“Ena Veidusimaki ni Turaga,” Liaona, Julai/Okos. 2022.
Domodra na Yalododonu Edaidai
Ena Veidusimaki ni Turaga
Ena loma ni dredre, au vulica niu rawa ni cakava na veika dredre.
Droini mai vei Stephanie Hock
Me vaka niu dua na nasi daudikeva na yago ena Mataivalu e Wai ni Amerika ena gauna ni matedewa na COVID-19, au a vakau ena ilesilesi ki na valenibula ni leqa tubukoso ena Jekope K. Javits Convention Center e New York City, ka vakarautaka na veitaqomaki e liu ni tubucake tiko na COVID-19.
Niu tekivuna na noqu ilesilesi, a vakasinaita na noqu vakasama e vuqa na kauwai. Au a lomaleqataka vakabibi na nodra qaravi na tauvimate kei na valuti tiko ni mate veilecayaki oqo.
Au vakila me vakataki Nifai niu “sa liutaki tiko ena Yalo, ia kau a sega ni kila na ka meu na cakava” (1 Nifai 4:6). Na vakasama oqo a vukei au meu vakararavi vua na Tamada Vakalomalagi ka masu vakawasoma meu na rogoca na Domona, muria na Nona ivakasala, ka qaravi ira vinaka sara na noqu tauvimate.
Ena imatai ni bogi ni noqu veiqaravi, a vakacurumi mai e dua na tamata sa tauvimate bibi sara ga. Ni keimami sa tekivu dikeva na kena ituvaki, au kila vakatotolo sara ni rawa ni vosa ga vaka-Sipeni. O au duadua ga e kea a rawa ni vosa vaka-Sipeni, niu a vulica ena noqu kaulotu ki Venezuela.
Ni sa tekivu meu vosa vei koya e tauvimate, a taroga se na vinaka na veika kece. Au a veivakadeitaki vua, ka tukuna vua ni sa qaravi vinaka tiko. Au a vakila e dua na yalo ni veivakabauti kei na vakacegu e matana. Ena vo taucoko ni bogi, au dau veisiko wasoma ki na nona idavodavo, cakava na vakadidike ka vakarautaka na itukutuku ni veisau eso. Ena loma ga ni vica na siga, sa vinaka sara na ituvaki ni nona bula ka sa suka yani i vale.
Ena gauna ni noqu ilesilesi, au sotavi ira e vuqa na tamata tauvimate era dau vosa ga mai vaka-Sipeni. Na noqu rawa ni vosa vei ira e solia vei ira na vakacegu kei na veivakadeitaki ena gauna ni nodra vakabulabula tiko.
Niu vakananuma lesu na ka a sotavi oqo ena vakasaqarai ni veidusimaki vakalomalagi meu solia na veimaroroi uasivi duadua vei ira na tauvimate, au nanuma kina na ivakasala nei Elder Brook P. Hales ena Vitusagavulu. E kaya o koya ni Tamada Vakalomalagi e vakaitavi “ena veika matailalai ni noda bula” ka ni “sa noda na veidusimaki vakalou ena veivakayarayarataki kei na veivakauqeti ni Yalo Tabu.”1
Sa yaco meu kila vakavinaka sara ni noqu rawa ni vosa vaka-Sipeni sa ka talei sara me vaka na noqu kila vakavuniwai. Niu kauwaitaki ira na tani, au a raica rawa talega e dua na rai matata ni ena loma ni dredre, kei na veidusimaki ni Turaga, au rawa ni cakava na veika dredre.