Valetabu: E Dua na Mataniciva Talei

Sa dua na veivakalougatataki totoka meda raica na kedra tara na valetabu ena kena sa tubu cake tikoga e vuravura taucoko. Eda reki vata kei ira na lewe ni Lotu ni ra sa vakatabui na veivaletabu vovou ena nodra vanua.

Keitou nuitaka ni tamata kecega era na vakamareqeta na valetabu ka sega ni coriti ena dua na cala a vakamacalataka o Peresitedi Boyd K. Packer (1924–2015), Peresitedi ni Kuoramu ni iApositolo Le Tinikarua. Ena nona vosa vakatautauvata ni mataniciva kei na kato, a tukuna kina ni dua na matai a cakava e dua na kato totoka me vakaraitaka kina e dua na mataniciva talei. Ni ra sa mai raica na tamata na mataniciva, era a qoroya ga na kato. (Raica na “The Cloven Tongues of Fire,” Liahona, July 2000, 7.)

E dina sara, na mataniciva talei ena loma ni valetabu e oka kina na cakacaka vakalotu, veiyalayalati, kei na veivakalougatataki yalataki eda rawa ni ciqoma ga ena valetabu. Me vaka e vakatavulica o Elder David A. Bednar ena Kuoramu ni iApositolo Le Tinikarua ena ilavelave oqo: “Na veika kece e vulici kei na veika kece e vakayacori ena veivaletabu edaidai e vakamatatataka na ituvatuva cecere ni marau nei Tamada Vakalomalagi, na vakalou i Jisu Karisito, kei na Nona ilesilesi me noda iVakabula. Na veiyalayalati era ciqomi kei na cakacaka vakalotu era vakayacori ena valetabu era sa veika bibi ki na vakasavasavataki ni lomada kei na vakacerecerei vakaoti ni luvena tagane kei na yalewa na Kalou.” (tabana e 6).

Ni o wilika na itukutuku nei Elder Bednar, keitou sureti iko mo nanuma tiko na veiyalayalati o sa cakava ena valetabu. Kevaka sa dede toka beka na iotioti ni gauna o a gole kina ki valetabu, keitou sureti kemuni mo ni lesu tale mai ka vakila tale na reki kei na vakacegu e kune ena vale ni Turaga. Kevaka o se bera ni lako ki na valetabu, keitou sureti iko mo vakarautaki iko mo “vakaivotavota kina ena kaukauwa mai lomalagi” (Vunau kei na Veiyalayalati 38:32).

Elder Kevin R. Duncan

Ena Vitusagavulu

Dairekita Liu ni Tabana ni Valetabu