Vāhi fa’atupura’a

Nā Deborah L. Dougal

’Ua ’ite te Fatu e ruperupe ’e e ’ūa’a fa’ahou vau.

E rave rahi matahiti i teienei te pohera’a tā’u tāne ’o Jerold. ’Ua tupu tā’ue mai tōna ma’i māriri ’aita’ata ’ino hōpe’a, toru ava’e i muri mai, ’ua fa’aru’e mai ’ōna. I teienei, tē māna’ona’o nei au iāna ’ia rave au i te ’ohipa i roto i te ’āua.

Tē taui ra vau i te vaira’a o te hō’ē tumutumu, puta mai nei te hō’ē mana’o i roto iā’u. Hou vau ’a nā reira ai, e mea maita’i roa terā tumutumu. Tei roto i te fare ’e tei roto a’ena i te hō’ē vaira’a, e’ita rā i te mea tupu ruperupe. I ’ite au ē, ’ia ’ore noa atu vau e taui i tōna vaira’a, ’ia tae i te hō’ē taime, e fa’aea te reira i te ’ūa’a ’e pēnei a’e ’o te fa’aea ho’i i te tupu. Pāpū roa ïa ē e’ita iho ā te reira e maita’i roa atu.

Nō reira, ’ua fa’aoti au e hōro’a i taua tumutumu ra, i te hō’ē vāhi fa’atupura’a nā roto i te tāhitira’a iāna i roto i te hō’ē vaira’a rahi a’e. ’Eiaha ’ei vaira’a rahi roa—e piti noa a’e ’initi te ’ā’ano o te porota’a. Mai te mea e vaira’a rahi roa, e riro te pape i te hōpuna ’e i te ha’apohe i te mau ā’a.

’Ua mana’o vau e tupu ’atā taua tumutumu ra ’a tāmata ai ’oia i te fa’atanotano i roto i te reira vāhi. E mea au maita’i ’oia ’e te vī maita’i i roto i tōna vaira’a ’o tei riro mai ’ei vāhi mātauhia e ana. ’Aita ’oia i ’ite ē e tauturu te reira tauira’a iāna ’ia tupu tāmau noa. ’Ua hina’aro vau e aupuru i te reira, ma te hōro’a atu i te māramarama tano, te pape ’e te mau ’īmā’a e au nō teie taime fa’atanotanora’a. ’Ua ’ite au ē, ’ia tae i tōna ra tau, e ruperupe ’e e ’ūa’a fa’ahou mai ’oia.

’A feruri ai au i tō’u orara’a ’ei vahine ’ivi, e au ē mai taua tumutumu ra ato’a vau. E mea maita’i tō’u orara’a. E mea mātaratara maita’i au. I te pohera’a rā tā’u tāne, ’ua fa’aro’o vau i te Vārua i te ’ōmuhumuhura’a mai ē, tē tomo nei au i roto i te hō’ē tuha’a ’āpī nō te tupura’a. E rave rahi ā te mau mea tei tītauhia ’iā’u ’ia ha’api’i ’e ’ia rave i roto i teie orara’a.

I roto i nā matahiti e piti i muri mai, ’ua fa’aru’e ato’a mai e hitu ta’ata i roto i tā mātou pāroita. ’Ua ha’amata vau i te ani i tō’u mau hoa ’ivi ’āpī ’ia ’āmui mātou, ’ia paraparau, ’ia hāhaere, ’ia tāvini ia vetahi ’ē—’ia ’ore ho’i mātou tāta’itahi ’ia mo’emo’e roa. ’Aita te hō’ē noa a’e o mātou i mā’iti ’ia « tāhitihia ». Terā rā, ’a fa’atanotano ai au i tō’u orara’a tāhuti nei ma te ’ere i tā’u tāne fa’aipoipo,’ite a’e ra vau ē, e nehenehe au e tauturu i te feiā tei fa’aruru i te fifi mai tō’u. ’Ua ’ite ato’a mai au ē, e rave rahi huru rāve’a nō te ’āmui i te mau tamari’i ’e te mau mo’otua, ’e nō te ha’apāpū fa’ahou ia rātou ē, nā roto i te tāra’ehara a Iesu Mesia, i roto i te orara’a a muri a’e, e ti’a i te ’utuāfare ’ia tāhō’ē fa’ahou ā.

’Aita roa vau i mito noa a’e i te hotura’a ’o tē tupu mai i ni’a iā’u nō te mo’era’a o tō’u hoa fa’aipoipo. ’Ua fa’aō mai rā tō tātou Metua i te ao ra i roto ’e ’ua « tāhiti » iā’u ma te hōro’a mai i te hō’e vāhi fa’atupura’a nā roto i te tu’ura’a iā’u i roto i te hō’ē vaira’a rahi ri’i a’e—te hō’ē ’ōpuara’a ’āpī, e taime fāna’o ho’i nō te tupu i te rahi.

Tē mihi noa nei ā vau ia Jerold i te mau mahana ato’a. Tau matahiti i ma’iri, tē ’aro noa nei ā vau i te tāmatara’a i te fa’atanotano i te vaira’a ’o vau ana’e, ’aita ’oia. ’Ua ’ite rā vau e aupuru te Fatu iā’u nā ni’a i te roara’a o te ’ē’a. I te pae hope’a, ’e ma te ti’aturi iāna, e ruperupe ’e e ’ūa’a fa’ahou vau.

Tē ora nei te ta’ata pāpaʻi i Idaho, Fenua Marite.