“Cakacaka Vakalotu ni Valetabu: Vakavakarau ni Lesu ki na iSerau ni Kalou,” Liaona, Julai/Okosi. 2022.
Cakacaka vakalotu ni Valetabu: Vakavakarau ni Lesu ki na iSerau ni Kalou
Au sureti kemuni mo ni vulica vagumatua ka vakavinavinakataka na bibi tawamudu ni veiyalayalati ni valetabu, cakacaka vakalotu ni valetabu, kei na sokalou ena valetabu ena nomuni segata mo ni lako vua na iVakabula.
iTaba ni Dolavi raraba ni Valetabu e Mesa Arizona mai vei Leslie Nilsson
Na nona cakacaka na Kalou kei na Nona lagilagi sai koya “me ra tawa mate rawa kei na bula tawamudu ni tamata” (Mosese 1:39)—me vakarautaki keda meda bula “ena sala e cecere ka savasava cake”1 me rawa ni da lesu tale ki na Nona iserau.
Ena Nona loloma tawayalani ka tawamudu, sa sureti ira tikoga kina na Luvena tagane kei na yalewa na Turaga, mai vei ira na Nona parofita kei na iapositolo, me ra vakavakarau ki na Nona lako mai ka yaco me dua na matatamata vaka Saioni—vakarau me ra susugi cake me ra sotavi Koya (raica na Alama 12:24; 34:32; Vunau kei na Veiyalayalati 45:45; 65:5; 88:96–97). Ka sa usutu tikoga ni vakavakarau oya na vulici ni ivunau i Jisu Karisito, cakacakataki ni vakabauti Koya, veivutuni, ka ciqoma na veiyalayalati tabu kei na cakacaka vakalotu.
Na ivakaraitaki eso ena Veiyalayalati Makawa ni veisureti ni Kalou vei ira na Luvena me ra vakavakarau me ra bulataka e dua na lawa cecere ka ciqoma na veiyalayalati kei na cakacaka vakalotu ni veivakabulai era sa veidusimaki vei keda nikua.
Ena Lako Yani, a vakauqeti Isireli na Kalou me yaco me “dua na iyau talei” ka ra vakasavasavataki ira ena nodra vakavakarau me ra sotavi Koya (raica na Lako Yani 19:4–6, 10–11, 17). A solia o Jiova vei Isireli na “vatu raraba, kei na vunau, kei na ka kau sa lesia” (Lako Yani 24:12), ka ra sa veiyalayalati kei na Kalou, ka kaya, “A ka kecega sa kaya ko Jiova keimami na cakava” (Lako Yani 19:8; raica talega na 24:3). Sa yalataka na Turaga kevaka era na talairawarawa ki na nodra veiyalayalati, ena tiko vata kei ira o Koya (raica na Lako Yani 29:45–46). Ia, ni ra sa vakadinadinataka na Isireli “na serau i Jiova” (Lako Yani 24:16) ena Ulunivanua ko Saineai, era sa rere, era tu vakayawa, ka ra qai talaidredre vua na Kalou (raica na Lako Yani 20:18–21; 32:1–6).
Na ikarua ni ivakaraitaki ena Veiyalayalati Makawa o ya na nona tara e dua na vale na Tui o Solomoni me nona na Turaga (raica na 1 Tui 6:11–13). Na kato ni veiyalayalati kei na so tale nai yaya tabu era a biu ena “tikina tabu sara” (1 Tui 8:6), kei na i “ukuuku i Jiova … sa vakasinaita na vale i Jiova” (1 Tui 8:11). A cabora o Solomoni e dua na masu ni veivakatabui ka kerea na veivakalougatataki vakayago ka vakayalo me vakatikori vei ira na Isireli sa veivutuni ka masumasu tiko. A rogoca na Turaga na nodra masu ena vakatakekere ka yalataka vei ira na Isireli na veivakalougatataki cecere kevaka era talairawarawa. Ia, o Isireli era a qai biuta na Turaga ka qarava na kalou lasulasu. (Raica na 1 Tui 9–11.)
Eso tale na parofita ena Veiyalayalati Makawa era a segata vagumatua me ra vakatavulici ira ka vakatabui Isireli me rawa “ni ra raica na mata ni Kalou; ia era sa vakaukauwataka ga na lomadra ka sega ni tiko rawa ena nona iserau” (Vunau kei na Veiyalayalati 84:23–24).
