“Ko e Hā ʻOku Hoko ʻi he Ngaahi Fakatahaʻanga ʻa e Siasí he Sāpaté?,” Liahona, Sune 2022.
Ngaahi Tefitoʻi Meʻa Mahuʻinga ʻo e Ongoongoleleí
Ko e Hā ʻOku Hoko ʻi he Ngaahi Fakatahaʻanga ʻa e Siasí he Sāpaté?
ʻOku fakatahataha mai ʻa e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he Sāpate kotoa pē ke moihū ki he ʻOtuá mo feakoʻiʻaki ʻa e ongoongolelei ʻo Sīsū Kalaisí. ʻOku talitali lelei ʻa e taha kotoa ke kau mai, pea ʻe maʻu ʻe he kāingalotú ʻa e faingamālie ke lotu, fai ha malanga, mo akoʻi ʻa e ngaahi lēsoní ʻo kapau te nau loto ki ai. ʻOku tokoni ʻa e ngaahi fakataha ko ʻení ki he kāingalotú ke nau fefakamālohiaʻaki ʻi he tuí pea “taha honau lotó ʻi he uouangataha mo e feʻofoʻofani” (Mōsaia 18:21).
Houalotu Sākalamēnití
ʻOku fakatahataha mai ʻa e kāingalotu ʻo e uōtí pe koló he Sāpate kotoa pē ki he houalotu sākalamēnití. (ʻOku talitali lelei foki ʻa kinautolu ʻoku ʻikai kau ki heʻetau tui fakalotú ke kau mai.) ʻOku ʻoatu ʻa e sākalamēnití ki he kāingalotú lolotonga e fakataha ko ʻení ke tokoni ke nau manatuʻi ʻa Sīsū Kalaisi (vakai ki he Ngaahi Tefitoʻi Meʻa Mahuʻinga ʻo e Ongoongoleleí ʻi ʻEpeleli 2022 ki ha fakamatala lahi ange fekauʻaki mo e sākalamēnití). ʻOku kau foki ʻi he fakatahá ha ngaahi lotu, ngaahi fasi fakalotu, mo ha ngaahi lea ʻoku fai ʻe he kāingalotú fekauʻaki mo e ongoongolelei ʻo Sīsū Kalaisí.
Ngaahi Fakatahaʻanga Kehé
Hili e houalotu sākalamēnití, ʻoku vahevahe leva ʻa e kāingalotú ki he ngaahi kalasí mo e kōlomú. ʻOku ʻalu ʻa e fānau māhina 18 ki he taʻu 11 ki he Palaimelí. ʻI he Sāpate ʻuluaki mo e tolu ʻo e māhina takitaha, ʻoku ʻalu ʻa e toenga ʻo e kāingalotú ki he Lautohi Faka-Sāpaté. ʻI he Sāpate uá mo e faá, ʻoku nau ō ai ki he ngaahi houalotu ʻa e Fineʻofá, Kau Finemuí, pe ngaahi fakataha fakakōlomu ʻo e lakanga fakataulaʻeikí.
Lotu
Ko e lotu ʻi he ngaahi fakatahaʻanga ʻa e Siasí ʻoku fakahoko ia ʻe he kāingalotú. ʻOku faingofua pē ʻa e lotú pea tataki ʻe he Laumālie Māʻoniʻoní. ʻOku lotu ʻa e kāingalotú ʻo fakaʻaongaʻi ʻa e ngaahi lea ʻokú ne fakahaaʻi ʻa e ʻofa mo e fakaʻapaʻapa ki he Tamai Hēvaní. ʻOku kau heni hono fakaʻaongaʻi ʻo e ngaahi fetongi nauna ko e Hoʻo ʻAfio, mo e ʻAfió na ʻi he taimi ʻoku fai ai e lotu kiate Iá.
Ngaahi Malangá
ʻE kole ʻe ha mēmipa ʻo e kau pīsopelikí pe kau palesitenisī fakakoló ki ha kāingalotu ke nau fai ha malanga ʻi he houalotu sākalamēnití. ʻOku nofotaha ʻa e ngaahi malanga ko ʻení ʻi he ongoongolelei ʻo Sīsū Kalaisí. ʻE fakaʻaongaʻi ʻe he kau leá ʻa e folofolá mo e ngaahi lea ʻa e kau taki ʻo e Siasí ʻi heʻenau teuteu ʻenau malangá. ʻOku nau fakamoʻoni foki ki he ngaahi tāpuaki ʻo e ngaahi tefitoʻi moʻoni ʻo e ongoongoleleí ʻi heʻenau moʻuí.
Ngaahi Lēsoní
Hili e houalotu sākalamēnití, ʻoku ako ʻa e kāingalotú fekauʻaki mo e ongoongoleleí ʻi ha ngaahi kalasi iiki ange. ʻE lava ke fekauʻaki ʻa e ngaahi lēsoní mo e folofolá, ngaahi akonaki mei he konifelenisi lahí, pe ko ha ngaahi kaveinga kehe. Neongo ʻe tataki ʻe he faiakó ʻa e lēsoní, ka ʻoku ʻikai ko ha malanga ia. ʻE lava ke vahevahe ʻe he kau mēmipa kotoa ʻo e kalasí ʻenau ngaahi fakakaukau fekauʻaki mo e tefitó.
Fakamoʻoní
ʻOku tuʻo taha ʻi he māhina ʻa hono fakakau ʻi he houalotu sākalamēnití ha houalotu fakamoʻoni. ʻOku meimei ke fakahoko ʻeni ʻi he ʻuluaki Sāpate ʻo e māhiná. Lolotonga e fakataha ko ʻení, ʻe lava ke fai ʻe he kāingalotú ʻenau fakamoʻoni kia Sīsū Kalaisi mo ʻEne ongoongoleleí. ʻOku ʻuhinga ʻa e fai ʻo e fakamoʻoní ke fakahā ʻa e ngaahi moʻoni ʻo e ongoongoleleí ʻo fakatatau mo hono ueʻi ʻe he Laumālie Māʻoniʻoní.
Teuteú
ʻOku teuteu ʻa e kāingalotú ki he ngaahi fakatahaʻanga ʻo e Sāpaté ʻaki ʻenau lotu, ako e folofolá, mo mateuteu ke maʻu ha ueʻi fakalaumālie mei he Laumālie Māʻoniʻoní. Kapau ʻoku kole atu ke ke fai ha lea pe akoʻi ha lēsoni, fakakaukau ʻi he faʻa lotu ki he founga te ke lava ai ʻo akoʻi e ngaahi tefitoʻi moʻoni ʻo e ongoongoleleí. Fakaʻaongaʻi e folofolá. Fakamoʻoni ki he moʻoní. ʻE lava ke tokoni atu hoʻo kau taki faka-Siasí ʻi hoʻo teuteú, ʻo ka fie maʻu.