Nā roto i te arata’ira’a a te Fatu

Nā Darrel Freeman, Maryland, Fenua Marite

I rōpū i te ’ati tō’u ’itera’a ē, e mara’a iā’u ’ia rave i te mau ’ohipa pa’ari.

’Ei tuati fa’aturuhe i roto i te Nu’u ’Ihitai Ahoea o te Fenua Marite i te tau nō te ’aerera’a te Tovi 19 nā te ao nei, ’ua tonohia vau i te tuha’a rū nō te fare ma’i i te Pū Jacob K. Javits Convention Center i New York City, nō te tuati i ni’a i te rēni mātāmua i te taime ’a teitei roa ai te fāito o te ma’i pe’e Tovi 19.

’A ha’amata ai au i tā’u ’ohipa, ’ua tupu mai te māna’ona’ora’a i roto i tō’u ferurira’a. ’Ua pe’ape’a roa vau nō ni’a i te aupurura’a i te feiā ma’i ’e te ’arora’a i teie tirotiro ha’aparuparu.

Mai ia Nephi, « ’ua arata’ihia vau e te Vārua, ’e ’aore au i ’ite nā mua roa i te mau mea tā’u e ti’a ’ia rave » (1 Nephi 4:6). ’Ua tauturu teie mana’o iā’u ’ia ti’aturi i te Metua i te ao ra ’e ’ia pure pinepine ’ia fa’aro’o vau i tōna reo, ’ia pe’e au i tāna mau arata’ira’a ’e ’ia aupuru māite ho’i i te feiā tā’u e utuutu nei.

I te pō mātāmua nō te aupurura’a, ’ua ō mai te hō’ē ta’ata tei ’ino roa. ’A ha’amata ai au ’e tō’u mau hoa ’ohipa i te hi’opo’a iāna, ’oi’oi au i te ’itera’a ē, ao te reo pāniora ana’e tāna e paraparau ’O vau ana’e te ta’ata i reira e paraparau nei i te reo pāniora, e reo tā’u i ha’api’i i te tau nō tā’u misiōni i Venezuela.

’A ha’amata ai au i te paraparau i te ta’ata ma’i, ui mai ra ’oia, e tupu maita’i ānei te mau mea. ’Ua fa’aitoito vau i tōna ’ā’au tō’aru’aru ma te parau ē, tē fāri’i ra ’oia i te utuutura’a maita’i roa a’e. ’Ite atu ra vau i roto i tōna mata i te hō’ē fāito ti’aturira’a ’e te tāmarū. I te toe’a o te pō, ’ua haere pinepine au i tōna hiti ro’i nō te hi’opo’a i tōna huru ’e nō te hōro’a i te parau ’āpī. ’Aita re’a mahana i muri mai, ’ua ’āfaro roa mai tōna huru ’e matara atu ra i rāpae i te fare ma’i.

I te tau nō terā tonora’a, ’ua fārerei au e rave rahi feiā ma’i ’o tē paraparau noa i te reo pāniora. Nā tō’u ’ite i te paraparau ia rātou i roto i tō rātou reo i tāmarū i tō rātou ’ā’au ’e i fa’atupu i te itoito i roto i tō rātou fa’aorara’a. 

’A feruri ai au i tō’u ’ā’amu i te ’imira’a i te arata’ira’a nō te ra’i mai nō te aupuru māite i te feiā ma’i, tē ha’amana’o nei au i te a’o a Elder Brook P. Hales, nō te Hitu ’Ahuru. ’Ua parau ’oia ē, tei roto tō tātou Metua i te ao ra « i te mau tuha’a o tō tātou oraraa » ’e « e fāri’i tātou i te nīni’ira’a tāmau o te arata’ira’a hanahana nā roto i te fa’aurura’a a te Vārua Maita’i. »¹

’Ite pāpū a’e ra vau ē, e mea faufa’a tō’u ’aravihi i te reo pāniora mai tō’u ’ite i te rapa’au i te ma’i. ’A aupuru ai au i te ta’ata, ’ua fāna’o vau i te hō’ē hi’ora’a ātea pāpū ē, i rōpū i te ’ati ’e nā roto i te arata’ira’a a te Fatu, e mara’a iā’u ’ia rave i te mau ohipa pa’ari.