Vakavuqa, era a tawavakabauta na luvei Isireli, rere, se sega ni vinakata me ra veisau; gadreva ga na sala rawarawa; ka sa vakotora na lomadra ena veika vakavuravura; se lomadra sara mera vorata na Turaga kei ira na Nona parofita. Ena veigauna kece era gole tani kina na Isireli mai vua na Kalou ka biuta tani na nodra veiyalayalati kei na cakacaka vakalotu, sa “waqa na cudru ni Turaga ena vukudra” (Vunau kei na Veiyalayalati 84:24), ka ra sa sega ni rawata na taucoko ni Nona lagilagi.
Na iNaki Vakalou ni Vasokumuni
Na sasaga ni Turaga me vakasoqoni ira vata na Nona tamata ka vakalougatataki ira ena veiyalayalati ni valetabu kei na cakacaka vakalotu era sa vakamacalataki talega ena Veiyalayalati Vou kei na iVola i Momani. A lelevaka na iVakabula, “Au a nanuma vakavica meu vakasoqoni ira vata na nomu gone me vaka na toa yalewa ka vakasoqoni ira na luvena e ruku ni tabana, ia dou a sega ni vinakata!” (Maciu 23:37; raica talega na 3 Nifai 10:4–6).
E vakatavulica na Parofita o Josefa Simici: “Na cava beka na inaki ni nodra sokumuni na … tamata ni Kalou ena yabaki cava ga e vuravura? … Na inaki levu duadua me tara me nona na Turaga e dua na vale me rawa kina Vua me vakatakila vei ira na Nona tamata na cakacaka vakalotu ni Nona vale kei na lagilagi ni Nona matanitu, ka vakavulica vei ira na tamata na sala ni veivakabulai … me ra … ciqoma na ivakatakila mai lomalagi, ka me vakataucokotaki ena veika ni matanitu ni Kalou—ia era sega ga ni vinakata.”2
E gadreva na Turaga me vakasoqoni ira vata na Luvena ena itabagauna oqo ka sa vakatakila mai “na veika sa vunitaki tu ni se bera ni tauyavutaki na vuravura, … na veika kece e baleta na vale oqo, kei na kena matabete” (Vunau kei na Veiyalayalati 124:41–42). E vakayaloqaqataki keda kece me da vakavakarau me da lesu tale ki na Nona iserau—e vakayacori rawa ena Nona isoro ni veisorovaki: “Raica au sa lewa me ra vakasoqoni vata yani ka tiko ena vanua tabu ko ira kecega sa masuta na yacaqu, ka qaravi au me vaka na noqu kosipeli tawavakaiyalayala” (Vunau kei na Veiyalayalati 101:22).
Na Cava e Bibi kina na Cakacaka Vakalotu ni Valetabu?
Na valetabu era sa veivanua tabu duadua vei ira na veivanua ni sokalou. Na veika kece e vulici kei na veika kece e vakayacori ena veivaletabu edaidai e vakamatatataka na ituvatuva cecere ni marau nei Tamada Vakalomalagi, na bula vakalou i Jisu Karisito, kei na Nona ilesilesi vaka noda iVakabula. Na veiyalayalati era ciqomi kei na cakacaka vakalotu era vakayacori ena valetabu esa veika bibi ki na vakasavasavataki ni lomada kei na bula vakacerecerei vakaoti ni luvena tagane kei na yalewa na Kalou.
“Ia na matabete cecere ena cakacakataka na kosipeli ka na taura tu na idola ni veika vuni ni matanitu, io na idola sara mada ga ni nona kilai na Kalou.
“Ia, ena vakatakilai mai kina na ka kaukauwa ni bula vakalou ena kena veicakacaka vakalotu.
“Ia, kevaka e sega na kena veicakacaka vakalotu, kei na dodonu ni matabete, ena sega ni vakaraitaki vua na tamata ena bula vakayago oqo na kaukauwa ni bula vakalou” (Vunau kei na Veiyalayalati 84:19–21).
O ira na cakacaka tabu vakalotu ka ciqomi ena bula kilikili ka dau nanumi ena dau dolava tikoga na sala ni veitaratara vakalomalagi ka rawa ni drodro mai kina na kaukauwa ni bula vakalou ki na noda bula. Ena ciqomi ni cakacaka vakalotu ni matabete ka cakava ka maroroya na veiyalayalati tabu, eda sa vakaivua vata kei na iVakabula (raica na Maciu 11:28–30)3 ka rawa ni vakalougatataki ena kaukauwa e uabaleta na noda meda vorata rawa na veitemaki kei na bolebole ni bula oqo ni da vakavakarau meda lesu ki na iserau ni Kalou.
