« Mau misiōnare piha ’ohipa : Patura’a i te bāsileia nā roto i te tāvinira’a ’e te here », Liahona, Tiurai/’Ātete 2022.
Feiā ʼāpī paʼari
Mau misiōnare piha ’ohipa : Patura’a i te bāsileia nā roto i te tāvinira’a ’e te here
Tē uiui nei tō’u mana’o ē, te tāvinira’a i te hō’ē misiōni nō te mau piha ’ohipa te aura’a, ’aita vau i te mea « nava’i maita’i ».
I te ani-mātāmua-ra’a mai tō’u peresideni titi iā’u ē, e hina’aro ānei au e tāvini i te hō’ē misiōni piha ’ohipa, tō’u mana’o mātāmua, « Ē ! »
’Ua ti’aturi au ē, e ’ohipa tā te Fatu nā’u e rave, ’e ’ua ti’aturi au ē, te mau mea ato’a tāna e hina’aro iā’u ’ia rave e hopoi mai te reira iā’u i te tupura’a ’e te ’oa’oa, nō te mea ’ua here ’oia iā’u ’e ’ua hina’aro ’oia i te mea maita’i a’e nō’u.
Te piti o tō’u mana’o, ’oia ho’i, « e aha te hō’ē misiōni nō te mau piha ’ohipa ? »
’Ua fa’ata’a mai tō’u peresideni titi e aha te hō’ē misiōni nō te mau piha ’ohipa ’a fārerei ai māua i roto i tōna piha tōro’a i taua sābati ra, ’aita rā vau i māramarama maita’i i te reira ’aore rā te faufa’a o te reira, i muri roa mai ra. I taua taime ra, ’ua uiui ato’a vau ē, teie pi’ira’a te aura’a e ’ere ānei ē, tē vai ra paha te tahi fifi i roto iā’u, nō te mea ’aita ā vau i ’ite atu ra i te ’ōpuara’a rahi a’e i muri mai i te mau misiōni piha ’ohipa.
E hina’aro-mau-hia ānei vau ?
’Ua fāri’i au i tō’u pi’ira’a ’ia tāvini hō’ē ’āva’e hou ’a ha’amata mau ai tā’u misiōni. Te aura’a o te reira, ’ua fārerei au i tō’u feiā fa’atere misiōni piha ’ohipa, ’ua haere atu i te hō’ē ’āmuira’a misiōni piha ’ohipa i tō’u pae fenua, ’e ’ua ani-ato’a-hia mai iā’u ’ia fa’atere i te tahi atu tuatāpapara’a nō te tahi nāu tuahine nō tō’u pae fenua hou vau ’a fa’ata’ahia ai.
’Ua fa’a’ohipa vau i te ’āva’e e tere ra i rōtopū i tō’u pi’ira’a ’e tā’u a’ora’a « aroha » (noa atu ē, ’aita vau e haere ra i te hō’ē vāhi) nō te ha’api’i rahi mai nō ni’a i te mau misiōni piha ’ohipa ’e te mau misiōnare piha ’ohipa ’ati a’e iā’u.
I te ’āmuira’a misiōni piha ’ohipa ’o tā’u i haere atu, ’ua ha’api’i mai au ē e rave rahi misiōnare piha ’ohipa, ’ia pi’i-ana’e-hia rātou nō te taime mātāmua, e au ra ia rātou ē e ’ere roa rātou i te mea nava’i maita’i nō te tāvini i te hō’ē misiōni nō te porora’a ’evanelia. Tē ha’amana’o nei au ma te ha’amā ri’i i tō’u iho huru mātāmua nō tō’u pi’ira’a.
I te pae hope’a, ’ua ’ite a’era vau ē, ’aita vau i pi’ihia nō te hō’ē misiōni piha ’ohipa nō te mea e ’ere au i te mea ’aravihi roa, nō te mea rā e arata’ira’a te reira nā te Metua i te ao ra nō’u. ’Aita roa vau i te mea « iti a’e » i te mau misiōnare poro ’evanelia ; nō te mea rā ’ua hina’aro mau ’oia iā’u ’ia tauturu i te patura’a i tōna bāsileia nā roto i te tahi atu ā mau rāve’a tāvinira’a. ’Ua fāri’i au i te hō’ē ’itera’a pāpū pūai ē, e mea faufa’a te mau misiōni ato’a nō te Metua i te ao ra, ’e e mea faufa’a i roto i tāna ’ohipa, nō te mea ’ua hina’aro te mau misiōnare ato’a e tāvini iāna ’e e tāvini i tāna mau tamari’i.
