Lako Mai, Mo Muri Au

 2 Tui 21–23

Na iVolanikalou Sa Vagolea na Yaloda vua na Kalou

E kaya o Peresitedi Spencer W. Kimball ni italanoa kei Josaia na Tui, e kune ena 2 Tui 21–23, “sa dua vei ira na italanoa totoka duadua ena ivolanikalou kece sara” (ena Lako Mai, Mo Muri Au—Baleta na Tamata Yadua kei na Matavuvale: Veiyalayalati Makawa 2022, 129).

Na Sala a Kunea kina na Tui o Josaia na iVolanikalou

Sa Vakasavasavataka tiko na Tui o Josaia na Vanua mai na Matakau Ceuceu, © Look and Learn/ Bridgeman Images

A yaco me tui Juta o Josaia ni se qai yabaki walu. Sa soli vua e dua na matanitu ni tamata era vakabauta na kalou lasu, ia e vinakata o koya me muria na Turaga. Ena i kawalu ni yabaki ni nona gauna ni lewa, a vakarota kina me vakarusai na icabocabo ni soro kei na matakau ni kalou lasu ena veiyasai Juta.

O Josaia, Na Tui Juta, Sa Vakalesuya mai na Sokalou vua na Kalou ena Nona Matanitu, mai vei daudroini tawakilai, itaba mai vei Stefano Bianchetti / Bridgeman Images

Ni oti e tini na yabaki, a kerei ira na nona tamata me ra vakavinakataka na valetabu e Jerusalemi, na vanua a kunea kina na ivolanikalou na bete levu o Ilikaia. Ni wilika na ivola na Tui o Josaia, a vakauqeti me muria na kena ivakavuvuli. A qai vakasoqoni ira na nona tamata ka wilika vei ira na ivola.

Ena dua na gauna balavu, era sa vakaukauwataka tiko na lomadra na tamata vua na Kalou. Ia a veivuke na ivolanikalou me vagolea na lomadra na tamata me ra lesu tale vua na Kalou. Sa yalataka na Tui o Josaia vei ira na tamata ni na lako ena sala ni Turaga ka talairawarawa ki na ivakaro.

Veivosaki

Na ivolanikalou cava soti sa tara na nomu bula? Na tikina cava soti o rawa ni wilika nikua me vakauqeti iko?

iVolanikalou ni Veiyalayalati Makawa baleta na Gauna Vakatabakidua eso

Ni o:

• Vakila na galili:

  2 Tui 6:16

• Gadreva na kaukauwa:

  Aisea 40:31

• Vakila ni ko sega ni lomani:

  Same 130; Aisea 54:10

• Vakila ni ko rere:

  Same 27:1; Aisea 41:10

• Guilecava o cei o iko:

  Nai Vakatekivu 1:26–27

• Vinakata mo voleka cake vua na iVakabula:

  Aisea 53:3–5

iVakasala Baleta na Vuli iVolanikalou

• Okata na masu me tiki ni nomu wili ivolanikalou. Kerea na Tamada Vakalomalagi me vakalougatataki iko ena Yalo Tabu mo vakila na vakacegu kei na veivakauqeti.

• Wilika vata kei nai nakinaki me vaqaqacotaka na nomu vakabauti Jisu Karisito.

• Wilika vata kei na gagadre mo bulataka na ivolanikalou ki na nomu bula. Tarogi iko mada, na cava e saga tiko na Turaga me vakavulici au ena vei ivolanikalou oqo?

• Taura na gauna mo dau tugana. Tovolea mo kakua ni vakusakusataka nomu gauna ni wiliwili.

• Kerea na veivuke. Na wiliwili vata kei watimu, itokani, se lewe ni rumu vata e rawa ni veimuataki ki na veivosaki vinaka ka vukei iko mo nanuma tiko mo wiliwili e veisiga.

E rawa ni o sarava e dua na ivakaraitaki ni nona bula na Tui o Josaia ena dua na vidio vakarautaka na Lotu, “Josiah and the Book of the Law,” ena ChurchofJesusChrist.org.