Mau parau niu o te ’evanelia

Te mau pāpa’ira’a mo’a : E parau nā te Atua

Old Testament Prophet [Peropheta nō te Faufa’a Tahito], nā Judith A. Mehr

E mau buka mo’a te mau pāpa’ira’a mo’a tei pāpa’i-iho-ā-hia rā e te mau peropheta. Tē fa’a’ite pāpū nei te mau pāpa’ira’a mo’a nō Iesu Mesia ’e tē ha’api’i nei nō ni’a i tāna ’evanelia. Te mau pāpa’iraa mo’a mana a te ’Ēkālesia, ’o te Bibilia ïa (tei roto te Faufa’a Tahito ’e te Faufa’a ’Āpī), te Buka a Moromona, Te Ha’api’ira’a Tumu ’e te mau Fafaura’a ’e te Poe Tao’a Rahi.

Faufa’a Tahito

Te Faufa’a Tahito, e ’ā’amu nō te mau ’ohipa i roto i te Atua ’e tōna nūna’a nō te fafaura’a nō te mau tau i tahito ra. Tei roto i te reira te mau haapi’ira’a a te mau peropheta mai ia Mose, Iosua, Isaia, Ieremia ’e Daniela. Noa atu ā ’ua pāpa’ihia te reira e rave rahi hānere matahiti hou te fānaura’a o Iesu Mesia, e rave rahi peropheta nō te Faufa’a Tahito tei pāpa’i nō ni’a iāna.

Faufa’a ’Āpī

Tē ’ā’amu nei te Faufa’a ’Āpī i te fānaura’a, te orara’a tāhuti, te mau ha’api’ira’a, ’e te tāra’ehara a Iesu Mesia. Tei roto ato’a te mau ha’api’ira’a a te mau ’āpōsetolo a te Mesia ’e a te tahi atu mau pipi. E tauturu te Faufa’a ’Āpī ia tātou ’ia hāro’aro’a nāhea i te ora i te ’evanelia a Iesu Mesia i teie mahana.

Te Buka a Moromona : Te tahi fa’ahou ’ite nō Iesu Mesia

Te Buka a Moromona, e ’ā’amu ïa nō te tahi o te mau ta’ata tei ora na i Amerika i tahito ra. Tei roto i te reira te mau ha’api’ira’a a te mau peropheta, ’e tāna fā tumu ’o te arata’ira’a ïa i te mau ta’ata ato’a ’ia ’ite ē, ’o Iesu te Mesia. Nā te peropheta Iosepha Semita i huri i te reira mai roto mai i te mau ’api ’auro nā roto i te hōro’a ’e te mana o te Atua.

Te Ha’api’ira’a Tumu ’e te mau Fafaura’a

Te Ha’api’ira’a Tumu ’e te mau Fafaura’a, tei roto ïa te mau heheura’a tei hōro’ahia ia Iosepha Semita ’e i te tahi mau peropheta nō te mau mahana hope’a nei. Tē tātara nei te mau heheura’a e mea nāhea te ’Ēkālesia a te Mesia i te ha’amaura’ahia. Tei roto ato’a i te reira te mau ha’api’ira’a ’evanelia faufa’a nō ni’a i te autahu’ara’a, te mau ’ōro’a o te ’evanelia ’e te mau mea e tupu i muri mai i te tāhuti nei.

Poe Tao’a Rahi

Te buka Poe Tao’a Rahi, tei roto ïa te mau buka a Mose ’e a Aberahama, te ’itera’a pāpū nō Iosepha Semita ’e te mau Hīro’a Fa’aro’o a te ’Ēkālesia. Tei roto ato’a i te reira te Iosepha Semita—Mataio, tuha’a nō te ’īritira’a a Iosepha Semita i te Faufa’a ’Āpī.

Tuatāpapa i te mau pāpa’ira’a mo’a

’Ua ha’api’i mai te mau peropheta ia tātou ’ia tuatāpapa i te mau pāpa’ira’a mo’a i te mau mahana ato’a. Nā te reira e tauturu ia tātou ’ia ha’apūai i tō tātou fa’aro’o ’e ’ia ha’afātata atu ā i tō tātou Metua i te ao ra ’e ia Iesu Mesia. ’A tuatāpapa ai tātou i te mau pāpa’ira’a mo’a nā roto i te pure, e tauturu mai te Vārua Maita’i ia tātou ’ia ’ite i te mau pāhonora’a i tā tātou mau uira’a.

Te mau peropheta nō teie ’anotau

’Ia paraparau ana’e te mau peropheta ’e te mau ’āpōsetolo i teie mahana nā roto i te mana o te Vārua Maita’i, e au tā rātou mau parau i te pāpa’ira’a mo’a. Hō’ē hi’ora’a nō te reira, ’o te ’āmuira’a rahi ïa. E nehenehe tātou e tuatāpapa i te mau ha’api’ira’a nō te ’āmuira’a i roto i te Liahona nō Mē ’e nō Novema.

Nō te aha e tai’o ai i te mau pāpa’ira’a mo’a ?

Tē fa’a’ite pāpū nei te mau pāpa’ira’a mo’a nō Iesu Mesia (hi’o Iakoba 7:10–11).

’Ua hōro’ahia mai te mau pāpa’ira’a mo’a nā roto i te fa’aurura’a a te Atua (hi’o 2 Timoteo 3:15–16).

E nehenehe tātou e fa’a’ohipa i te mau pāpa’ira’a mo’a i roto i tō tātou orara’a (hi’o 1 Nephi 19:23).

Te tahi atu ā mau ha’amāramaramara’a nō ni’a i te Poe Tao’a Rahi

Buka a Mose : Te ’īritira’a fa’auruhia a te peropheta Iosepha Semita i te mau pene mātāmua nō te Genese. E mea ta’a ’ē roa te pene 1 o te Mose ; ’ua niuhia te toe’a o te mau pene i ni’a i te Genese 1:1–6:13.

Buka a Aberahama : Te ’īritira’a fa’auruhia a te peropheta Iosepha Semita i te mau pāpa’ira’a ’a Aberahama, nō roto mai i te mau ’ōtaro pēpa ’iri tei ’itehia i ’Aiphiti.

Te mau Hīro’a Fa’aro’o : ’Ahuru ma toru fa’ahitira’a i pāpa’ihia e Iosepha Semita ’o tē tīti’a nei i tō tātou mau ti’aturira’a faufa’a ’ei melo nō te ’Ēkālesia a te Fatu.