I muri a’e i tō’u ha’api’ira’a mai nō ni’a i te tahi atu mau misiōnare piha ’ohipa i roto i tō’u pae fenua, te fārereira’a ia rātou, ’e te fa’aro’ora’a i tō rātou mau ’ā’amu, ’ua ’ite a’era vau ē, ’ua riro rātou ’ei mau tāvini fa’ahiahia ’e te parauti’a nā te Fatu. ’Ua ’ite a’e ra vau ē, noa atu ē ’ua ano [désolé] ri’i vetahi o mātou nō mātou iho i te ha’amatara’a o tā mātou misiōni, ’ua tū’ati tō matou mana’o i te hope’a ē : ’Ua here te Fatu i te mau misiōnare piha ’ohipa, ’e tei te vāhi tano mau mātou, i te reira vāhi ’oia e hina’aro ai ’ia vai mātou, nō te ha’api’i mai ’e te tupura’a ’a tāvini ai iāna ’ei rima nōna i ni’a i te fenua nei.
Nāhea te mau misiōnare piha ’ohipa e patu ai ia Ziona
E mea faufa’a roa te mau misiōnare i roto i te mau ’aravihi ato’a i reira rātou e tāvini ai. Tē hina’arohia nei te mau misiōnare e vaiiho i tō rātou ’utuāfare ’e tō rātou nohora’a e piti a’e matahiti nō te ha’api’i ’e nō te poro i te ’evanelia na te ao ato’a nei. Tē hina’aro-ato’a-hia nei rā e patu i te mau autahira’a nō Ziona tei ’ī i te here nō vetahi ’ē ’e te hō’ē hia’ai ’ia tāvini ’e ’ia fa’ateitei i tei iti a’e i rotopū ia rātou. Teie te ’ohipa tā te mau misiōnare piha ’ohipa e rave nei. Tē patu nei mātou ia Ziona ma te fa’atupura’a i te hō’ē ta’ere nō te here ’e te tāvinira’a. E fa’atupu te reira i te hō’ē autahira’a au maita’i, te ti’a ’e te fa’auruhia nō te mau melo ato’a o Te ’Ēkālesia a Iesu Mesia i te Feiā Mo’a i te mau Mahana Hope’a nei—mau melo tumu, te mau melo fa’afāriu ’āpī, ’e te mau ta’ata ato’a.
’Ua tauturu tā’u misiōni piha ’ohipa ’e te mau ve’a a te ’Ēkālesia iā’u ’ia ’ite ē, ’ua ha’amaita’i-mau-hia vau. ’Ua ti’a iā’u ’ia fa’a’ohipa i te mea tā’u i ha’api’i mai nō ni’a i tō’u mau tāmatara’a i te roara’a o tō’u orara’a nō te tauturu i te fa’ati’a mai ia verā e aro nei. ’Ua tāmata vau i te fa’a’ite i tō’u iho mau ’itera’a rau ia vetahi ’ē ’e ’a nā reira ai au, tē fa’aitoito nei au ia vetahi ’ē ’ia fa’a’ite i tō rātou ’ā’amu. E mea faufa’a te mau tamari’i ato’a a te Atua. ’Ua tauturu tā’u misiōni piha ’ohipa iā’u ’ia hōro’a hau atu ia rātou i te aroha, ’e ’ua fa’a’ōhie iā’u ’ia here ia rātou ’ia au i tō rātou huru ’a tūtava ai tātou i te haere ’āmui i te Mesia ra.
E hōro’a te mau misiōnare piha ’ohipa i tō rātou taime ’e tō rātou pūai nō te fa’atupu ia Ziona nā roto e rave rahi huru ta’a ’ē ma te maita’i rā. E tauturu vetahi ma te tāvinira’a i te pae tino i te mau vāhi mai te mau fare vaira’a mā’a ’aore rā te mau vāhi e hōro’ahia ai te mā’a nā te feiā ’aita e fa’aeara’a. Tē vai ra te mau misiōnare piha ’ohipa e fa’a’una’una nei i te ’āua o te hiero ’e ’o tē tāvini nei ’ei rave ’ohipa ’ōro’a i roto i te hiero. Vetahi e tauturu i te ’ōperera’a i te mā’a nā te mau tamari’i ’aita tā rātou e mā’a ’ia ’ōpani te fare ha’api’ira’a, ’e e tāvini ia rātou nā roto i te pāturura’a ia rātou. E tauturu te tahi ’ia ha’aparare i te ’evanelia ’e ’ia ha’apūai i te mau melo tei fāri’i a’ena i te reira. Tē vai ato’a ra te mau misiōnare e tauturu nei i te ’atu’atura’a i te mau huru pereo’o ’ohipa a te ’Ēkālesia.
E tāvini ato’a te mau misiōnare piha ’ohipa ma te tahi atu huru ’ohipa, mai te hāmanira’a i te mau tāpura pāpa’i nā te mau ’episekōpo i roto i te mau fare a te ’Ēkālesia, te ’ohipara’a i roto i te mau piha fa’aharuharura’a hōho’a teata a te ’Ēkālesia, ’e te tāmāra’a e rave rahi ’ohipa nō te pāruru i te ta’ata i te ma’i COVID-19. Noa atu te raura’a o tā mātou ’ohipa, tē tauturu nei mātou i te patu ia Ziona ma te fa’atupura’a i te hō’ē vāhi nō te here ’e te tāvinira’a pipiri ’ore.
