“Daukaulotu Veiqaravi: Tarai Cake ni Matanitu ena Veiqaravi kei na Loloma,” Liaona, Julai/Okosi. 2022.
iTabagone Qase Cake
Daukaulotu Veiqaravi: Tarai cake ni Matanitu ena Veiqaravi kei na Loloma
Au a vakasamataka se na qaravi ni dua na ilesilesi ni veiqaravi e kena i balebale niu a sega ni “vinaka sara.”
Ni tarogi au taumada na noqu peresitedi ni iteki kevaka au vinakata meu veiqaravi vakadaukaulotu veiqaravi, au a nanuma taumada, “Io!”
Au nuitaka ni sa tiko vua na Turaga e dua na cakacaka meu cakava, kau vakabauta ni veika kecega e vinakata o Koya meu cakava ena kauta mai vei au na tubu kei na marau baleta ni lomani au o Koya ka vinakata na ka e vinaka duadua vei au.
Na ikarua ni noqu vakasama oya, “Na cava na kaulotu ni veiqaravi?”
A vakamacalataka o noqu peresitedi ni iteki se cava na kaulotu ni veiqaravi ena gauna keitou sota kina ena nona valenivolavola ena Sigatabu oya, ia au sega sara ni kila vinaka se na kena bibi me yacova ni oti oya. Ena gauna oya au a vakasamataka se ibalebale ni veikacivi oqo ni dua na leqa e tiko vei au, baleta niu se bera ni raica na inaki levu cake ni veiqaravi vakadaukaulotu.
Au a Gadrevi Beka?
Au a ciqoma na noqu veikacivi meu veiqaravi ni vo toka e dua na vula ni bera ni tekivu na noqu kaulotu. E kena ibalebale oqo niu a sotavi ira na noqu iliuliu ni kaulotu ni veiqaravi, a tiko ena dua na koniferedi ni kaulotu ni veiqaravi ena noqu vanua, ka kerei talega meu liutaka na vuli vakaitokani vei rau na vo ni marama ena noqu vanua ni bera niu vakatikori.
Au a vakayagataka na vula ena maliwa ni noqu veikacivi kei na noqu solia na noqu vosa ni “vakamoce” (dina ga niu sega ni lako ki na dua na vanua) meu vulica kina na kaulotu ni veiqaravi kei ira na daukaulotu veiqaravi era vakavolivoliti au.
Ena koniferedi ni kaulotu au a tiko kina, au a vulica ni levu na daukaulotu dauveiqaravi, ni ra se qai kacivi taumada, era nanuma ni ra se sega ni vinaka me ra daukaulotu tudei. Au a nanuma lesu na noqu lewa taumada me baleta na noqu veikacivi.
E muri, au qai kila niu a sega ni kacivi ki na dua na kaulotu ni veiqaravi baleta niu sega ni veiraurau kaya, ia baleta ni oqo na veidusimaki nei Tamada Vakalomalagi vei au. Au a sega ni “lailai sobu mai” vei ira na daukaulotu tudei; ia, a gadrevi au o Koya meu veivuke ena tarai cake ni Nona matanitu ena sala tale eso ni veiqaravi. Au a ciqoma e dua na ivakadinadina kaukauwa ni ra sa ka bibi taucoko kivua na Tamada Vakalomalagi na kaulotu ka bibi ena Nona cakacaka, baleta ni o ira kece na daukaulotu era gadreva me ra qaravi Koya ka qaravi ira na Luvena.
Niu sa mai kilai ira eso tale na daukaulotu veiqaravi ena noqu iwasewase, sotavi ira, ka rogoca na nodra italanoa, au kila ni ra italai totoka ka buladodonu ni Turaga. Au qai kila ni dina ga ni so vei keda eda a rarawataki keda vakalailai ena itekivu ni noda kaulotu, eda a yaco kece mai ena kena itinitini: e lomani ira na daukaulotu veiqaravi na Turaga ka da sa tu donuya na vanua e vinakata o Koya me da tiko kina, vuli ka tubu cake ni da qaravi Koya me Vaka na Ligana e vuravura.
Na Sala Era Tarai Saioni Cake kina na Daukaulotu Veiqaravi
Era sa rui ka bibi sara na daukaulotu ena veika kece era rawata me ra veiqaravi kina. Eda gadrevi ira na daukaulotu era biuta tu mai na nodra matavuvale kei na nodra veivale me rua na yabaki me ra vakavulica ka vunautaka na kosipeli ki vuravura taucoko. Ia eda gadreva talega me da tara cake na itikotiko vaka-Saioni ka vakasinaiti ena loloma vei ira na tani kei na gagadre me ra veiqaravi ka laveta cake na kena e lailai duadua vei ira. Oqo na ka era dau cakava na daukaulotu veiqaravi. Eda tarai Saioni ena noda bulia e dua na itovo ni loloma kei na veiqaravi. Oqo e bulia e dua na itikotiko ni veikidavaki, dodonu, ka veilaveti vei ira kece na lewe Na Lotu i Jisu Karisito ni Yalododonu Edaidai—lewenilotu ena nodra bula taucoko, lewenilotu vou, kei na tamata kece.
