E mauha’a i roto i te rima o te Fatu

Nā Elder Ciro Schmeil

Nō te Hitu ’Ahuru

Mai te mea e pe’e tātou i te Vārua ’e e ’ā’au tae tō tātou, e arata’i te Fatu ia tātou ’ia rave i te mea tāna e hina’aro ’ia rave tātou.

E mea ’ōhie mau ’ia riro ’ei mauha’a i roto i te rima o te Fatu. Tītau-noa-hia ia tātou ’ia hina’aro e vaiiho i te Vārua ’ia arata’i ia tātou ’e ’ia roa’a te itoito nō te pe’e i tāna mau muhumuhura’a. Mai te reira te huru te tomora’a mai nā metua o tā’u vahine i roto i te ’Ēkālesia i te matahiti 1968. ’Ua tauturu te hō’ē misiōnare taure’are’a tei hina’aro ’ia riro ’ei mauha’a i roto i te rima o te Fatu, i tō rātou ’utuāfare ’ia tomo mai i roto i te ’Ēkālesia.

’Ua fārerei tō’u nā metua ho’ovai i te mau misiōnare i te hō’ē taime, i muri a’e rā, ’aita tō’u metua tāne ho’ovai i hina’aro fa’ahou. I muri iho, ’ua tonohia mai te hō’ē misiōnare ’āpī, ’o Elder Fetzer, i taua vāhi ra, ’e ’ua fa’auruhia teie misiōnare ’āpī ’e tōna hoa ’ia haere e fārerei ’e ’ia aupuru i te ’utuāfare. ’Ua ti’a ia Elder Fetzer ’ia ha’aputapū i te ’ā’au o te mau melo o te ’utuāfare ma hō’ē rāve’a ’aita tā te tahi atu mau misiōnare e vai ra.

I roto i nā ’āva’e e ono i muri mai, ’ua aupuru te mau misiōnare i te mau hina’aro o te ’utuāfare. Nā roto i te tau, ’ua ha’aputapū te Vārua i nā metua o tā’u vahine ’e ’ua tomo mai i roto i te Ēkālesia. ’Ua fāri’i rāua i te mau ha’amaita’ira’a tei tae mai ’a rave ai ’e ’a ha’apa’o ai tātou i te mau fafaura’a. Nā roto ia rāua, e rave rahi atu ā mau ’utuāfare tei tomo mai i roto i te ’Ēkālesia ’e ’ua fāri’i i te mau ha’amaita’ira’a o te ’evanelia.

’Ua tupu te reira, te tahi tumu, nō te mea ’ua hina’aro te hō’ē taure’are’a nō Utaha ’ia « vaiiho i te Atua ’ia upo’oti’a » i roto i tōna orara’a. ’Ua itoito ’oia i te fa’aru’e i te mahanahana o te fare, nō te ha’api’i mai i te hō’ē reo ’āpī, ’e nō te tāvini i te Fatu i Peresiria.

Hō’ē ’āparaura’a ’ōhie

Hō’ē matahiti i teienei, ’ua fāri’i tā’u vahine ’o Alessandra, i te hō’ē poro’i tāireuira [sms] nā te hō’ē tuahine nō tā mātou pāroita i Peresiria. ’Ua hau i te piti matahiti ’aita rāua i fārerei a’e. ’Ua pāpa’i teie tuahine : « Te hō’ē o te mau mahana ’ino roa a’e o tō’u orara’a, ’aita vau i ’ite e mea nāhea tō’u taera’a i te purera’a. I tō’u nā-reira-ra’a, ’ua ’ite mai ’oe iā’u. ’Ua tāpe’a mai ’oe i tō’u rima ’e ’ua parau mai iā’u ’ia pārahi i pīha’i iho ia ’oe. ’Ua paraparau vau ia ’oe. ’Ua fa’aro’o ’oe iā’u ’e ’ua a’o mai iā’u.

