Sa Matua Ena Yalodina

Madigi ni Tubu

Mai vei Deborah L. Dougal

Sa kila tu na Turaga niu na buroro ka seraka tale.

Sa oti e vica vata na yabaki mai na gauna a takali kina na watiqu, o Jerold. A lako mai vakatotolo ka veivakasaurarataki na kenisa, ni qai tolu ga na vula sa takali yani. Au sa vakasamataki koya tiko oqo niu cakacaka tiko ena noqu lomanibai.

Niu tokitaka tiko e dua na itei ki na kena kuro vou, a lako mai vei au e dua na vakasama. Ni bera noqu a takoso, a vinaka tiko na itei. E a logaloga vinaka tiko ena kuro sa tiko rawa kina, ia a sega ni buroro vinaka. Au kila kevaka au na sega ni tokitaka ki na dua na kuro vou ena dua na gauna, ena rairai tarova na kena se ka rairai mudu talega na kena tubu tiko. Ena sega dina ni rawa ni cakava na kena vinaka duadua.

Au sa mani nanuma meu solia na madigi me tubu kina ena noqu teivaka vou ki na dua na kuro levu cake. Sega ni dua na kuro levu sara—me dua ga se rua na idi na kena raba levu cake. Kevaka au solia vakalevu cake me galala, ena rawa ni suivi vakalevu ka mate na wakana.

Au a namaka me na sotavi dredre na itei ni tovolea me vakamatautaki koya. E a logaloga vinaka toka, ka cokonaki vinaka tu ena kuro ka sa matau tu kina. E sega ni kila ni veisau ena vukea me tubu tikoga. E gadrevi meu vakabulabulataka tiko, me soli na rarama e ganita, wai, kei na veika bulabula e gadrevi ena gauna oqo ni kena vakamatautaki. Au kila ni na yaco tale, me na buroro mai ka se tale.

Niu vakasamataka na noqu bula vaka yada, au vakila niu sa vaka na itei o ya. Au a tiko vakacegu. Au a sa toso vinaka tiko. Ia ni sa mai takali na watiqu, au rogoca na vakasolokakana ni Yalotabu niu sa curuma tiko e dua na itagede vou ni tubu. Se tu ga na veika au gadreva meu vulica ka cakava ena bula oqo.

Ena rua na yabaki ka tarava, e vitu talega na turaga ena neitou tabanalevu era a takali talega. Au sa tekivu kerei ira na noqu itokani yada era se qai yada vou me keimami soqoni vata mai, veivosaki, veisiko vata, ka veiqaravi vei ira na tani—me rawa vei keimami vakayadua me vakila vakalailai ga na galili. E sega ni dua vei keimami a digitaka me keimami “teivaki vou tale.” Ia niu mai vakamatautaki au ki na bula oqo ni sega o watiqu, au raica ni rawa niu veitokoni vei ira era sotava e dua na bolebole vata ga. Au a raica talega ni vuqa sara na madigi meu tiko vata kina kei ira na gonelalai kei na makubuqu ka vakadeitaka vei ira ni veisorovaki i Jisu Karisito, ena bula e tarava sa rawa ni keitou tiko vata tale vakamatavuvale.

Au a sega ni namaka na tubu ena yaco mai vei au baleta ni sa mai yali na watiqu. Ia a kalawa mai na Tamada Vakalomalagi ka “teivaki au vou” ka solia vei au na madigi ni tubu ena dua na kuro levu cake vakalailai—e dua na bolebole vou ka vakarautaka e dua na madigi ni tubu.

Au se nanumi Jerold tikoga e veisiga. Ena vica na yabaki i muri, au se sasaga dredre tikoga niu saga tiko meu matau ki na veisau ni sega o koya. Ia au kila ni na vakauqeti au tiko na Turaga ena ilakolako oqo. Ni toso na gauna, kei na noqu vakararavi Vua, au na buroro mai ka seraka tale.

Na dauvolaivola e vakaitikotiko mai Idaho, Amerika.