Na Veivakalougatataki ni Veiyalayalati kei na Cakacaka Vakalotu ni Valetabu
iVakaraitaki kei Karisito kei na Gone Lailai, mai vei Carl Heinrich Bloch
E rua na veivakalougatataki bibi ka ciqomi mai na veiyalayalati ni valetabu kei na cakacaka vakalotu sai koya na toroi cake ni reki kei na kaukauwa.
Na Dauveivueti sai koya na ivurevure cecere ka ivurevure duadua ga ni reki gumatua. Na reki dina e yaco mai ena cakacakataki ni vakabauta na Turaga o Jisu Karisito, ciqomi ena bula kilikili ka rokova ena yalodina na veiyalayalati tabu kei na cakacaka vakalotu, ka segata me saumaki vakatitobu vua na iVakabula kei na Nona inaki.
E vakavulica o Alama vei luvena ni na rawati na yalo savasava kei na reki cecere cake ena noda bula ni da sa vakasavasavataki ka vakatabui ena Veisorovaki i Jisu Karisito. Na vakabauti ga ni noda Dauveivueti, na veivutuni tiko, kei na maroroya na veiyalayalati eda rawa kina ni taura na bula marau tawayalani eda gadreva kece meda bulataka ka tudei kina.4
Yalovinaka ni raica na kena yalataki na bula reki maivei Peresitedi Russell M. Nelson: “Keimami sa sureti ira kece na luve ni Kalou ena yasa ruarua ni ilati mo ni lako mai vua na iVakabula, ciqoma na veiyalayalati ni valetabu vakalou, ka ciqoma na reki gumatua, ka rawata na bula tawamudu.”5
Ena noda gauna oqo ni sa qaciqacia na kaukauwa ni butobuto “ka vakarerea na noda vakacegu me vakarusa,”6 ia na kaukauwa veitaqomaki sa vakarautaki tu vei keda yadua ena loma ni veiyalayalati kei na cakacaka vakalotu ni valetabu (raica na Vunau kei na Veiyalayalati 38:32; 43:16; 76:39–42; 105:11–12, 33; 138:12–15). A raica kina o Nifai ena dua na raivotu “na kaukauwa ni Lami ni Kalou, ni sa sobuti … ira na nona tamata ni veiyalayalati na Turaga, … ka ra sa vakaiyaragi tu ena ivalavala dodonu kei na kaukauwa ni Kalou ena lagilagi cecere” (1 Nifai 14:14).
Ena masu ni veivakatabui ni Valetabu e Kirtland, a kerea kina na Parofita o Josefa Simici vei Tamana “me ra na lako yani na nomuni tamata mai na vale oqo ka vakaiyaragi tu ena nomuni kaukauwa” ka “me kakua tale ni dua na cakacaka butobuto me … tu kina ka rawai ira na nomuni tamata era sa mai taura na yacamuni ena vale oqo” (Vunau kei na Veiyalayalati 109:22, 26).
A Glorious Light—Kirtland Temple [Na Rarama Lagilagi—Valetabu e Kirtland], mai vei Glen S. Hopkinson, me kakua ni lavetaki
Sa dodonu vei keda yadua me da segata me da vulica ka kila vakavinaka cake na kaukauwa ni veitaqomaki ni veiyalayalati kei na cakacaka vakalotu era tu ena vale ni Turaga—me rawa kina vei keda na tisaipeli me da “tudei tu ena veivanua tabu, ka … ka sega ni yavalati rawa” (Vunau kei na Veiyalayalati 45:32) ka “vorata rawa ena siga ca” (Efeso 6:13).
Veisureti kei na iVakadinadina
Au sureti kemuni mo ni vulica vagumatua ka vakavinavinakataka na bibi tawamudu ni veiyalayalati ni valetabu, cakacaka vakalotu ni valetabu, kei na sokalou ena valetabu ena nomuni segata mo ni lako vua na iVakabula ka ciqoma na veivakalougatataki e rawa mai na Nona Veisorovaki. Kau vakadinadinataka ena reki ni rau bula tiko na Kalou na Tamada kei na Luvena, o Jisu Karisito, ka Rau gadreva vakalevu duadua me da lesu tale ki na Nodrau iserau ka vakaivotavota ena Nodrau lagilagi (raica na Vunau kei na Veiyalayalati 97:16; 101:38).