Domodra na Yalododonu Edaidai

Au sa Laveti Iko Tiko

Mai vei ReNae Cox, Utah, Amerika

Na vakanananu kaukauwa e lako mai vei au e kaukauwa sara ka vakavuna meu tekiduru.

Au se qai yabaki tolu ga ka sega ni vinakata meu biubiu mai valenibula, ka rau a vakabulabula tiko kina na noqu itubutubu ni oti na vakacalaka ni motoka.

Na itaba e lolomataka na dauvolaivola; itaba mai na Getty Images

Au a sotava tiko ena vuqa na yabaki na veilecayaki kei na nuiqawaqawa ena vuku ni dua na coqa ena motoka a yaco vei au kei rau na noqu itubutubu niu se qai yabaki tolu. A sega ni bula mai kina o taciqu se bera ni sucu.

Ena ika 25 ni yabaki ni oti na vakacalaka, au a vakanananu lesu. Ni oti e vica na vula, au se sotava tiko ga na dredre ka a vakatura e dua na itokani meu gole vua na Tamaqu Vakalomalagi. Au dredre ka qai taroga, “Na cava ena cakava o Koya vei au?”

Sa toso tikoga na noqu sasaga. Ni oti e dua se rua na yabaki, au sa oca ena rarawa ka sa vuki na noqu mosi meu cudru. Au a taura na ivakasala nei noqu itokani ka tekivu gole vua na Kalou.

“Kevaka o tiko dina, tala mai e dua—e dua ga sa rawa,” au a masu. Au gadreva e dua!”

A yaco mai na siga ka lako yani ka duri tu e katuba, ka wawa matewale.

“Raica, na Kalou, e sega ni dua e kauwai mai!” Au a kaya. “A sega ni dua a lako mai!”

Ni tuturu na wai ni mataqu, au curu yani vakamalua ki loma ni vale ka sogota na katuba. Au a taubaletaka na ikabakaba ena druka. Ia niu sa yacova yani na ikabakaba e cake, a sobuti au e dua na yalo vakauqeti sara. A kaukauwa sara ka vakavuna meu tekiduru.

A qai votu mai noqu vakasama na vakanananu oqo: “ReNae, au sa laveti iko tiko.”

A tala mai na Tamada Vakalomalagi na vakasama kaukauwa oya ena dua na sala malumu niu gadreva vakalevu duadua. Au sa qai kila ni lomani au o Koya ka sa kilai au o Koya. E lomani au vakalevu sara ka sa solia kina vei au o Koya na galala ni digidigi. Ena sega ni vakasaurarataki au o Koya se dua tale me da muri Koya, ia o Koya kei na Luvena erau sureti keda meda lako mai vei Rau (raica na Maciu 11:28–30).

Me tekivu mai na siga o ya, au kila niu rawa ni vakararavi Vua. Sa vinaka cake na noqu bula ena gauna oqo baleta niu saga meu muri Koya ka rogoci Koya e veisiga. E dina ni vakatara vei au na Tamada Vakalomalagi kei Jisu Karisito meu vakila na mosi, E Rau kauta talega mai vei au na vakacegu, sautu, kaukauwa, kei na yaloqaqa me rawa niu vuli mai na cakava na veika dredre. Niu vakila na mosi e vukei au meu kila vinaka ka tokoni ira era sotava tiko na dredre.

Eda na sega beka ni kila vakataucoko na veika era sotava tiko na tani, ia eda rawa ni vakaraitaka na loloma vei ira era tu wavoliti keda. Au vakavinavinaka niu kila ni lomani au na Tamaqu Vakalomalagi ka rogoci au niu kacivi Koya.