“Naʻá ku Pehē ʻOku ʻIkai Fie Maʻu Au ʻe he ʻOtuá,” Liahona, Sune 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻá ku Pehē ʻOku ʻIkai Fie Maʻu Au ʻe he ʻOtuá
ʻI heʻeku lotu mo lau e folofolá, naʻe fakahoko ʻe he Tamai Hēvaní ha mana ʻiate au.
ʻI he fuofua ʻaʻahi mai ʻa e ongo faifekaú kiate aú, naʻá na fakamatalaʻi ʻa e ngaahi moʻoni mahuʻinga ʻo e ongoongoleleí. Naʻá na toe fakamatala mai foki ʻa e founga naʻe fakafoki mai ai ʻa e Siasi ʻo Sīsū Kalaisí.
ʻI he ʻosi ʻena ʻaʻahí, naʻá na kole mai ke u lau e 3 Nīfai 11. ʻI heʻeku lau iá, naʻá ku lotu fakamātoato. Naʻe ongo ki hoku lotó ʻa e Laumālie Māʻoniʻoní he taimi pē ko iá. Naʻe fanafana mai ʻa e Laumālié, “ʻOku moʻoni ʻa e tohí ni.”
Hili ha uike ʻe taha mei ai, naʻá ku ʻalu ki heʻeku fuofua houalotu sākalamēnití. He ʻikai toe ngalo ʻiate au ʻa e talitali lelei naʻá ku maʻú mo e ngaahi fakamoʻoni naʻe vahevahe ʻe he kāingalotú.
Hili e lotú, naʻe talamai ʻe he ongo faifekaú ʻoku fie maʻu ke u fai ha ngaahi fuakava mo e ʻOtuá pea tali ʻa Sīsū Kalaisi ko hoku Fakamoʻui kae lava ke u maʻu ha ʻamanaki lelei ki he fakamoʻuí mo e hakeakiʻí. Naʻe fakaofo ʻa e meʻa ne u aʻusia ʻi he lotú, ka naʻá ku talaange, “He ʻikai ke u lava ʻo fai ia. ʻOku ʻikai ko e tokotaha au ʻoku fie maʻu ʻe he ʻOtuá ʻi Hono Siasí.”
Hili ha uike ʻe taha mei ai, naʻe fakaafeʻi au ʻe he ongo faifekaú ke u ʻaʻahi ki he kelekele ʻo e Temipale Guatemala City Guatemala. Naʻá ku ofo ʻi heʻeku mamata ki ha fuʻu fale fakaʻofoʻofa pehē mo ha ʻāngelo ʻi ʻolunga.
Naʻe pehē mai ʻe ha ongo sisitā naʻá na takimamata ʻi he kelekele ʻo e temipalé, “Kuó ke haʻu ke maʻu ha tali mei he ʻOtuá. Tau hū ki he talitaliʻangá ke ke lava ʻo lotu ke maʻu e tali ʻokú ke fie maʻú.”
Naʻa mau hū atu ʻo tangutu ki lalo. ʻI heʻeku lotú, ne u ongoʻi ha ongo mālohi ʻi hoku lotó pea kamata ke u tangi. Naʻá ku ongoʻi foki ha nonga mo ha fiefia lahi. Naʻá ku ʻiloʻi kuo fakamolemoleʻi au ʻe he ʻOtuá mei heʻeku ngaahi angahalá. Naʻá ku fie ngāue Maʻana. Naʻá ku ʻiloʻi naʻe fie maʻu ke u papitaiso.
ʻI he taimi naʻe ʻeke mai ai ʻe he ongo faifekau naʻá na akoʻi aú pe kuó u mateuteu he taimí ni ke papitaisó, naʻá ku tali ange, “ʻApongipongi, ʻi he fakaʻosinga ʻo e uike ní, ko e fē pē taimi te mo lava aí!”
Ko e ʻaho lelei taha ʻo ʻeku moʻuí ʻa e ʻaho naʻá ku papitaiso aí. Ne u ongoʻi kuo fanauʻi foʻou au.
ʻOku ou ongoʻi naʻe fakahoko ʻe he Tamai Hēvaní ha mana ʻiate au. Ko e kií ko e lotú mo e lau folofolá. Ko e folofolá mo e lotú ko ha ngaahi founga ia ʻoku fetuʻutaki mai ai ʻa e ʻEikí mo fakahaaʻi mai ʻEne ʻofá.
ʻOua naʻa momou ke fai ha fuakava mo Ia. Ko ha meʻa fakaʻofoʻofa ʻa e ngaahi fuakavá.