E au ē, ’ua riro ’ei ’āparaura’a ’ōhie roa i taua taime ra. ’Ua riro rā te reira ’ei rāve’a nō tā’u vahine fa’aipoipo ’ia riro ’ei mauha’a i roto i te rima o te Fatu. ’Ua aupuru ’oia i taua tuahine here ra e fa’aruru nei i te hō’ē taime fifi. ’Aita roa o Alessandra i mana’o i te reira. ’Ua fa’auru-noa-hia ’oia ’ia fa’aro’o ’e ’ia hōro’a i te tāmāhanahanara’a, ’e ’ua ha’a ’oia mai te au i te muhumuhura’a. I teienei, ’ua hau e piti matahiti i muri mai, ’ua fāri’i ’oia i teie poro’i tāireuira nā teie tuahine, ma te fa’a’ite mai i tōna māuruuru rahi.

Nā roto i teie mau ’ohipa i tupu, ’ua ha’api’i mai au ē, ’aita e tītauhia te hō’ē pi’ira’a nō te riro ’ei mauha’a i roto i te rima o te Fatu. Tītau-noa-hia ’ia roa’a te hina’aro mau. « Nō reira, mai te mea e hina’aro tō ’oe i te tāvini i te Atua ’ua mā’itihia ïa ’oe i te ’ohipa i reira » (Te Ha’api’ira’a Tumu ’e te mau Fafaura’a 4:3).

« No te hō’ē tau mai teie »

I roto i te Faufa’a Tahito tē tai’o nei tātou nō ni’a i te tahi atu ta’ata tei tāvini ’ei mauha’a i roto i te rima o te Atua. E taure’are’a tamāhine o Esetera, ’ua fa’aru’e mai tōna nā metua i tōna ’āpīra’a. ’Ua fa’a’amuhia ’oia e tōna taea’e feti’i ’o Moredekai.

I muri a’e i tō te ari’i Ahasueru ta’ara’a i te ari’i vahine Vashti, ’ua mā’iti ’oia ia Esetera ’ei ari’i vahine ’āpī nāna. « Hau atu ra tō te ari’i hina’aro ia Esetera i te mau vahine ato’a, herehia mai ’oia e ana i te mau pāretenia ato’a » (Esetera 2:17). E ’āti Iuda ’o Esetera, ’aita rā te ari’i i ’ite i te reira.

Hamana, hō’ē o te mau tauturu o te ari’i, ’ua fa’ateiteihia nō te pārahi i ni’a a’e i te mau tamaiti hui ari’i ato’a e pārahi ra i pīha’i iho iāna (hi’o Esetera 3:1). ’E ’ua ’ōpua ’oia « e taparahi ’e ’ia pohe, ’e ’ia mou roa, te mau ’āti Iuda ato’a, ’o tei ’āpī ’e ’o tei pa’ari » (Esetera 3:13).

I tō Esetera ’itera’a i te ’ōpuara’a ’ino a Hamana, ’ua tītau Morodekai ia Esetera ’ia parauparau i te ari’i. E ’ohipa fifi mau te reira nōna iho, ’ua hōro’a mai rā te mau parau a Morodekai i te itoito iāna. ’Ua parau Moredekai, « O vai e o te mea teie i noa’a ai ia ’oe te hau i teie nei ’anotau ? » (Esetera 4:14).

« ’Ia pohe au ra, pohe noa atu vau » ’ua parau ’oia (Esetera 4:16) ’e ’ua haere atu ra i te ari’i ra ma te tītau-’ore-hia mai. ’Ua riro te reira ’ei hara ’o te fa’autu’ahia i te pohe. Nō tōna itoito, ’ua ti’a ia Esetera ’ia fa’auru i te ari’i. ’Ei fa’ahope’ara’a, ’ua hōro’a ’oia i te hō’ē fa’auera’a nō te fa’aherehere i te mau ’āti Iuda. I roto i te reira, « ’ua hōro’ahia atu e te ari’i i te ’āti Iuda i roto i te mau ’oire ato’a, ’ia ha’aputuputu rātou ’e ’ia fa’aitoito ia rātou iho ’ia ora » (Esetera 8:11).

E mea faufa’a te mau ti’ara’a ato’a.

’Ua hina’aro Esetera ’ia riro ’ei mauha’a i roto i te rima o te Fatu. ’Ua fa’aineine tōna orara’a ha’apa’o ’e te paieti iāna. ’Ia feruri au iāna i te haerera’a i te aora’i o te ari’i ma te tītau-’ore-hia, tē fa’ahiahia nei au i tōna itoito. Tē fa’aha’amana’o mai nei te reira iā’u i te anira’a a te peresideni Russell M. Nelson ia tātou pā’āto’a ’ia vaiiho i te Atua ’ia upo’oti’a i roto i tō tātou orara’a.¹ ’Ua hina’aro Esetera ’ia vaiiho i te Atua ’ia upo’oti’a.