Na noqu veiqaravi vakadaukaulotu vata kei na mekasini ni Lotu e sa vukei au meu raica na noqu sa kalougata dina. Sa rawa vei au meu vakayagataka na veika au sa vulica me baleta na noqu veivakatovolei ena noqu bula taucoko meu veivuke ena nodra laveti na tani era vakaleqai tu. Au dau tovolea meu wasea na veika au sotava vata kei ira na tani ka vakayaloqaqataki ira tale eso me ra wasea na kedra italanoa. Era sa ka bibi kece sara na luve ni Kalou. Na noqu ilesilesi ni veiqaravi e sa vukei au meu vosoti ira ena nodra malumalumu ka rawa kina vei au meu lomani ira ena i tuvaki ni nodra bula ni da segata me da lako vata mai vei Karisito.
O ira na daukaulotu veiqaravi era dau vakayagataka nodra gauna kei na igu ena kena tauyavutaki o Saioni ena vuqa na sala duidui ia e yaga vakalevu. Eso e veivuke ena veiqaravi vakayago ena veivanua me vakataka na Lomanibai ni Welefea se vanua ni vota kakana e nodra vanua. Era tiko na daukaulotu dauveiqaravi ka ra vakarairaivinakataka na rara ni valetabu ka ra veiqaravi vaka-liganicakacaka vakalotu ena valetabu. Eso era veivuke ena kena veisoliyaki na kakana vei ira na gone e sega na kedra ni sereki na vuli ka qaravi ira ena nodra tarai cake. Eso tale era veivuke ena kena vakatetei na kosipeli ka vaqaqacotaki ira na lewenilotu sa tu rawa vei ira. Era tiko talega na daukaulotu era veivuke ena kena maroroi na veimataqali lori vakacakacaka ni Lotu.
O ira na daukaulotu veiqaravi era veiqaravi talega ena veisala tale eso me vaka na caka ivakatakilakila vei ira na bisopi ena veivale ni Lotu, cakacaka ena vanua ni caka iyaloyalo yavala ni Lotu, ka samaka e vuqa na ka me maroroi kina na tamata kece ena gauna ni COVID-19. Se cava ga na neimami ilesilesi duidui, keimami tarai Saioni cake ena teivaki ni draki ni loloma kei na veiqaravi sega ni nanumi koya ga.
Oi keimami kece na daukaulotu keimami vakaitavi ena vuli ivolanikalou e veisiga, vakavulica na lesoni, tiko ena lesoni kei na matabose ni tikina, ka veivaqaqacotaki ka veilaveti cake vakai keimami kei ira kece era tu wavoliti keimami, se tiki se sega ni neimami ilesilesi taumada.
E dua vei ira na ka bibi au dau cakava e sega soti ni sema ki na noqu ilesilesi vakadonui kei na timi ni lewe ni ilawalawa itabagone qase cake me baleta na mekasini ni Lotu ia e sema vakalevu cake ki na nodra qaravi na daukaulotu tale eso ena noqu ilawalawa ena itikotiko ni Lomanibai ni Valetabu. Au veiqaravi niu vakadeitaka vei ira mera ra vakila ni ra laurai ka rogoci ka ra kila niu kauwaitaki ira ka mera okati.
E sega beka ni o koya oqori na ka era dau cakava na daukaulotu taucoko? Era sega beka ni vakadeitaka vei ira kece na tamata e veiyasai vuravura na daukaulotu ni eke, ena matanitu ni Kalou, e tiko e dua na vanua bibi ka yadudua vei ira kece na Luvena? O ira na daukaulotu tudei era veivuke ena kena vakavulici na vuravura ni matanitu ni Kalou e tiko e vuravura, kei ira na daukaulotu veiqaravi era vukei ira na tani me ra raica se cava na irairai ni matanitu oya ni da vakavakarau ki na iKarua ni Lako Mai ni iVakabula—na vanua ena vagolei kina na yaloda vei ira tale eso, na vanua eda veiqaravi kina ka sega ni vakatikina ga, kei na vanua eda vukei ira kina na tani me ra kila ni ra okati.
Veiqaravi me vakataka na iVakabula—ena Noda Yacova na Tamata O Ya
Se cava ga na vanua keimami veiqaravi kina kei na vanua cava ga, e tiko e dua na ka era dau cakava na daukaulotu taucoko—veiqaravi me vakataki Jisu Karisito, ena noda veiqaravi vua e dua.
E levu cake mai na neimami qarava na neimami ilesilesi yadua, “na noda inaki oya meda vukei ira na tani me ra lako mai vei Karisito ena noda qaravi ira me vaka ena vakayacora na iVakabula. Keimami veiqaravi vakavolodia ena veisoqosoqo ni loloma, cakacaka ni Lotu, ka vakakina ena loma ni itikotiko. Keimami na veiqaravi ena Yacana ki vua e dua, me vaka a cakava o Koya, me vaka sa vakaraitaka na Nona loloma-yalovinaka.”1
Oi keimami na daukaulotu veiqaravi keimami vakamareqeta na vosa ena noda inaki baleta ni da kila ni iVakabula e qaravi keda vakayadudua ka da sa vakila na Nona loloma-yalovinaka. Au sa vakila na loloma uasivi ni iVakabula ena noqu kaulotu niu sa mai kilai Koya vakavinaka cake, ni sa vakamamadataki na noqu veivakatovolei, ni sa vaqaqacotaki na noqu ivakadinadina, ka ra sa lomani au ka laveti au cake na daukaulotu era vakavolivoliti au.
O ira na daukaulotu veiqaravi era dau segata me ra wasea na loloma-yalovinaka i Karisito vei ira kece na wavoliti ira, ka solia na neimami bula me vakayacora tikoga ena gauna taucoko ni neimami kaulotu—kei na vo taucoko ni neimami bula.