Sa Maroroya na Turaga na Nona Yalayala

Mai vei Jose Luis Scotland Palomino, Esmeraldas, Ecuador

Vei au kei na noqu matavuvale, sa yaco mai na veivakalougatataki ni Turaga ni oti na noqu talairawarawa.

Ni oti e rua na vula ena noqu kacivi meu daunivakasala ena neimami mataveiliutaki ni iteki, au a vakayalia na noqu cakacaka. Au lomaleqataka meu na qaravi iratou vakacava na watiqu kei na rua na luvei keirau.

Niu vaqara cakacaka vou tiko, au a yalodina tiko ki na noqu veikacivi, ka solia vei au e vuqa na madigi meu qaravi ira na taciqu kei na ganequ. Na ka dina, au a osooso sara ena noqu veikacivi ka lomatarotarotaka tiko o watiqu de tiko tale e dua ena iteki e rawa ni cakava eso na noqu ilesilesi.

Ena dua na bogi ucauca ni bera na lotu vakamatavuvale, sa taqiri na talevoni. A gadreva e dua na baraca tauvimate bibi ena iteki e dua na veimasulaki, kau a kerei meu laki raici koya. E totolo sara, noqu sa veivosakitaka me dua na itokani me tomani au.

Ni keirau yaco yani, au a kila sara na baraca e tauvimate ka vakavinavinakataka na qiri yani. Ena vica na siga sa oti, a vakatarogi me taura e dua na veikacivi ena iteki. Ni oti na neirau lumuta ka masulaki koya, keirau tukuna vua ni keirau na qai lesu tale mai me raici koya.

Au yaco bera mai ki vale ka suasua, ia se vo ga na gauna me caka kina na lesoni lekaleka ni lotu vakamatavuvale. Keitou nanuma me keirau sarava e dua na vidio baleti Ilaija kei na yada mai Sarifaci.

Ni vakarau tiko na yada me vakasaqara na iotioti ni kedrau kakana kei luvena tagane, a kaya vua o Ilaija, “Mo cakava mada e liu vei au e dua na keki lailai, ka kauta mai vei au, mo qai vakarautaka e muri na kemudrau kei luvemu.” Ena vuku ni nona talairawarawa, “[a] sega ni oti na saqa madrai droka, ka sega talega ni maca sobu na tavaya waiwai, me yacova na siga ena vakatauca na uca ko Jiova ki vuravura” (1 Tui 17:13–14).

Na vosa nei Ilaija “mo cakava mada … e liu” a curuma na yaloqu. Ni tonawanawa tu na mataqu, au kaya vei watiqu, “Oqori sara ga! iMatai, e dodonu meda cakava na ivakaro kece ni Turaga, ni sa oti ena qai yaco mai na veivakalougatataki.”

Me vaka ga na kena vakayacori na yalayala nei Ilaija vua na yada, na keitou kakana kei na waiwai e “sega ni oti” niu a sega tu ni cakacaka. Sa kila tu na Turaga na dredre ni neitou bula vakailavo, ka sa vakalougatataki keitou o Koya. Ni oti na neitou lotu vakamatavuvale ena yakavi, ena kena mataka a soli vei au e dua na cakacaka saumi.

Au kila ni Turaga sa dau maroroya na Nona yalayala. Ena vuku ni ka oqo, sa cecere kina na noqu vakabauta, sa vakakina na noqu vakavinavinaka Vua.