’Ua riro ato’a te taea’e fēti’i o Esetera, ’o Morodekai ’ei mauha’a i roto i te rima o te Fatu. ’Ua fa’a’amu maita’i ’oia ia Esetera. ’Ua hōro’a ’oia iāna i te pāturura’a, te itoito ’e te fa’aurura’a. E ti’ara’a tō tātou pā’āto’a nō te rave, ’e e mea faufa’a ’e e tītauhia te ti’ara’a tāta’itahi.

’Ua tu’u te Fatu ia Esetera i roto i te fare o te ari’i nō te hō’ē ’ōpuara’a—’ia fa’aora i te mau ’āti Iuda. Mai tāna i nā reira ia Esetera, e tu’u te Fatu ia tātou i te vāhi i reira tātou e nehenehe ai e tauturu i te fa’atupura’a i tāna mau ’ōpuara’a. Nō te reira tumu, e ti’a ’ia vai ineine noa tātou ’e ’ia vai ti’amā i mua i te mau rāve’a tāna e hōro’a mai.

Mau rāve’a ’ati a’e ia tātou

Tei piha’i iho noa ia tātou te mau rāve’a nō te riro ’ei mauha’a i roto i te rima o te Fatu. Tā tātou hōpoi’a o te fa’aineinera’a ïa nō te rave. E mea pinepine tātou i te ’ore e ’ite ahea ’aore rā, nāhea te reira mau rāve’a i te fa’a’ite mai ia rātou iho. Tītauhia ia tātou ’ia ora ti’amā noa nō te auhoara’a i te Vārua Maita’i ’e ’ia roa’a te ’ā’au hina’aro mau. ’Ei reira te Fatu e arata’i ai ia tātou ’ia rave i te mea tāna e hina’aro ’ia rave tātou.

I roto i Te Ha’api’ira’a Tumu ’e te mau Fafaura’a 35:3, ’ua parau te Fatu ia Sidney Rigdon, « ’ua hi’o atu ra vau ia ’oe ’e i tā ’oe ra mau ’ohipa. ’Ua fa’aro’o vau i tā ’oe ra mau pure, ’e ’ua fa’aineine ho’i ia ’oe nō te hō’ē ’ohipa rahi roa a’e ».

’Ua ’ite te Fatu ia tātou ’e e ’ohipa tāna nā tātou tāta’itahi e rave. I te tahi taime e ’ohipa ’o tātou ana’e te nehenehe e rave. Teie ’ohipa e riro tei te fare noa ’ei mau metua e tauturu ra i te hō’ē tamaiti ’aore rā te hō’ē tamāhine i roto i te fifi. ’Aore rā, tē vai ra paha i roto i tā tātou mau hōpoi’a i roto i te ’Ēkālesia. Inaha ho’i, e tupu te reira i te mau huru taime ato’a, i te mau huru vāhi ato’a, ’e i te mau huru ta’ata ato’a.

’Ua parau Dieter F. Uchtdorf, e tauturu piti ai ’oia i roto i te Peresidenira’a Mātāmua : « ’Ua hōro’a te Fatu ia ’outou i tā ’outou mau hōpoi’a nō te hō’ē tumu. Tē vai ra paha te mau ta’ata ’e te mau ’ā’au ’o ’outou ana’e te nehenehe e toro atu i te rima ’e e ha’aputapū. Peneia’e ’aita e ta’ata ’ē atu e nehenehe e rave mai te reira te huru ».²

’Ua parau ato’a te peresideni Uchtdorf, « ’Ia pe’e ana’e tātou i te hi’ora’a maita’i o [te Fa’aora], e nehenehe tō tātou rima e riro mai ’ei rima nōna ; tō tātou mata, ’ei mata nona ; tō tātou ’ā’au, ’ei ’ā’au nōna ».³

Mai ia Esetera, Moredekai, Elder Fetzer, tā’u vahine ’e te tahi atu mau ta’ata e rave rahi, e nehenehe tātou pa’ato’a e riro ’ei mauha’a i roto i te rima o te Fatu.