧akūtkūt ko an jodikdik ro elōn̄ wiik ko, ak ikar dāpij eō make im ikar jab lukkun bōk koņaaō. Ekar jab itok limou ilo m̧ōn jar eo ilo Jabōt, ak ikar niknik jet iien im jet iien ijjab. Ikar kile bwe ikar jab lukkuun oktak tok n̄an gospel eo im katak ko an. Ekar ejjeļo̧k aō make naan in kam̧ool.
Āinwōt aolep iien ilo juon jabōt in jitlo̧k im jabōt in kwaļo̧k naan in kam̧ool, kōļmenļo̧kjeņ eo aō ekar bwilōn̄. Ikar jab lukkuun ron̄jake an membōr ro ilo ward eo kwaļo̧k naan in kam̧ool ko aer, ak ikar ba amen ilo jem̧ļo̧kin juon naan in kam̧ool. Innem juon sister ekar wōnlōn̄ļo̧k n̄an lokatok eo im jino an kwaļo̧k an naan in kam̧ool. Ke ej ba etan cake ilo naan in kam̧ool eo an, ikar reilo̧k im jino aō leļo̧k aō.
“Aolep iien ij kōnono n̄an Jemedwōj Ilan̄, men̄e ij kōmat cake,” ekar ba. “Ij kōm̧m̧an aō jar jidikdik bwe cake eo en iuwe im en em̧m̧an an mat. Ijeļā Ej uwaake jar ko ad.”
Ikar jab ļōmņak eļap kōn naan in kam̧ool eo m̧ae wa eo waam ekar jab jo ilo iien eo ikar lukkuun aikuj etal n̄an m̧ōn wia eo im ebbōk jet m̧ōn̄ā. Ilo iien eo ikar keememej naan ko an sister eo. Kōn menin, ikar bar roolļo̧k n̄an jikin kiki eo aō im kajjitōk ippān Anij n̄an jipan̄ kōm bwe wa eo waam en jo. Ikar būkwelōlō im jar. Ke ekar dedeļo̧k, ikar bōk ki in wa eo im likūt ilo jikin kajjo eo. Innem ekar itok uwaak eo n̄an jar eo aō—ainikien wa eo ekar jo.
Kōn uwaak eo n̄an juon jar eļam waan, ikar oktak jān janiknik n̄an juon iaļ eo me ekar jipan̄ eō bōk juon aō naan in kam̧ool im lukkuun m̧ool in oktak tok n̄an gospel eo. Naan ko n̄an al eo em̧m̧an tata ippa me an Būraimere, “I Feel My Savior’s Love,” 1 ekar ļapļo̧k an aorōk jān naan ko wōt ilo al eo. Rekar erom̧ en̄jake ko me ikar lukkun en̄jaki.
Ij jar kōn aolep men kiiō. Im men̄e uwaak ak iien ko rejjab aolep iien ekkar n̄an kōņaan ko ad, ij kālet wōt bwe in ron̄jake E āinwōt ij keememej naan ko an Nipai: “A lo, ij ba n̄an kom̧ bwe kom̧ij aikuj jar iien otemjej, im jab kijeļo̧k” (2 Nipai 32:9).