Tē ’āmui nei mātou pā’āto’a te mau misiōnare i roto i te tai’ora’a i te pāpa’ira’a mo’a i te mau mahana ato’a, tē ha’api’i nei i te mau ha’api’ira’a, tē haere nei i te mau ha’api’ira’a ’e i te mau ’āpo’ora’a mata’eina’a, ’e tē ha’apūai nei ’e tē fa’ateitei nei i te tahi ’e te tahi ’e te mau ta’ata ato’a ’ati a’e ia mātou, tei roto ānei te reira ’e ’aore rā ’aita i tā tātou mau ’ohipa i fa’ata’ahia.
Hō’ē o te mau mea faufa’a roa tā’u e rave nei, ’aita e tū’ati maita’i nei i tā’u fa’auera’a ’ohipa ’e te pupu a te feia ’āpī pa’ari nō te mau ve’a a te ’Ēkalesia ’e e tū’ati hau atu ra i ni’a i te tāvinira’a a te tahi mau misiōnare i roto i tā’u pupu i te fare ha’api’ira’a nō Temple Square. Tē tāvini nei au ma te ha’apāpū ē, ’ua ’ite rātou ē, tē hi’ohia atu ra rātou, ’e tē fa’aro’ohia atu ra rātou, ’e tē ha’ape’ape’a nei au nō rātou ’e tei roto rātou.
E ’ere ānei terā tā te mau misiōnare ato’a e rave nei ? ’Aita ānei te mau misiōnare ato’a e ha’apāpū nei i te mau ta’ata ato’a ’ati a’e te ao nei ē, i’ō nei, i roto i te bāsileia o te Atua, tē vai ra hō’ē parahira’a faufa’a rahi ’e te ’ōtahi nō tāna mau tamari’i ato’a ? E tauturu te mau misiōnare poro ’evanelia i te ha’api’ira’a i te ao ato’a nei ē, tei ni’a i te fenua nei te bāsileia o te Atua, ’e tē tauturu nei te mau misiōnare piha ’ohipa ia vetahi ’ē ’ia ’ite mai te aha te huru o taua bāsileia ra ’a fa’aineine ai tātou nō te tae-piti-ra’a mai o te Faaora—hō’ē vāhi i reira tō tātou ’ā’au e fāriu ai i ni’a ia vetahi ’ē, i reira tātou e tāvini ai ma te ’ōti’a ’ore, ’e i reira tātou e tauturu ai ia vetahi ’ē ’ia ’ite ē, tei roto rātou.
Tāvinira’a mai tā te Fa’aora—nā roto i te torora’a i te rima i te ta’ata
Noa atu te huru ’e te vāhi tā tātou e tāvini nei, tē vai ra hō’ē mea tā te mau misiōnare ato’a e rave nei—te tāvinira’a mai tā Iesu Mesia i rave, ma te aupurura’a i te hō’ē.
Hau atu i te fa’aotira’a i tā mātou iho mau ’ohipa, « tā mātou fā ’o te tauturura’a ïa ia vetahi ’ē ’ia haere mai i te Mesia ra, ma te tāvinira’a ia rātou mai tā te Fa’aora e nā reira. Tē tāvini nei mātou ma te hina’aro mau i roto i te mau fa’anahora’a aroha, te mau ’ohipa a te ’Ēkālesia, ’e i rotopū i te huira’atira. E aupuru mātou nā roto i tōna i’oa i te ta’ata, mai tāna i rave, ma te fa’a’itera’a i tōna hāmani maita’i ».1
Mātou, te mau misiōnare piha ’ohipa, tē poihere nei i te mau parau i roto i tā mātou ’ōpuara’a, nō te mea ’ua ’ite mātou ē, tē tāvini nei te Fa’aora ia mātou ’ei ta’ata hō’ē ’e ’ua ’ite mātou i tōna hāmani maita’i. ’Ua ’ite au i te hāmani maita’i o te Fa’aora i roto i tā’u misiōni ’a matau maita’i ai au iāna, ’a ha’amāmahia ai tō’u mau tāmatara’a, ’a ha’apūaihia ai tō’u ’itera’a pāpū ’e ’a here ai ’e ’a fa’ateitei ai te mau misiōnare iā’u.
Tē ’imi nei te mau misiōnare piha ’ohipa i te fa’a’ite i te hāmani maita’i o te Mesia i te mau ta’ata ato’a ’ati a’e ia rātou, ’e tē ha’amo’a nei mātou i tō mātou orara’a nō te rave i te reira i te roara’a o tā mātou misiōni—’e i te roara’a o tō mātou orara’a.