Mānava i roto i teie ve’a

Te mau hiero : E Poe Tao’a Rahi

Hōhoʼa nō te hiero nō Brigham City (Utah, Marite)

E ha’amaita’ira’a fa’ahiahia ’ia hi’o i te mara’ara’a rahi o te rahira’a hiero e patuhia nei nā te ao nei. Tē ’āmui nei mātou i te mau melo o te ’Ēkālesia ma te ’oa’oa ’ia ha’amo’a-ana’e-hia te mau hiero ’āpī iō rātou ra.

Tē ti’aturi nei mātou ē, e poihere te mau ta’ata ato’a i te hiero ’e e’ita ho’i e topa i roto i terā mana’o hape i fa’a’itehia e te peresideni Boyd K. Packer (1924–2015), peresideni nō te pupu nō te Tino ’Ahuru Ma Piti ’āpōsetolo. I roto i tāna parabole nō te poe ’e te vaira’a iti, ’ua fa’ati’a mai ’oia ē, ’ua hāmani te hō’ē ta’ata rima’ī i te hō’ē vaira’a iti nehenehe nō te fa’a’ite’ite i te hō’ē poe tao’a rahi. ’Ia haere mai rā te mau ta’ata e māta’ita’i i te poe, fa’ahiahia a’e nei i te vaira’a iti. (Hi’o « Les langues de feu, L’étoile, ’Ēperēra 2000, 7.) (sic)

’Ua ta’a iho ā ïa ia tātou ē, te poe tao’a rahi i roto i te hiero, ’o te mau ’ōro’a ïa, te mau fafaura’a ’e te mau ha’amaita’ira’a i parauhia, ’o tē roa’a ia tātou i roto ana’e i te hiero. Mai tei ha’api’ihia mai i roto i teie ve’a e Elder David A. Bednar, nō te pupu nō te Tino ’Ahuru Ma Piti ’āpōsetolo : « Te mau mea ato’a e ha’api’ihia mai ’e te mau mea ato’a e ravehia i roto i te mau hiero nō te mau mahana hope’a nei, e ha’apāpū ïa i te parau nō te fa’anahora’a rahi ’oa’oa a tō tātou Metua i te ao ra, i te hanahana o Iesu Mesia ’e i tōna ti’ara’a ’ei Fa’aora nō tātou. Te mau fafaura’a e fāri’ihia i roto i te mau hiero ’e tae noa atu i te mau ’ōro’a e ravehia i reira, nō te ha’amo’a ïa i tō tātou ’ā’au ’e nō te fa’ateiteira’a hope’a o te mau tamaiti ’e te mau tamāhine a te Atua » (’api 6).

’A tai’o ai ’outou i te parau a Elder Bednar, tē ani nei mātou ia ’outou ’ia ha’amana’o i te mau fafaura’a tā ’outou i rave i roto i te hiero. Mai te mea e mea maoro ’outou ’aita i haere i te hiero, tē ani atu nei mātou ia ’outou ’ia ho’i fa’ahou mai ’e ’ia fāna’o fa’ahou i te ’oa’oa ’e te hau e ’itehia i roto i te fare o te Fatu. Mai te mea ’aita ā ’outou i haere atu ra i te hiero, tē ani atu nei mātou ia ’outou ’ia fa’aineine ia ’outou iho ’ia « fāri’i i te mana nō ni’a mai ra » (Te Ha’api’ira’a Tumu ’e te mau Fafaura’a 38:32).

Elder Kevin R. Duncan

Nō te Hitu ’Ahuru

Upo’o fa’atere o te tuha’a fa’aterera’a nō te hiero